El conceyal del Grupu Municipal Socialista, Ramón Tuero, alvirtió esta mañana en rueda de prensa la necesidá d’entamar una reforma integral y una modernización fonda n’El Molinón y acusó al Gobiernu municipal d’anunciar actuaciones ensin proyectu, nin planificación, nin financiación tres el nuevu anunciu de reparación de les cubiertes. “Naide sabe realmente qué se va facer. ¿Onde ta’l proyectu? ¿Qué fases contempla? ¿Cuál ye’l presupuestu? Cuesta entender que s’anuncien inversiones ensin que esista un plan detalláu. Esta ye la forma d’actuar de Foro a la que yá nos tien acostumaos, anuncios y más anuncios ensin ver nada materializao”, critica.
Tuero califica de “parche” la intención de reforma de les cubiertes y dulda que puedan entamar les obres esti añu. Recordó, nesi sentíu, que’l Mundial 2030 foi una oportunidá perdida pa llograr financiación y entamar los trabayos necesarios nel estadiu. “Renunciar a ser sede del Mundial 2030 supunxo perder una vía de financiación clave con fondos públicos pa facer una actuación completa”, llamenta.
Tal y como alvirtió’l conceyal socialista, esto resuende a años d’anuncios contradictorios alrodiu del futuru del estadiu, pasando de plantegar inversiones millonaries venceyaes o non al Mundial —20 millones d’euros en 2024 y 75 millones en 2025—, a presentar agora una actuación parcial centrada na sustitución de cubiertes por 2 millones d’euros. “Ye una falta de coherencia institucional que refuerza la improvisación cola que se manexa esti gobiernu municipal. Esta socesión de parches acabará siendo más cara y supón un riesgu pa qu’El Molinón non solo seya’l estadiu más antiguu del fútbol profesional sinón tamién el más vieyu y obsoletu”, señaló.
A lo último, Tuero pidió que se firme de momentu’l Manual d’usu y plan de caltenimientu d’El Molinón que se tuvo trabayando nel mandatu pasáu xunto colos dos concesionarios pa que caún sepa qué, cómo y cuándo actuar nel estadiu, una ferramienta básica pa garantizar la correcta conservación d’una instalación clave pa Xixón.
