PSOE ya IX nun descarten gobernar xuntos en Xixón

Ana González y Aurelio Martín emplácense a buscar el "máximu alcuerdu y un proyectu común"

0
633
PSOE ya IX nun descarten gobernar xuntos en Xixón
PSOE ya IX nun descarten gobernar xuntos en Xixón. / IX

Plena sintonía ente PSOE ya IX. Dambes formaciones aconceyaron esti miércoles pela tarde na Casa del Pueblu de Xixón. Ana González y Aurelio Martín acordaron siguir averando postures ensin descartar la posibilidá d’un gobiernu conxuntu. La candidata de los socialistes a l’Alcaldía destacó la plena sintonía esistente ente dambes formaciones. Sintonía en redol al diagnósticu tres los ocho años de gobiernu de Foru y nel «oxetivu común de sacar a la ciudá del aprovecimientu na que ta somorguiada». González fizo estes declaraciones, xuntu al conceyal electu d’IX, Aurelio Martín, tres la xunta caltenida por dambes fuerces polítiques. Señaló qu’esta sintonía «emplázanos a siguir afondando p’algamar el máximu alcuerdu y un proyectu común».

La candidata socialista remarcó que «los trabayos importantes nun pueden retrasase». Nesi sen, anunció que’l próximu martes volverán axuntase cola coalición formada por IX ya IAS pa siguir «un trabayu conxuntu». Coles mesmes señaló que les decisiones que se tomen van basase nun proyectu que «saque a Xixón de la situación na que s’atopa», magar reconoció que la hestoria de cooperación ente’l PSOE ya IX «ta ende y forma parte de la nuesa forma d’actuar», apuntó. D’últimes incidió en que, una vegada que se punxeron sobro la mesa los problemes qu’hai en Xixón, tenemos d’estudiar cómo llevar a cabu un proyectu que nos dexe solucionalos, remató.

Ana González nun necesita sofitos pa ser investida alcaldesa. Too parez apuntar a que va cuntar col votu del únicu conceyal d’IX. Pel momentu, desconózse cuál va ser la postura de Podemos-Equo. Nun conceyu celebráu la selmana pasada, la formación morada confirmó la so intención de nun presentar candidatu y abstenese nel Plenu. Una decisión que tien que ser ratificada esta selmana n’asamblea.