Efectivos de Grupu de Rescate de Bomberos d’Asturies, per tierra, en collaboración col GREIM (Grupu de Rescate Especial d’Intervención de Monte) de la Guardia Civil rescataron a dos persones que se desorientaron ayeri tarde cuando realizaben la ruta de los Llagos de Cuadonga, en Cangues d’Onís.
Los dos afectaos, una muyer de 47 y un varón de 37, taben nun abellugu allugáu antes del Mirador de Ordiales, na llende col conceyu d’Amieva.
El Centru de Coordinación d’Emerxencies del 112 Asturies recibió l’avisu a les 19.11 hores d’ayeri miércoles. Fueron los mesmos afectaos los que llamaron al serviciu d’emerxencies. Indicaron que se perdieren faciendo la ruta. Taben nun albelugu. Atopábense bien. Teníen daqué de comida, agua y ropa d’abrigu.
La Sala 112 del SEPA pasó l’avisu al Grupu de Rescate que, dada la hora y la meteoroloxía, decidió dir per tierra, con dos efectivos al llugar. Tamién se comunicó lo asocedío a la Guardia Civil qu’a les 19.56 hores comuniquen que van activar a dos axentes el GREIM pal llugar.
A les 22.57 hores el Grupu de Rescate de Bomberos del Asturies comunica que tán yá nel abellugu colos dos senderistes desnortiaos y los dos efectivos de la Guardia Civil. Van baxar toos xuntos caminando, unes dos hores aprosimao, escontra’l llugar onde tienen aparcaos los vehículos los rescatadores.
A la 01.31 hores l’equipu informa que los afectaos tán siendo treslladaos hasta l’aparcamientu de Los Llagos onde dexaren el so coche pol GREIM. Rematada la intervención tornen a base onde llegaron a les 02.59 hores d’esta madrugada. L’incidente, como marca’l protocolu, púnxose en conocencia de los 112 de Cantabria y Castiella y Llión.
