Asturies entama a trabayar nos planes d’adaptación al cambéu climáticu de los puertos asturianos. La Conseyería d’Infraestructures firmó esti miércoles un conveniu de collaboración cola Fundación Institutu d’Hidráulica Ambiental de Cantabria pa ellaborar los proyectos d’adecuación de los terrenos de dominiu públicu marítimo-terrestre adscritos al Principáu.
Esti proyectu tien un costu de 511.000 euros y un plazu d’execución de 14 meses
Esti proyectu tien un costu de 511.000 euros y un plazu d’execución de 14 meses. El Ministeriu pa la Transición Ecolóxica collabora con 151.395 euros na so redacción. L’Alministración autonómica va apurrir información sobre les operaciones, l’actividá económica y los daños históricos asociaos a cada puertu. Pela so parte, la fundación cántabra va analizar los riesgos del cambéu climáticu nestes infraestructures. Amás, va proponer midíes d’actuación y va encargase de redactar el plan autonómicu d’adaptación.
En concreto, va realizase un análisis multinivel de los riesgos del cambéu climáticu nos puertos énte escenarios estremaos. Van proponese midíes naquellos que seya menester y va ellaborase un plan autonómicu d’adaptación, que va incluyir una evaluación de la rellación ente’l costu y la eficacia de les midíes.
Estudios pioneros
Estos trabayos dan continuidá a una partida d’estudios pioneros sobre les evidencies y los efectos potenciales del cambéu climáticu n’Asturies qu’empezaron nel 2009. Nel 2013 firmóse un conveniu col Ministeriu de Mediu Ambiente pa evaluar la vulnerabilidá de la costa asturiana basáu nuna metodoloxía específica novedosa. Esi estudiu pilotu, llamáu abreviadamente C3E-Asturies, foi concebíu como continuación y aplicación d’otru más ampliu que valió de base pa la redacción de la Estratexa Española d’Adaptación al Cambéu Climáticu de 2017.
