Rambal ye hestoria de la ciudá de Xixón. Sicasí, l’iconu de Cimavilla mientres el pasáu sieglu XX nun tenía nenguna reconocencia nel barriu playu onde desenvolvió tola so vida. Hasta agora, porque Alberto Alonso Blanco va tener, dende’l 22 d’abril, una estatua n’alcordanza na plaza onde s’asitiaba la so vivienda.
L’actu d’inauguración va ser una celebración de la vida, de Rambal y de la llibertá sexual que defendía. L’axitador folclóricu Rodrigo Cuevas va tar presente y, amás, va haber pasucais con charangues, cabezudos y decoración per tol barriu.
