Xixón al día

Etiqueta: Aurelio Martín

  • Xixón recuperó esta selmana un 76% del tráficu

    Xixón recuperó esta selmana un 76% del tráficu

    Xixon va siguir adaptándose a la nueva normalidá apostando por dar más espaciu a pasiantes y bicicletes. Asina lo defendió esta mañana el conceyal de Movilidá y Mediu Ambiente, Aurelio Martín, nuna entrevista n’Onda Cero. L’edil aseguró que la ciudá recuperó esta selmana’l 76% del tráficu y adelantó que l’equipu de Gobiernu va presentar nos vinientes díes un plan de peatonalización que va llegar «a tolos barrios».

    El conceyal valoró los resultaos de la peatonalización provisional d’un carril n’El Muro. Martín reonoció qu’esta ye una zona «mui simbólica» de la ciudá, pero mostróse satisfechu porque «ta viéndose’l resultáu». Nesti sentíu, l’edil adelantó que’l pieslle al tráficu rodáu d’un carril ente la rotonda del Piles y El Naútico va ampliase «polo menos hasta setiembre». Tamién se van caltener los ciclo-carriles como’l qu’entró en funcionamientu nel carril izquierdu de l’avenida de la Costa. «Queremos que la bicicleta nun seya namás un elementu d’ociu, sinón tamién de tresporte». Martín insistió na necesidá de «dar seguridá» a los ciclistes y destacó qu’hai proyectaos 29 d’estes víes compartíes por coches y bicicletes proyectaos en tola ciudá. «Entamemos pol más conflictivu pa ver cómo evoluciona la situación pa ver cuál ye’l comportamientu del ciclocarril y del tráficu».

    El conceyal refirióse a los trabayos de peatonalización de Claudio Alvargonzález. «Ye un ensanchamientu de lo más natural y urxente que vamos completar esti mes». La peatonalización d’esta cai, que se va caltener tol branu, pretende ampliar l’espaciu de paséu y permitir la instalación de terraces na zona d’aparcamientos. Esi fechu provocó la protesta de los vecinos, que refuguen que s’esanicien 69 places. Martín aseguró que tan sintiendo les sos reivindicaciones. «Ficimos yá una modificación de la nuestra propuesta y agora tamos trabayando n’otra».

    Les peatonalizaciones van siguir. Aurelio Martín adelantó que la so conceyalía ta trabayando nun plan que va ser presentáu nos vinientes díes. «Tenemos d’algamar una ciudá más amigable y vamos facelo en sintonía colos vecinos».

  • Xixón participa nel congresu mundial de ciudaes sostenibles ya intelixentes de la ONU

    Xixón participa nel congresu mundial de ciudaes sostenibles ya intelixentes de la ONU

    Xixón participa nel congresu mundial de ciudaes sostenibles ya intelixentes de la ONU que se celebra en Barcelona. Nesti foru s’enceta la creación de polítiques que respuendan a los oxetivos de desenvolvimientu sostenible. Nuna mesa redonda, el conceyal de Mediu Ambiente, Aurelio Martín, compartió proyectos sostenibles pa la xestión de ciudaes al pie de Bucarest, Viena y la localidá noruega de Aelesund. Nesti sentíu, Martín presentó’l nuevu modelu del allumáu públicu y de los equipamientos municipales y l’usu intensivu de les nueves tecnoloxíes p’ameyorar la eficiencia amenorgando emisiones.

    El Conceyu demuestra, asina, el so firme compromisu d’incorporar l’Axenda 2030 pal Desenvolvimientu Sostenible de Naciones Xuníes nes sos polítiques públiques. ‘’Colos proyectos nos que se ta trabayando, reforzamos el papel de les polítiques públiques pa la consecución de los oxetivos de desenvolvimientu sostenible, liderando dende’l conceyu los procesos de collaboración públicu, privada y social’’ señaló Martín. Xixón tien otres 14 actuaciones a les que se van dir sumando más nos próximos años pa responder, dafechu, a los retos de l’Axenda 2030 y los Oxetivos de Desenvolvimientu Sostenible.

