Música, ciencia y teatru nel branu de Llaboral

El conciertu de Marea, el Tsunami Xixón, el Splashdown Festival, el Festival Rincones y Recovecos, Circlassica o los Campus de Branu son dalgunes de les actividaes programaes para esti branu en Llaboral Ciudá de la Cultura. Hasta’l 5 de xunetu la Llaboral acueye l’Intensive Contemporary Dancie Course, un certame pa la especialización y el perfeccionamiento de técniques de danza contemporanea.

La compañía Con Alevosía Teatru va representar de nuevu Nanä Misericordia, un espectáculu basáu nel teatru d’inmersión, el 11, 12 y 13 de xunetu. La Escuela de Danza Patricia Laruelo va celebrar na Llaboral la so gala fin de cursu’l 12 de xunetu. El Splashdown Festival, l’eventu de divulgación científica pa tolos públicos centráu na esploración espacial, va dedicar la so cuarta edición a los 50 años de la llegada del ser humanu a la Lluna. Del 19 al 21 de xunetu’l Splashdown Festival programó conferencies, audiovisuales, charres-taller, una proyección de cine y un conciertu de música, amás d’otres actividaes paraleles como un space campus pal públicu infantil y xuvenil.

La fola del Tsunami Xixón va llegar el 2 y 3 d’agostu con The Offspring, Kaiser Chiefs, NOFX, Berri Txarrak, y La M.O.D.A., ente otros

Marea va presentar el so nuevu discu, ‘El azogue’, na plaza de la Llaboral el 27 de xunetu. La fola del Tsunami Xixón va llegar el 2 y 3 d’agostu, coles actuaciones de The Offspring, Kaiser Chiefs, NOFX, Good Charlotte, Danko Jones, Berri Txarrak, y La M.O.D.A., ente otros.

Del 5 al 9 y del 12 al 16 d’agostu, la Llaboral va acoyer el Certame de Afinación de Pianos d’España, con dos cursos nos que s’ufierta una formación esperta n’afinación, arreglu y caltenimientu d’un pianu p’ameyorar l’usu del preséu y pa saber cómo faer un arreglu, regulación y afinación d’un pianu ensin ayuda d’aparatos electrónicos. El Festival Internacional de Pianu de Xixón va celebrar amás dos de los sos conciertos na Llaboral el 16 y el 22 d’agostu.

Teatru, maxa, clown y títeres van anubrir distintos espacios de la Ciudá de la Cultura na segunda edición del Festival Rincones y Recovecos. Va celebrase del 19 al 21 de setiembre. Inclúi propuestes escéniques abiertes a tolos públicos a partir de 6 meses. Del 26 al 29 de setiembre Productores de Sonrisas va rindir homenaxe al circu modernu nun espectáculu que llega de la mano d’Emilio Aragón, Circlassica, con seis funciones nel Teatru de la Llaboral pa treslladar al espectador al máxicu mundu de Nim y Margot.

Campus de branu, visites guiaes y puertes abiertes

Pal públicu infantil de 3 a 5 y de 6 a 12 años, van ufiertase los Campus de Branu hasta’l 30 d’agostu (sacante la selmana del 12 al 16 d’agostu). Los más pequenos de la casa van esfrutar con un completu programa d’actividaes. Ates plástiques y escéniques, espresión corporal, naturaleza y educación ambiental, vezos saludables… Cada selmana va potenciase una temática distinta. Nos Campus tamién tien cabida l’aprendizaxe d’inglés, les actividaes de terapia canina, primeros auxilios y minidrones.

El 22 de setiembre habrá xuna nueva xornada de puertes abiertes pa conocer de primera mano el complexu

Tolos visitantes pueden esfrutar amás esti branu de percorríos guiaos a Llaboral Ciudá de la Cultura. D’esta manera va poder conocese esti monumental conxuntu. El 22 de setiembre habrá una nueva xornada de puertes abiertes pa conocer de primera mano tola vida interior qu’atesora esti complexu cultural.

Pa los conciertos y espectáculos les localidaes tán disponibles na Recepción de la Llaboral, nel Centru Niemeyer n’Avilés, na Oficina d’Información Turística d’Asturies n’Uviéu, na web entradas.liberbank.es. Les entraes pa les visites guiaes y les xubíes al Mirador de la Torre tamién pueden mercase con antelación na Recepción de la Llaboral y al traviés de la web entraes.liberbank.es.