Trés senderistes fueron rescataos esta nueche al desorientase cuando realizaben una ruta de monte en dirección a Següencu, en Cangues d’Onís. Los trés afectaos, trés varones de 65, 68 y 73 años d’edá, fueron alcontraos en perfectu estáu a les 23.43 hores d’ayeri xueves. Los rescatadores acompañáronlos caminando hasta’l llugar onde dexaran aparcáu’l so vehículu y onde llegaron a la 01.20 hores de güei.
El Centru de Coordinación d’Emerxencies del 112 Asturies recibió l’avisu a les 18.10 hores d’ayeri xueves. Nella señalaben que yeren un grupu de trés persones que s’atopaben nuna pradería arrodiaos de carbes y que por cuenta de la borrina taben desnortiaos. Nel intre de la llamada señalen que llevantó la borrina que yá ven el camín y nun precisen nada.
A les 19.03 hores vuelven llamar señalando que tan toos bien y que se volvieron perder porque baxó la borrina. Unvien coordenaes d’allugamientu y pónse-yos en contactu col Grupu de Rescate que los indiquen que según información que facilitaron tán cerca del ríu les Mestes que baxa a Orandi y Cuadonga. Coles indicaciones realizaes señalen que nun s’atreven a siguir.
Nesi momentu movilízase per tierra al Grupu de Rescate. A les 21.00 hores informen que tán na carreterina de Següencu. Quéden-yos delles mayaes y hai poca cobertoria móvil polo que les comunicacioens pueden ser complicaes. A les 23.43 señalen qu’alcontraron a los senderistes y que van empecipiar el descensu con ellos. A les 01.20 hores déxenlos onde’l vehículu. L’incidente comunícase a la Guardia Civil y a los 112 de Cantabria y Castiella y Llión.
