La organización abre’l plazu de matrícula nos niveles básicu 1 y 2 de la modalidá a distancia y presencial n’Uviéu

 

El periodu d’inscripción a la convocatoria acaba’l 28 de setiembre

 

XIXÓN, 12/09/2022. Iniciativa pol Asturianu abrió esti llunes el plazu de matriculación p’apuntase a los nuevos cursos de llingua asturiana (nivel básicu 1 y nivel básicu 2) que van facese a distancia, al traviés d’una plataforma dixital, y de manera presencial el nivel básicu 1 n’Uviéu, nos espacios del Conseyu de la Mocedá del Principáu d’Asturies. 

 

Los cursos van tener una duración de 36 hores llectives y van entamar el llunes 3 d’ochobre y van acabar a mediaos d’avientu. La modalidá a distancia favorez la auto organización del alumnáu y permite-yos dir faciendo les actividaes según l’horariu de caún, de manera mas conveniente.

 

El nivel inicial ta empobináu a persones ensin formación d’asturianu o con nivel baxu de conocencia. El nivel II ta empobináu a persones con una conocencia más fonda del idioma, que yá ficieren dalgún cursu enantes. En dambos casos, les persones que lu superen van algamar una acreitación de l’Academia de la Llingua Asturiana.

 

El preciu de la matrícula ye de 60 euros. Les persones asociaes a Iniciativa pol Asturianu van beneficiase d’un descuentu y solo tienen qu’abonar 50 euros. Toles persones interesaes pueden asociase nel momentu de la matrícula y disfrutar d’esti descuentu.

 

Les inscripciones pal cursu pueden cubrise nun formulariu na propia páxina web d’Iniciativa pol Asturianu, onde tamién s’alcuentren toles condiciones pal mesmu. El plazu d’inscripción acaba’l 28 de setiembre.