La quinta edición del concursu d’imitadores menores de 18 años Sácame Pola Pinta llega a la final. Esti domingu 30 de mayu a les 20h, el Nuevu Teatru de La Felguera va acoyer la gala na que van participar los 12 finalistes. Les entraes yá tán escosaes dende hai tiempu, pero’l públicu va poder siguir na web del eventu la retresmisión en streaming y incluso votar pola so imitación favorita, convirtiéndose asina nel quintu miembru del xuráu.

Los Berrones, Eva Tejedor, Marisa Valle Roso, L-R, Grupo Beatriz, Rodrigo Cuevas, Víctor Manuel, Melendi, Warcry, Alexandra in Grey, Alberto & García y Mina Longo, son los distintos artistes que van ser imitaos nesta gala final por rapacinos y rapacines d’ente 7 y 16 años. Una escoyeta que reflexa perbién la diversidá de la música fecha n’Asturies y que promociona con xeitu esta escena, dándola más a conocer ante un públicu de toles edaes.

El V Sácame Pola Pinta nun ye ayenu a la crisis de la COVID-19 y por esta razón reinventa’l so formatu p’adaptase a la pandemia. D’esta manera, amás de la retresmisión online de la gala final y de permitir al públicu votar per Internet la so imitación favorita, la organización del eventu abre un formulariu na so web pa que tola xente que siga la final puea suscribise y entrar nel sortéu de dellos regalos ente los que s’inclúi una cena, aparatos tecnolóxicos o dellos xuegos de mesa.

Ésitu de les conexones en vivo

Otra de les novedaes d’esta edición son les conexones en vivo que Sácame Pola Pinta lleva faciendo na so cuenta d’Instagram dende’l pasáu 14 de mayu. Tolos díes a les 22h el presentador del eventu, Fernando Valle Roso, conecta en directo pa charrar con un artista imitáu, un miembru del xuráu, un collaborador del eventu, o una personalidá relevante de la cultura asturiana. Estos Instagram Live tán siendo tou un éxitu, axuntando a más de 1.000 persones delantre de la pantalla del teléfonu con cada conexón.