  • La zona de Les Mestes a San Llorienzo, con mayor presencia d’agües fecales

    La zona de Les Mestes a San Llorienzo, con mayor presencia d’agües fecales

    El conceyal de Mediu Ambiente, Aurelio Martín, señaló que les agües del Piles, dende Les Mestes hasta la sablera de San Llorienzo, son de peor calidá que la zona entendida dende’l complexu deportivu municipal escontra riba. Asina lo manifestó esti miércoles nuna rueda de prensa xunto col director xeneral de Mediu Ambiente, Cosme García. N’ella, presentaron la resultancia de los últimos analises realizaos por Empresa Municipal d’Agües (EMA) n’ocho puntos del ríu Piles, ente’l 24 de setiembre y el 3 d’ochobre.

    El conceyal reconoció que, magar les resultancies llograes nestes analítiques son meyores, «la presencia de bacteries fecales sigue percima de los valores tomaos como referencia”. El mayor problema, indicó, ta concentráu nes agües de transición, esto ye, aquelles que van dende’l complexu de Les Mestes hacia la sablera. Nes agües continentales, que son les que tán más alloñaes de la desaguada, la presencia de fecales amenórgase.

    Los problemes identificaos nel Piles y sobro los que se trabaya son, per una parte, la presencia de bacteries fecales na agua, derivada d’alivios de la rede de saneamientu y posibles arramaos, y por otru, la proliferación d’un determináu tipu d’alga. Nesti sentíu, la EMA trabaya sobro’l so propiu plan d’actuación pa determinar si ta habiendo arramaos y cuál ye la so procedencia. El Conceyu va axudicar a finales de la próxima selmana l’estudiu hidrobiolóxico sobro les algues que se concentren nel ríu.

  • Aurelio Martín asumirá Movilidá y Mediu Ambiente

    Aurelio Martín asumirá Movilidá y Mediu Ambiente

    Aurelio Martín va asumir les competencies de Movilidá y Mediu Ambiente. El representante de Xixón por la izquierda va asumir esta nueva conceyalía dempués d’algamar un alcuerdu de gobiernu col PSOE. L’alcuerdu tien de ser ratificáu’l 26 de xunetu en votación presencial n’agrupación llocal d’Izquierda Xunida.

    El documentu alcordáu contempla que l’edil de la coalición formada por Izquierda Xunda ya IAS asuma la responsabilidá en materia de preservación del mediu ambiente, urbanu y rural, protección de la naturaleza y recuperación de la zona costera. D’esta manera, Martín responsabilizaráse de la finalización del Plan de Xestión de Borrafes del conceyu. L’edil tamién va asumir les cuestiones venceyaes a la planificación y la xestión de la movilidá. Amás, incorporaráse como vicepresidente d’Emtusa y la Empresa Mista de Tráficu y presidente del Centru de Tresportes.

  • L’asamblea d’IX afita’l ‘sí’ a la investidura d’Ana González

    L’asamblea d’IX afita’l ‘sí’ a la investidura d’Ana González

    L’asamblea d’Izquierda Xunida (IX) afitó na tarde del xueves el sí de la coalición a la investidura d’Ana González. El conceyu, que cuntó cola presencia de 97 persones acreditaes, sofitó por unanimidá la propuesta. D’esta manera, Aurelio Martín, l’únicu conceyal col que va cuntar la formación na Casa Conceyu, va apoyar la candidatura de la socialista Ana González a la investidura.

    La sintonía ye plena ente dambes fuercies. Esta selmana, PSOE ya IX ficieron públicu un manifiestu conxuntu nel qu’amosaben el so compromisu de trabayar pa concretar un programa de gobiernu conxuntu depués del Plenu del sábadu. Ana González valoró la decisión de la coalición y destacó’l compromisu de les dos fuerces polítiques pa «activar Xixón» nel mandatu que ta a piques d’entamar.  «Van ser cuatro años de capital importancia pola cantidá de problemes qu’hai que resolver», asegura la candidata socialista.

