Xixón al día

Categoría: Sociedá

  • Xixón celebra un Antroxu dixital que «nun ye l’Antroxu»

    Xixón celebra un Antroxu dixital que «nun ye l’Antroxu»

    «Esto nun ye l’Antroxu de Xixón», asina reza’l cartelu del Antroxu xixonés nesti 2021. La crisis sanitaria de la COVID19 y les restricciones impuestes pola Conseyería de Salú del Gobiernu d’Asturies obligaron al Departamentu de Festexos del Conceyu de Xixón a reinventar la próxima edición d’esta Fiesta d’Interés Turísticu Rexonal”.

    Del 12 al 16 de febreru Xixón nun va vivir el so tradicional Antroxu, tal qu’asegura Alberto Ferrao, Conceyal d’Educación y Cultura: «El virus nun entiende de fiestes, nun estrema feches». Por ello, nun se va entamar dende Divertia nenguna actividá que suponga concentración de persones y d’esta manera suspende’l pregón, les actuaciones musicales, el pasucais y los concursos de mazcaritos y charangues. Coles mesmes, tampoco se va decorar, nin se va allumar el Paséu de Begoña.

    D’esta miente, l’Antroxu 2021 va treslladase al formatu dixital, magar que se va caltener la tradición d’antroxar la estatua de Pelayo (en fecha ensin determinar y n’horariu nocherniegu pa evitar presencia de públicu). Coles mesmes, tamién la Sardina va ser protagonista, pero va vivir el so particular Antroxu “enlatada” na so residencia xixonesa, dende onde va colgar videos na web de Festexos y dende onde va facer directos nos sos perfil de les sos redes sociales. Otru de los protagonistes, vía on-line, va ser Agustín, (Alberto Rodríguez), el conocíu presentador del Concursu de Charangues, que va ufiertar vídeos y conexones mesmo na web que nes sos redes sociales.

    El Departamentu de Festexos cunta de nuevu nesta edición, p’animar el Antroxu, cola collaboración de les charangues xixoneses, coles que caltuvo contactu nos últimos meses. Les charangues, qu’anguaño nun pudieron ensayar y nun pudieron axuntase al ser grupos numberosos, van arriquecer la web con vídeos d’actuaciones pasaes, videos nuevos y tamién con imáxenes de cómo viven l’Antroxu, cumpliendo les midíes y les restricciones sanitaries.

    Divertia tamién va abrir esi espaciu virtual mientres l’Antroxu a los y les xixoneses pa qu’unvien les sos fotografíes y se conecten nos directos ufiertaos pola Sardina nel so perfil d’Instagram.

    El cartelu d’esti Antroxu de 2021 reza “Esto nun ye’l Antroxu de Xixón”… Un cartelu, diseñáu por Divertia, (ensin el coloríu habitual, cola R al aviesu, con un Antroxu “pates arriba”) para recordar, como asegura Lara Martínez, xerente de Divertia, que «nun ye’l Antroxu que nos gustaría entamar, pero ye’l que toca… Tien de primar la seguranza y tenemos la responsabilidá de favorecer una convivencia que garantice la salú de la ciudadanía».

    En feches próximes van ufiertase más detalles sobre la programación de los vídeos y la participación de les charangues.

  • Morrió’l periodista y escritor Luis Arias Argüelles-Meres

    Morrió’l periodista y escritor Luis Arias Argüelles-Meres

    Luis Arias Argüelles-Meres morrió de forma prematura a los 63 años nel so Llaniu natal, en Salar. Él mesmu definíase nos sos perfiles de redes sociales como «un profesor qu’escribe, o un escritor que pon clases (lo que s’imparte son bendiciones)». El collaborador del diariu El Comercio, y enantes de La Nueva España, asoleyera’l so últimu artículu’l sábadu pasáu.

    Foi Premiu Asturies de la crítica na modalidá de columnismu lliterariu, de l’Asociación d’Escritores d’Asturies y yera profesor de llingua castellana y lliteratura nel IES “César Rodríguez” de Grau. Llogró’l doctoráu embaxo la dirección del profesor Fernández Insuela, sobre «Manuel Azaña y la Literatura: Crítica y Creación Literaria».

    A lo llargo de la so trayectoria demostró un sofitu a la llingua asturiana, la so llingua materna y na que’l so pá, Manuel Arias «Antón de la Braña», foi escritor nos años más duros del franquismu. Participó d’actividaes reivindicatives como manifestaciones o’l II Seminariu pola Oficialidá, el camín constitucional de futuru pal asturianu, qu’entamó la ONG Iniciativa pol Asturianu en 2019.

    Personalidaes de tolos ámbitos demostraron esta mañana’l so pesar pola perda personal ya intelectual que supón p’Asturies la muerte de Luis Arias Argüelles-Meres.

  • Divertia asoleya un programa con toles actividaes del Nadal 2020 en Xixón

    Divertia asoleya un programa con toles actividaes del Nadal 2020 en Xixón

    Xixón esfruta yá del so programa de Navidá. Música, teatru, cine, deportes, esposiciones en museos, mercaos, el Xardín Botánicu… Numberoses actividaes programaes pa tolos públicos, entamaes con midíes de seguridá.

