Andrey Rublev ye’l primer campeón del Xixón Open – ATP 250. El rusu alzó’l preciáu troféu de “Les Lletrones” en superando na final al estadounidense Sebastian Korda 6-2 6-3, ante abargana de 5.000 mil espectadores qu’enllenaron esti domingu’l Palaciu de Deportes La Guía. Pal rusu de 24 años ye’l so cuartu títulu de la temporada –el númberu 12 de la so carrera– en ganando enantes en Marsella, Dubái y Belgrado. Supon, amás, un pasu de xigante pa clasificase per tercer vegada consecutiva pa les Nitto ATP Finals. “Foi una de les mios meyores selmanes del añu”, aseguró Rublev, qu’esti llunes va recuperar un puestu nel ranking mundial xubiendo al Nº 8. El rusu caltiense invictu en finales xugaes so techu, en ganando los seis qu’apostó hasta la fecha.
El primer favoritu del cuadru tomó rápido la iniciativa nel lluminosu, anque tuvo que salvar una bola de break nel séptimu xuegu. El mesmu tenis sólidu qu’esibió mientres tola selmana dexó-y controlar el tempus del partíu ensin respigos. A pesar del marcador, el moscovita afirmó que: “Nun foi tan fácil. Tamién diba ganando contra Ivashka y Paul, y depués remontáronme. Siempres hai la posibilidá de perder y siempres ye difícil. Güei tamién lo foi. Pudi salvar los puntos de break que tuvo Sebastian, pero güei tuvi un pocu de suerte de que nun me pasara lo que me pasó nos partíos anteriores.”
Al otru llau de la rede, Sebastian Korda nun pudo sumar el so segundu títulu na que foi la tercera final de la so carrera. A pesar de la derrota, l’estadounidense de 22 años va xubir once puestos nel ranking esti llunes p’asitiase pronto de la so meyor posición personal nel Top-30 (Nº 36). “Allégrame ver que tol mio trabayu tien el so pagu, anque güei nun fuera’l mio día. Andrey xugó perbién, tien más esperiencia que yo nes finales, pero entá asina foi un bon partíu pa mi”, esplicó’l de Florida. El títulu de dobles foi pa los arxentinos Máximu González y Andrés en superando na final a los estadounidenses Nathaniel Lammons y Jacskon Withrow 6-7(6) 7-6(4) [10-5].
La final presencióla en directu una nutrida representación institucional encabezada pol Presidente del Principáu d’Asturies, Adrián Barbón; l’alcaldesa de Xixón, Ana González, el presidente del Conseyu Cimeru de Deportes, José Manuel Franco; la Delegada del Gobiernu nel Principáu d’Asturies Delia Llosa Carballido, ente otres autoridaes; el Presidente de la Real Federación Española de Tenis, Miguel Díaz; y el de l’Asturiana, Fernando Castaño. Acompañáronlos la Directora Xeneral de Deporte del Gobiernu del Principáu d’Asturies, Aida Nuño; el Conceyal de Promoción Económica, Empléu y Turismu de Xixón, Santos Tejón Llaneza; el Conceyal d’Actividá Física y Deporte de Xixón, José Ramón Tuero del Prado. La ceremonia d’entrega de trofeos cuntó cola participación de la Banda de Gaites Villa de Xixón, qu’interpretó l’himnu Asturies pa cerrar esta primer edición del Xixón Open – ATP 250.