    La candidata socialista nun va algamar, salvo sorpresa d’última hora, la mayoría absoluta nel Plenu d’investidura. El sí afitáu pola asamblea d’IX nun-y da a Ana González los votos suficientes pa salir escoyida en primer votación. La socialista nun va cuntar col sofitu de les tres conceyales de Podemos-Equo. La coalición anunció esta selmana la so decisión d’astense. La candidatura lliderada por Yolanda Huergo plantegó al PSOE un decálogu de midíes sobre les que trabayar, pero «los socialistes respondieron postponiendo les conversaciones».

  • PSOE ya IX van alcordar un programa de gobiernu conxuntu

    PSOE ya IX van alcordar un programa de gobiernu conxuntu

    Izquierda Xunida (IX) va votar a favor de la investidura de la candidata del PSOE. Dambes formaciones van trabayar pa concretar un programa de gobiernu conxuntu depués del Plenu del sábadu. Ana González valoró la decisión de la coalición y destacó’l compromisu de les dos fuerces polítiques pa «activar Xixón» nel mandatu que ta a piques d’entamar.  «Van ser cuatro años de capital importancia pola cantidá de problemes qu’hai que resolver», asegura la candidata socialista. «Hai muchos proyectos qu’impulsar tres los ocho años de paralises de Foru».

    González insitió en que les midíes que se van acometer tendrán de ser frutu d’un alderique sele y fondo, pero sobremanera, d’un trabayu responsable que va empezar el sábadu. Sicasí señaló que l’equipu de gobiernu va trabayar «dende la izquierda» siendo «conscientes de qu’hai cuestiones que van riquir d’un ampliu consensu«. Fizo referencia al plan de víes, proyectu sobre’l qu’aseguró que «intentaráse sumar a tolos grupos políticos».

    Ana González destaca que l’equipu de gobiernu va trabayar «dende la izquierda»

    Respectu al decálogu presentáu por Podemos-Equo y a la posibilidá d’aceptalo de cara a cuntar col votu de los moraos nel plenu del sábadu, González reconoció que prefier dexar les coses fluyir. «Nun ye necesariu un trabayu pocu fondu y pocu seriu col únicu oxetivu de paecer que cuentu con más sofitos de los que tengo», dixo. Nesti sentíu reivindicó la necesidá d’empezar un trabayu de fondura que defina claramente’l presente, pal futuru de Xixón. «El presente nun ye’l 15, empieza’l 16», señaló.

    Ana González emplazó a Podemos a aconceyar na primer selmana de xunetu. Esta posición  llevó a les tres conceyales de la formación morada a tomar la decisión d’astenese nel Plenu d’investidura. Yolanda Huergo, vocera de la coalición, aseguró que «gustáranos concretar los asuntos nos que tamos d’alcuerdu» enantes de la votación.

  • El PSOE barre en Xixón y recupera l’Alcaldia

    El PSOE barre en Xixón y recupera l’Alcaldia

    Folixa na Casa’l Pueblu de Xixón. El PSOE barrió esti domingu nes elecciones municipales y llogró una bultable victoria al sumar once conceyales. La candidatura d’Ana González llogró’l sofitu de 46.465 xixoneses, 11.360 papeletes más que va cuatro años, lo qu-y abre dafechu les puertes de l’Alcadía. La socialista amosóse satisfecha tres conocer el resultáu del escrutiniu. «Siéntome yá alcaldesa».

    El PSOE tendralo fácil pa llograr l’Alcaldía. Ana González va poder ser alcaldesa de la ciudá en solitariu. La suma de les cuatro fuercies de la derecha ye de doce conceyales, una cifra que nun algama la mayoría absoluta (14). La Llei de Réximen Electoral Xeneral establez qu’en casu de nun algamáse mayoría, l’alcaldía ye pal candidatu de la llista más votada. Y nesi casu, Ana González ye la clara ganadora.

    Pactos

    Lo que sí va necesitar la candidata socialista son pactos pa sacar alantre les sos midides. La   próxima alcaldesa de la ciudá va poder buscar la complicidá de Podemos-Equo. La coalición que llidera Yolanda Huergo queda con la metá de los conceyales que tenía Xixón Sí Puede. Dexa pel camín 13.742 votantes, pasa del 21,10% del votu al 11,87% y queda con tres representantes nel Plenu, suficientes pa sumar la mayoría col PSOE. La candidatura Xixón por la Izquierda, d’IX y IAS, tamién vio amenorgada la so representación na Casa Conceyu, al pasar de dos a un conceyal y 3.109 papeletes menos.

