El Grupu de Rescate del Serviciu d’Emerxencies del Principáu d’Asturies (SEPA), a bordu del helicópteru medicalizado de Bomberos d’Asturies, treslladó al HUCA a una muyer que se mancó mientres facía una ruta nel Picu Pienzu, en Colunga. L’afectada presentaba una posible rotura de tobillu esquierdu.
El Centru de Coordinación d’Emerxencies recibió l’avisu a les 13:11 hores. Na llamada esplicóse que yeren un grupu de monte, taben a unos metros de la cima del Pienzu, y una muyer mancárase. Nel momentu movilizóse al equipu de rescate, a bordu de l’aeronave medicalizada, y al Xefe de Zona Oriental y a efectivos de Bomberos del SEPA del parque de Cangues d’Onís.
La borrina torgó al helicópteru llegar a la zona, polo qu’aterrizó na mayada de Bustacu. Dende equí los efectivos de Cangues d’Onís y un bomberu-rescatador y el médicu-rescatador xubieron en touterrén hasta’l final de la pista. Dende esti puntu empecipiaron la caminada hasta’l Pienzu. Una vegada cola muyer mancada, presentaba una posible rotura de tobillu, el médicu suministró-y analxesia ya inmovilizó-y la estremidá afectada con una férula. De siguío empecipióse’l portéu, cola camiya, hasta’l vehículu. Dende equí treslladóse hasta l’helicópteru y una vegada a bordu, fízose’l so treslláu al HUCA.
