Más de 300 persones visiten la Xunta nel primer día de puertes abiertes

Esta iniciativa, que quier dar a conocer la sede del Parlamentu asturianu, va enllargase hasta'l próximu 11 d'agostu

0
77
Más de 300 persones visiten la Xunta nel primer día de puertes abiertes
Dellos visitantes na sala Constitución. / Xunta Xeneral

Un total de 339 persones visitaron ayeri la Xunta Xeneral nel primer día de les xornaes de puertes abiertes. Esta iniciativa, que quier dar a conocer la sede del Parlamentu asturianu, va enllargase hasta’l próximu 11 d’agostu. Los visitantes qu’ayeri s’averaron a conocer la sede de la Cámara autonómica tuvieron ocasión de visitar delles de les dependencies más reconocibles de la Xunta. Asina, el públicu interesáu pudo conocer la sala Constitución (l’antiguu salón de plenos), la sala Europa (nomada asina dende 1997, añu en que se celebró nesta dependencia la primer xunta de la Conferencia d’Asamblees Lexislatives Rexonales d’Europa), la sala Argüelles (llugar de xunta de la Mesa de la Cámara y de la Xunta de Voceres), l’Hemiciclu y el despachu del presidente de la Cámara.

Nes xornaes de puertes abiertes tamién puede vese una esposición ‘La Midida del Tiempu’

Nes xornaes de puertes abiertes tamién puede vese una esposición ‘La Midida del Tiempu’. Esta colección axunta los relós del Palaciu de la Xunta Xeneral. Na esposición, allugada na sala Europa, los visitantes van poder ver, ente les pieces espuestes, dos bien valibles atribuyíes a la firma de la familia Miyar de Corao.

N’horariu mañaneru de 10:30 a 14:00 hores y, pela tarde, ente les 16:30 a 19:00 hores les persones qu’amosaron el so interés en visitar la Xunta pudieron faelo por aciu dos fórmules. Per un llau, en visites acompañaes y en grupos de non más de 30 persones. Un total de 240 persones realizaron esti martes la visita acompañaos por una azafata. Los grupos salíen cada media hora: 10:45, 11:15, 11:45, 12:15, 12:45, 13:15 y 13:45, 16:45, 17:15, 17:45, 18:15, 18:45 hores. Per otra parte, nes visites guiaes, un total de 99 visitantes pudieron conocer en detalle los distintos espacios del palaciu de la cai Fruela. Estes visites tuvieron llugar cada hora: 11:00, 12:00, 13:00, 17:00 y 18:00 hores.