    Ún de los grandes trunfadores de la nueche foi Ciudadanos. La candidatura de José Carlos Fernández Sarasola sumó 10.103 votos y tres conceyales, convirtiéndose na segunda fuercia política de la ciudá. Foru pasa a la tercer posición con tres representantes. La candidatura d’Álvaro Muñiz pierde más de la metá de la representación que llograra Carmen Moriyón en 2015. El PP d’Alberto López-Asenjo caltuvo los tres conceyales colos que ya cuntaba. Bon resultáu pa Vox, qu’entra con dos conceyales. Eladio de la Concha atropó 9.517 votos, un 7,01%.

  • Aurelio Martín: «Esta vez sí, va haber gobiernu d’izquierdes»

    Aurelio Martín: «Esta vez sí, va haber gobiernu d’izquierdes»

    Deceición na coalición Xixón por la Izquierda. La candidatura formada por Izquierda Xunida y Izquierda Asturiana nun llogró meyorar el resultáu de va cuatro años. La candidatura encabezada por Aurelio Martín quedó a les puertes de caltener el segundu conceyal. «Nun ye un bon resultáu pa nós. Peleamos hasta l’últimu minuto pol segundu conceyal, pero nun pudo ser. Perdimos tamién dos puntos porcentuales. Nun ye lo qu’esperábemos».

    Lo que sí quixo facer esti llunes foi felicitar la candidata del PSOE, Ana González, que meyoró’l resultáu del partíu hasta los once conceyales y va ser la próxima alcaldesa de la ciudá. «Esta vez sí, Xixón va tener un gobiernu d’izquierdes», dixo. Mostróse confiáu en «construyir una ciudá dende esos parámetros». Martín nun quixo entrar en más valoraciones: «Tiempu habrá pa reflexionar d’otres coses nos prósimos díes».

  • En directo: la participación baxa tres puntos en Xixón

    En directo: la participación baxa tres puntos en Xixón

    🕗 20.01 | Pisellen los colexos electorales, entama’l recuentu.

    🕗 18.22 | La participación a les 18 hores en  ye del 47,34%, tres puntos más baxa que va cuatro años (50,28%).

    🕗 14.03 | Primeros datos de participación n’Asturies. Hasta les 14 hores votó’l 32,86%, casi un puntu menos que va dos años (33,66%). Na circunscripción central pasóse del 33,82% de 2015 al 31,53%. Tamién baxa la participación nes elecciones municipales: del 33,71% al 32,79%. Nel casu de Xixón la baxada ye del 34,53% al 32,97%.

    🕗 13.40 | Na Escuela de Maxisteriu d’Uviéu votó’l candidatu de Ciudadanos a la presidencia del Principáu, Juan Vázquez.

    🕗 13.06 | Pablo Casado votó en Madrid agradeciendo’l trabayu d’apoderaos ya interventores del PP.

    🕗 12.50 | «Oxalá la participación sía bien alta. Siempres ye importante que la xente movilícese votando en conciencia», dixo Pablo Iglesias, secretariu xeneral de Podemos, depués de votar.

    🕗 12.30 | Yá votó tamién Aurelio Martín, candidatu  l’Alcaldía de Xixón por la Izquierda. Fízolo nel IES Emilio Alarcos.

    🕗 12.10 | Albert Rivera, de Ciudadanos, votó en Madrid «pola llibertá, la igualdá y la dignidá».

    🕗 11.50 | Depués de votar, Adrián Barbón animó a la ciudadanía a votar porque «del votu depende too». El candidatu de la FSA-PSOE aseguró nun tar nerviosu y dixo tener la esperanza d’un futuru pa «la meyor Asturies».

    🕗 11.34 | La candidata de Foru Asturies a la presidencia del Principáu votó nel Palaciu de Deportes de Xixón. «Hoy tienen que hablar los asturianos y asturianas», declaró Carmen Moriyón depués votar.

