La Conseyería de Mediu Rural y Política Agraria dio por rematada la campaña 2026 d’estracción d’oriciu con un balance mui positivu. Mientres los doce díes hábiles d’actividá capturáronse 16.474 quilos nos trés sectores establecíos, a los que se sumen 788 quilos procedentes del nuevu ensayu esperimental nel oriente asturianu, lo que eleva’l total a 17.262 quilos.
La participación del sector foi elevada en tolos ámbitos, con un esfuerciu equilibráu y rendimientos especialmente altos nos sectores I (dende la ría del Eo hasta’l ríu Barayu) y II (dende’l ríu Barayu hasta la ría del Nalón). Pela so parte, el sector III (dende la ría del Nalón hasta la desembocadura del ríu Espasa) rexistró un rendimientu más moderáu, acordies cola so mayor sensibilidá biolóxica.
El preciu mediu algamáu en primer venta, de 15,75 euros por quilu, asitia la rentabilidá total de la campaña en 271.876 euros, un resultáu especialmente relevante pa un recursu que tradicionalmente nun fuera consideráu profesional.
Como principal novedá, la campaña incorporó una zona esperimental d’estraición nel oriente, llendada a los pedreros de Vega–Punta Carreros y Vidiagu. Esta actividá desenvolvióse baxo un estrictu sistema de control basáu na xeolocalización per GPS, muestreos diarios y rexistru individualizáu de captures. Los 788 quilos obteníos abren la posibilidá de consolidar esta área como un cuartu sector d’esplotación en futures campañes.
Asturies dispón anguaño d’una rede de planes de xestión y esplotación estendida a tol so llitoral, sustentada nun modelu de gobernanza participativa qu’integra a l’Alministración, les cofradíes, el sector pesqueru y la comunidá científica. Esti modelu permite la xestión sostenible de recursos como’l pulpu, l’angula, l’ocale, el percebe o’l propiu oriciu.
Pa un sector mayoritariamente artesanal, estos planes constitúin la base económica que sostién l’actividá, amás de representar una vía de progresión escontra pesqueríes de mayor eslora, favoreciendo’l relevu xeneracional y la incorporación de mozos al oficiu.
La Dirección Xeneral de Pesca Marítima destaca que la campaña 2026 del oriciu refuerza la viabilidá del modelu de xestión controlada, confirma la implicación del sector profesional y pon en valor el sistema de planes d’esplotación como ferramienta clave pa garantizar la sostenibilidá y la rentabilidá del llitoral asturianu. Los resultaos algamaos van sirvir como base pal diseñu del plan de xestión de 2027.
