Tsunami Fest remató ayeri de la meyor de les maneres posible, col furacán que dexó ayeri Scorpions. El grupu alemán col so líder Klaus Meine amenazaba con arrasar Xixón y asina lo fixo mientres más d’una hora y media de conciertu.
Sicasí, la nueche rockera nun entamó con ellos. Rafa Kas facía los honores d’abrir l’escenariu VibraMahou nel últimu día de celebración de la sesta edición del Tsunami Xixón Festival. Facíalo puntual a les 19:20 hores y con un repás a dalgunos de los meyores temes de la hestoria del rock. Enantes del momentu estelar de la nueche, que nun yera otru que’l show de la veterana banda alemana, Phil Campbell & the Bastards Sons siguíen calentando motores con un públicu qu’esfrutó de los sos cantares.
Tres d’ello, llegara’l momentu. Unos minutos más tarde de les 21:45, Scorpions saltaba al escenariu VibraMahou col cantar Coming Home mientres el públicu españaba n’aplausos y glayíos. La banda de Klaus Meine, que facía parada en Xixón na so xira europea pa celebrar el 40 aniversariu del discu Love at First Sting, tocó casi tolos temes d’un discu que ye parte de la hestoria del rock y que contien cantares como Still Loving You o Rock you like a hurricane, colos que zarraron l’espectáculu en Xixón.Pero tampoco faltaron otros clásicos, como Wind of Change o Blackout.
Scorpions fixo hestoria del festival que cada branu dende fai seis ediciones pon la nota punk rockera a la villa. Y ye que dende 1997, Scorpions nun visitaba la ciudá. 26 años depués, volvieron p’amosar que’l rock entá sigue vivu.
