Podemos Asturies va llevar al Parlamentu asturianu los problemes del CD Cuadonga de fútbol femenino denunciaos pol so equipu técnicu y xugadores apocayá. Va ser na comisión de Cultura d’esti xueves 17 de febreru onde la conseyera del ramu va tener qu’asitiase sobre los casos de discriminación y persecución nesti equipu uvieín.
Asina lo anunció esti miércoles el voceru parllamentariu de Podemos Asturies, Rafael Palacios, nuna rueda de prensa acompañáu por xugadores del club. “Pidimos al Gobiernu asturianu que sofite públicamente a estes muyeres, énte la situación de discriminación y persecución que tán sufriendo per parte de la directiva. Un gobiernu que se define y presume de ser feminista, nun puede dexar esti tipu de discriminación”, aseguró Palacios, que va entrugar a Berta Piñán sobre qué xestiones ta realizando pa poner fin a la situación de persecución, discriminación y maltratu que tán sufriendo les xugadores y equipu técnicu del CD Covadonga Femenín.
El voceru de la formación morada, señaló que les xugadores y l’equipu técnicu “vienen reclamando condiciones dignes y un tratamientu igualitariu” a la hora de practicar esti deporte en comparanza col equipu masculín. El club “como represalia espulsa a parte del equipu y del cuerpu técnicu y les que se quedaron viven una situación bien complicada”. Magar que les xugadores unviaron cartes tanto a la Federación Asturiana de Fútbol, la conceyalía de Deportes del Conceyu d’Uviéu o la Dirección xeneral de Deportes del Gobiernu asturianu, “naide salió públicamente a sofitar a estes muyeres valientes que s’enfrentaron a una situación de presión bien complicada”, concluyó Palacios.
Pela so parte, les xugadores del Club Deportivu Covadonga Femenín -fundáu en 2018- Alba Rodríguez, Sara Martínez y Beatriz Pérez, señalaron que’l club cuntaba con una subvención pública pa sofitar el fútbol femenín “que yá terminó” y a partir d’entós dende la directiva indicóse-yos que “tendríamos que pagar una cuota de 20 euros mensuales por xugar, mientres que l’equipu masculín -dambes militen na categoría rexonal del fútbol asturiano- cobren 50 euros al mes”. Amás, apuntaron que se-yos torgó faer usu de los vestuarios como midida anticovid, pero los nuesos compañeros sí podíen usalos”.
Les xugadores denunciaron “represalies” per parte del presidente al espulsar a les trés capitanes, trés entrenadores y la delegada del equipu, dempués d’allegar a los medios de comunicación “pa dar a conocer la nuesa situación”. Por estos motivos, les xugadores aseguraron que la intención de la directiva, col so presidente al frente, ye la de “eslleir l’equipu pal próximu añu”.
