El Gobiernu d’Asturies y l’Universidá d’Uviéu algamaron un alcuerdu para garantizar la estabilidá presupuestaria de la institución académica hasta 2028. El conveniu de collaboración que se va roblar nes próximes selmanes establez un modelu de financiamientu pol que la Universidá va recibir más de 1.000 millones en seis años, a los que se van sumar les partíes correspondientes a otros conceutos venceyaos a programes d’investigación o ayudes para estudiantes.
El conseyeru de Ciencia, Innovación y Universidá, Borja Sánchez, y el rector de la Universidá d’Uviéu, Ignacio Villaverde, presentaron güei les llínees básiques del alcuerdu, qu’agora tendrá de llograr el vistu bonu del Conseyu de Gobiernu de la institución académica, Conseyu Social y, finalmente, del Conseyu de Gobiernu del Principáu. Al actu tamién asistieron la directora xeneral d’Universidá, Cristina González, y el xerente de la entidá, José Antonio Díaz Llagu.
Tantu’l Principáu como la Universidá consideren qu’esti alcuerdu marca un finxu históricu, yá que garantiza estabilidá per seis años, prorrogable otros cuatro. En total, un horizonte de diez años por que la institución académica pueda planiar la so estratexa de futuru.
El conveniu regula l’aportación ordinaria a la institución académica, el financiamientu por resultancies y el plan d’inversiones, y supon una medría considerable sobro’l contratu programa vixente anguaño.
En grandes cifres, l’alcuerdu parte d’un aumentu pa 2023 de casi 12 millones que se van incluyir nel presupuestu, lo que supon un 8% de medría. En númberos redondos, el conveniu del presente exerciciu destina 150 millones–incluyida la compensación pola conxelación de les matrícules- al financiamientu básicu de la Universidá d’Uviéu. Esta partida va alzar a casi 162 millones pal próximu añu.
En total, el Principáu va apurrir a la Universidá 1.047.854.511 euros nos próximos seis años pa financiamientu ordinariu, qu’inclúi gastos de personal, costu de titulaciones y compensación por tases, ente otros puntos; el plan d’inversiones y el financiamientu amestáu al cumplimientu d’oxetivos.
Ello ye que el financiamientu por resultancies va recibir xuna inyección de daqué más de 600.000 euros, pasando de los 2,5 millones d’anguaño a los 3,1 del próximu, cantidá venceyada al cumplimientu de 25 indicadores
de meyora, fundamentalmente en docencia, investigación, internacionalización, tresferencia de conocencia ya igualdá.
Esti alcuerdu constitúi la mayor medría de financiamientu pa la Universidá d’Uviéu. A les cifres recoyíes nel conveniu hai qu’añedir les aportaciones que la institución académica recibe del Gobiernu d’Asturies por otros conceutos, como les ayudes del Programa Severu Ochoa, beques pal estudiu, o convocatories amestaes a la retención y atracción de talentu o pa grupos d’investigación.
El conseyeru de Ciencia calificó l’alcuerdu de “finxu nel financiamientu universitariu asturiana y un exemplu pal sistema universitariu español”. Borja Sánchez fixo fincapié non solo nel aumentu financieru que s’afita, sinón tamién na duración: “La Universidá tien un horizonte de diez años d’estabilidá financiera pa desenvolver los sos planes estratéxicos, al marxe de llexislatures polítiques y mandatos rectorales”.
Pela so parte, el rector, Ignacio Villaverde, destacó la importancia de cuntar con un contratu programa qu’ufierta a la institución xuna estabilidá presupuestaria como nunca antes tuvo» y valoró bien positivamente la medría pa 2023 d’un 8%. «El conveniu pasa de los 150 millones nel añu 2022 a casi 162 en 2023″, señaló. “La crecedera consolídase añu tres d’añu hasta llegar a una proyección de 187,7 millones en 2028», añedió.
