L’Observatoriu Xixonés de Movilidá llanza’l so segundu pidimientu con recoyida de firmes pa promover una conexión digna pal carril bici ente la llamada Milla del conocimientu, que s’acerca a les universidades, Llaboral Ciudá de la Cultura y l’hospital de Cabueñes y la sienda del este la ciudá pela cai Albert Einstein. Súmase al pidimientu pa conectar el carril bici d’Av. Castiella y el carril bici de la Carretera de Villaviciosa.
Dambes demandes tienen en común que se trata d’actuaciones cencielles qu’ameyoraríen muncho la vertebración de la ciudá pa la bicicleta. N’Avenida de la Costa y Carretera de Villaviciosa hasta Avenida de Castiella malapenes hai 275m de distancia pa xunir estos carriles bici, mientres que n’Albert Einstein el tramu ye de namás 500m ente’l final del carril bici actual y la conexón, al menos hasta la sienda fluvial y la cai Poeta Ángel González.
El primer tramu conectaría carriles bici recién con bastante usu como Xeneral Suárez Valdés y Castiella cola carretera que lleva hasta’l Grupu Covadonga, el Molinón, la zona fluvial y l’este de Xixón. Mientres que’l segundu resulta necesariu pa dar accesu y opciones a usuarios que podríen allegase a centros de trabayu y estudiu en bicicleta como la Politécnica, el Campus de Xixón, la Laboral, el Parque Científicu Tecnolóxicu, la UNED y l’Hospital de Cabueñes; averando “la milla’l conocimientu” al entornu urbanu de Viesques y del restu de la ciudá.
Amás, OXM apunta a les reformes anunciaes nel entornu del Piles y de Les Mestes pa realizar una obra rápida y cenciella n’Av. d’Albert Einstein, retirando una llinia d’aparcamientos con una baxa ocupación la mayor parte del añu pa dar serviciu a más usuarios de la vía. Trátase d’una actuación que yá taba incluyía nel Plan de Movilidá Sostenible de Xixón 2023-2032 y que nun requier d’una gran obra.
Al respective la obra frente al Bibio, requedría una reordenación de parte del espaciu disponible na zona frente a la plaza de toros, pudiendo baxar rápidamente a calzada’l carril bici nel cruce con Pintor Marola p’aprovechar el carril de llau mar nesti tramu y avenida Castiella, ya que cunta con tres carriles viniendo de dos n’Anselmo Solar y terminando en dos n’Avenida de la Costa.