    🕗 11.07 | Pela so parte, Ana González, votó nel Antiguu Institutu. La candidata del PSOE a l’Alcaldía de la ciudá animó a los xixoneses a dir a votar: «Tenemos que pensar en qué modelu de ciudá queremos».

    🕗 11.05 | El candidatu de Foru Asturies a l’Alcaldía votó nel pabellón de deportes de L’Arena.

    🕗 10.44 | Tamién votó, nel Nicanor Piñole, el candidatu de Por Gijón, David Alonso.

    🕗 10.35 | El presidente del Gobiernu saliente, Javier Fernández, yá votó nel colexu Río Piles.

    Yolanda Huergo votó pasaes les diez de la mañana nun colexu de Laviada. / Podemos
    Yolanda Huergo votó pasaes les diez de la mañana nun colexu de Laviada. / Podemos

    🕗 10.15 | La candidata de la coalición Podemos-Equo a l’Alcaldía de Xixón, Yolanda Huergo, votó pasaes les diez de la mañana nel colexu públicu de Laviada.

    🕗 10.10 | José Carlos Fernández Sarasola, candidatu de Ciudadanos a l’Alcaldía, foi’l primeru en votar. Fízolo nel colexu de Begoña.

    Pedro Sánchez vota nes elecciones municipales y autonómiques d'esti domingu 26-M.
    Pedro Sánchez votó nun colexu de Pozuelo de Alarcón (Madrid). / PSOE

    🕗 10.00 | El presidente del Gobiernu central en funciones, Pedro Sánchez, foi’l primer llíder nacional n’exercer el so derechu al votu. Fízolo acompañáu de la so pareya, Begoña Gómez, en Pozuelo de Alarcón (Madrid).

    🕗 9.05 | Normalidá n’apertura de los colexos electorales n’Asturies.

    🕗 8.02 | Los colexos electorales van permanecer abiertos hasta les ocho de la tarde. A esa hora va empezar l’escrutiniu. Dada la coincidencia de trés procesos electorales, l’orde en que se va llevar a cabu’l recuentu va ser el siguiente: comicios al Parlamentu Européu, municipales y autonómicos. Los resultaos provisionales van poder consultase na web www.resultadoselecciones2019.asturias.es y a través de la app oficial d’estos comicios.

    🕗 8.00 | 973.736 asturianos tan llamaos a votar nesta triple cita electoral (municipales, autonómiques y europees). Asturies cunta con 615 locales electorales distribuyíos nos 78 conceyos, onde tan instalaes 1.573 meses.

  • Martín «IX va ser ganantía d’un nuevu modelu cultural»

    Martín «IX va ser ganantía d’un nuevu modelu cultural»

    «Un gobiernu municipal con una fuerte presencia d’Izquierda Xunida-IAS va ser la garantía d’un nuevu modelu cultural». Asina lo afirmó Aurelio Martín nun alcuentru calteníu esti xueves con persones venceyaes al mundu de la cultura. El candidatu a l’Alcaldía de Xixón por Xixón por la Izquierda, tamién espresó’l so prestu pola importante presencia de persones de la cultura na candidatura qu’encabeza. «Representa la meyor amuesa de la importancia que pretende dase a les polítiques culturales». Y añadió qu’esa apuesta tien de tar centrada en fomentar la creación, el consumu y l’espardimientu cultural«. Nel conceyu tuvo acompañáu, ente otros, polos miembros de la candidatura Ana Castaño y Carlos González Espina.

    «La política cultural fue una de les grandes escaecíes pol gobiernu de Foru nos últimos años y eso tien que camudar a partir del 26 de mayu», aseguró Ana Castaño. La candidata númberu dos de la llista municipal plantegó la necesidá d’ellaborar un Plan Estratéxicu de Cultura. Tamién esbilló otres propuestes baltes como convertir l’edificiu de Tabacalera nel Muséu de Xixón qu’allugue les colecciones municipales de Belles Artes y tresformalo nun elementu dinamizador que desenvuelva la singularidá de Cimavilla. Amás, defendió potenciar la creación artística por aciu una política de beques y premios, establecer un circuitu municipal d’artes escéniques y música y potenciar l’Edificiu Cristasa como un viveru empresarial dedicáu a les industries creativu y cultural.