La Sexta emite güei’l capítulu de ‘Pesadilla en la cocina’ grabáu en Moreda

La primer reacción d'Alberto Chicote al visitar La Habana ye d'absoluta sorpresa

0
2688

500 metros cuadraos de local, trés décades d’hestoria y una carta con decenes de platos. La Sexta estrena esti xueves a les 22:30 hores el capítulu de ‘Pesadilla en la cocina‘ grabáu na sidrería La Habana de Moreda. Magar que la grabación fízose n’agostu de 2016, nun va ser hasta esta nueche cuando los espectadores puedan ver l’enantes y el depués del pasu del cocineru Alberto Chicote pel establecimientu xixonés.

El local ye esaxeradamente grande, les raciones son inmenses y el dueñu, un veteranu hosteleru qu’agora quier xubilase, nun tien a quién pasa-y el testigu del negociu que foi tola so vida. La so fía, la heredera natural del negociu, nun paez asumir tola responsabilidá y el restorán ta empezando a dise a pique. Amás, el serviciu ye cada vez más deficiente. Mientres nuna mesa dalgunos van pol segundu platu a otros nin siquier llegó-yos el primeru.

La primer reacción d’Alberto Chicote al visitar La Habana ye d’absoluta sorpresa. Nengún de los platos que prueba ta mal ellaboráu. El sabor ye bonu, les cocciones acertaes… A esceición del desproporcionáu tamañu del Supercachopo, con una dimensión incomprensible pal cocineru pero que ye calidable y ta bonu. Nun hai nada que Chicote pueda reprochar a La Habana dende’l puntu de vista de la comida. Entós ¿ú el problema Según Gema, la fía del dueñu, el problema ta nel serviciu. Ta convencida de que los camareros nun saben tratar a los veceros y éstos nun vuelven por cuenta de la atención en sala. Ellos tienen una versión bien distinta. Creen que Gema nun ayuda lo suficiente y que nun sabe cómo entamar el restorán como debería.