La vocera de Podemos nel Conceyu de Xixón, Olaya Suárez, censuró esti miércoles la situación del campu de rugby de La Calzada, utilizáu pol Calzada Rugby Club, y anunció que va reclamar esplicaciones per parte del gobiernu municipal nes comisiones municipales d’esta selmana.
N’abril de 2024 el Plenu del Conceyu aprobó, por unanimidá y a propuesta de Podemos, un conveniu de cesión que dexara a esti club cuntar col campu de forma estable. Sicasí, dichu conveniu nun se concretó entá y el club vióse na imposibilidá de tramitar l’alta nos suministros básicos d’agua y lluz pa facer un usu normal de les instalaciones. Tampoco se-yos dexa utilizar los vestuarios del vecín pabellón Mata Xove, contraviniendo’l compromisu adquiríu pol conceyal de Deportes.
Poro, Olaya Suárez denuncia que “tán matando a un club que renació a base de trabayu voluntariu y de xente dispuesto a facer comunidá en La Calzada”. La conceyala esplicó que yá se perdieron l’equipu inclusivu y les escueles deportives infantiles por causa de la situación del campu.
Suárez llamentó que “magar de la paciencia que tán demostrando” los responsables del club, “lo único que s’atopen per parte del gobiernu son negatives, incumplimientos y evasives”. Pa la edil morada, “ye mui indignante” esta situación, máxime teniendo en cuenta que sería la mesma Empresa Municipal d’Agües la encargada de conectar el serviciu nesta instalación propiedá del Conceyu.
Podemos Xixón rexistró dos preguntes nes comisiones municipales d’esta selmana: una na comisión de Facienda, pa conocer les razones poles que’l conveniu sigue ensin ser formalizáu; y otra na comisión de Deportes, pa que’l conceyal de la área afronte la situación del campu y esplique por qué’l Conceyu incumple los sos compromisos, perxudicando la continuidá de l’actividá del Calzada Rugby Club.
