El xuráu de la Beca de producción LABjoven-Experimenta 2022 alcordó esti llunes 7 de marzu escoyer el proyectu Vacacional de l’artista Olmo Cuña d’ente les 17 propuestes recibíes. Vacacional ye una videoinstalación qu’esquiza les conexones ente la Ciudá Sindical Vacacional de Perlora, la noción de señardá reflexiva» y les característiques de la imaxe dixital.
En palabres del artista’l so proyectu “busca xenerar asociaciones ente l’arquitectura del llugar, venceyada al ociu y al descansu, cola noción de señardá reflexiva» plantegada por Svetlana Boym; un tipu de señardá qu’emplega la distancia crítica pa cavilar sobre la hestoria, reconsiderar el pasu del tiempu y recuperar los venceyos ente utopía y memoria”
Olmo Cuña toma como exa de la investigación esta ciudá residencial, construyida en 1954, en plenu réxime de Franco, pa sirvir de llugar de vacaciones a los trabayadores de les empreses públiques de toa España. Anguaño les edificaciones atópense nun avanzáu estáu de deterioru.
L’artista, que va realizar una residencia d’ocho selmanes de duración en Llaboral pa producir el proyectu, propónse realizar una videoinstalación compuesta por una serie de películes basaes n’acciones rexistraes en Perlora. Estos xestos, que son bonales y lúdicos, son coles mesmes la resultancia d’una reflexón que busca alteriar la manera col que percibimos el contestu nel qu’asoceden. Amás el so trabayu va movese ente procesos de producción manuales y dixitales como una manera de conectar determinaos xestos del pasáu que se conecten col presente y proxéctense escontra’l futuru. Les resultancies de la residencia van amosase nuna esposición a partir del 23 de xunu de 2022.
L’artista Olmo Cuña (Vigo, 1983) llicencióse n’Artes Visuales na Facultá de Belles Artes de Pontevedra, cursó un máster en Producción Artística na Universidá Politécnica de Valencia y formó parte del Programa Educativo SOMA 2016 en Ciudad de México. Ente les sos esposiciones recién destaquen Lo fingido verdadero, 2021 Casa de Lope de Vega, Madrid; Inestimable Azar, 2021; XIV Bienal FEMSA, Centro Cultural Antiguo Colegio Jesuita, Pátzcuaro, Michoacán; Todo sucede como si, 2019, Can Felipa, Barcelona y Crisis?, What Crisis?, 2018 Tenerife Espacio de las Artes.
L’actividá d’Olmo Cuña parte d’esperiencies cotidianes en distintos llugares de la so redolada, amosando especial interés en reparar y cuestionar cómo operen les formes más xeneralizaes y consumistes d’acercamientu al territoriu al traviés de la imaxe. Los sos procesos, que se basen n’aspeutos rellacionaos cola pintura y el pasu del tiempu, de cutiu incorporen activaciones o relatos colos que busca proponer otres condiciones de percepción con al respective de un determináu escenariu cultural, paisaxísticu o urbanu.
