El Conseyu de Coordinación de Podemos Asturies abrió espedientes disciplinarios a dellos militantes que vienen incumpliendo de forma repitida y deliberada les normes democrátiques del partíu y afrellando a la organización y a los sos representantes
tanto nos sos espacios internos como na esfera pública talo como declaró’l partíu.
Trátase, asina, d’una iniciativa que tendría de entamase va tiempu según los sos dirixentes. Dende Podemos Asturies «tratamos d’evitar llegar a esti puntu y dimos demasiaes oportunidaes a persones que, desque perdieron el control del partíu nun procesu democráticu a finales de 2021, asitiáronse claramente fuera de la organización y dedicáronse sistemáticamente a actuar de forma destructiva contra ella. Foi una constante pela so parte la contra la llantadera de barruntos ensin pruebes sobro la llimpieza de los procesos internos de Podemos, los bilordios públicos y agresiones verbales directes contra distintes compañeres, la indisciplina flagrante escontra los órganos lexítimos de dirección ya inclusive el sofitu a procedimientos llegales fraudulentos en contra del que se supon que ye’l so propiu partíu».
Les persones oxetu d’espediente son:
Daniel Marí Ripa, qu’acusó, según el partíu, «de forma infundada y repitida a les direcciones autonómica y estatal de Podemos de fechos bien graves (“amenaces”, “espulsiones”, “pucherazo”, “despidos”, “creación de círculos pirates”…), tanto nes sos cuentes de redes sociales como en medios de comunicación, amás de tratar de secuestrar el control de la cuenta bancaria del grupu parlamentariu na Xunta Xeneral».
Andrés Fernández Vilanova, quien tando yá suspendíu de militancia «usurpó la representación de Podemos Asturies estableciendo contactos en nome del partíu con entidaes sociales asturianes, según pudo constatar la dirección, amás de participar en distintos actos públicos tamién en nome de Podemos y entemetese nel procesu de primaries espublizando falsedaes».
Jorge Fernández Iglesias, «quien vien afrellando verbalmente a distintes compañeres del Conseyu Ciudadanu Autonómicu, tanto en chats como en caúna de les xuntes presenciales de dichu órganu, y persistiendo nuna actitú desaxeradamente irrespetuosa y difamadora a pesar de múltiples amonestaciones».