    Divertia diseñó esti programa qu’axunta les propuestes de les distintes árees municipales, pero tamién les d’otres empreses ya instituciones. Convidámoste a repasalu y a afayar decenes d’opciones pal Nadal 2020.

    Descarga’l programa completu (cast)

  • Travel Pop Up: Los meyores ‘Youtubers’ de viaxes en Xixón

    Travel Pop Up: Los meyores ‘Youtubers’ de viaxes en Xixón

    • Va ser esti sábadu y domingu, 12 y 13 d’avientu, y nél van afayase los meyores youtubers ya influencers d’España y Llatinoamérica.
    • L’eventu va empobináu al públicu xeneral y creadores de conteníu que quieran inspirase nes histories de viaxeros de sonadía n’Instagram, Youtube y hasta TikTok.
    • Entraes: www.travelpopup.es

    Esti fin de selmana, aterriza en Xixón la edición segunda de Travel Pop Up by IATI, un evento qu’axunta a los meyores youtubers de viaxes d’España y Llatinoamérica. L’eventu, qu’anguaño va desendolcase de forma online, ta entamáu por Fun Travel Ven y patrocináu por Xixón Turismu.

    Va ser el sábadu 12 y domingu 13 d’avientu, con tresmisión en direuto dende Xixón y presentáu por la viaxera xixonesa Ana Rellán, del proyeutu Zapatillas por el Mundo. L’eventu ta empobináu al públicu xeneral y creadores de conteníu que quieran inspirase nes histories de viaxeros de sonadía n’Instagram, Youtube y TikTok. Esta nueva edición axunta a más de 10 youtubers ya influencers de viaxes que son referentes nel turismu español y llatinoamericanu, ente ellos: Enrique Alex, el canal de Youtube númberu 1 n’España; Mariel de Viaje, la bloguera de viaxes de mayor sonadía en Méxicu y, anguaño, una de les ocho grandes muyeres viaxeras del mundu, según el periódicu El País; Álex Tienda, ún de los youtubers de viaxes más famosos de fala hispana con más de 2 millones de suscriptores.

    Una montonera d’actividades viaxeres

    El sábadu 12 y domingu 13 d’avientu, los asistentes van esfrutar de delles actividaes con creadores de conteníu de sonadía nes redes sociales: charres, entrevistes, cara a cara, talleres y hasta un alderique sobro teunoloxía y movilidá pa un desendolcu sostenible cola participación de Jaime de Jaraiz Lozano, presidente y CEO en LG Electronics Iberia; Fátima González, direutora rexonal Europa del Sur en Ecosia; y Busan Moon, viaxeru que percorrió 21.000km en coche llétricu dende Les Canaries hasta Corea’l Sur.

    Otres viaxeres y viaxeros que tamién formen parte del cartelu de 2020:

    –  Alicia Aradilla, trotamundos española y famosa illustradora de viaxes. Recién asoleyó una guía illustrada xunto a Condé Nast Traveler.

    –  Dustin Luke, el youtuber norteamericanu más porteñu y famosu na Arxentina.

    –  Cristina Verdú y Gustavo Karlsson, una pareya viaxera GoPro Family Member.

    –  Christian Byfield, ún de los viaxeros más perconocíos en Colombia.

    –  Dos locos de Viaje, la pareya de viaxes con mayor audiencia en Venezuela.

    –  Gemelos Viajeros, tiktokers de viaxes españoles virales en TikTok.

    –  Azul Místico, viaxera española que vive en Londres y ex azafata de vuelu con más de mediu millón de siguidores.

    –  Patoneando, bloguera de viaxes colombiana que, dende va 6 años, viaxa sola.

     

  • Mundu Sidreru remata temporada esti xueves con un programa especial con Xosé Ambás

    Mundu Sidreru remata temporada esti xueves con un programa especial con Xosé Ambás

    La tercer temporada remata con una visita al Muséu de la Sidra d’Asturies y la recuperación d’una tradición sidrera con Xosé Ambás y Ramses Ilesies.

    La televisión pública asturiana (TPA) va emitir esti xueves 10 d’avientu a les 23:30 un capítulu especial pa rematar la tercer temporada de Mundu Sidreru, el programa dedicáu a la cultura sidrera, que presenta’l periodista Inaciu Galán. Tres10 capítulos nos que’l programa visitó llagares, dio a conocer l’actualidá de la sidra y elementos de la hestoria y la tradición, l’últimu programa, con unos diez minutos más de duración, va dedicar especial atención a la tradición sidrera dende distintos puntos de vista. 

    El programa, que cunta cola collaboración de la DOP Sidra d’Asturies, ábrese nesti capítulu final con una entrevista col etnógrafu y divulgador de la tradición Xosé Ambás, presentador del esitosu programa Camín de cantares, en TPA.

    Inaciu Galán acércase nesta ocasión el Muséu de la Sidra d’Asturies, un auténticu templu de la cultura sidrera, asitiáu en Nava y que nestos momentos ta peslláu al públicu, pa facer una visita completa cola so guía Delmi Vázquez.

     El momentu más especial del programa va pasar pela más pura tradición sidrera, cola ayuda de Xosé Ambás y Ramses Ilesies, el programa visita un vieyu llagar en desusu dende va más de sesenta años en Tiñana. Ellí, coles dos muyeres que viven na casa y que conocieron el llagar en funcionamientu, vamos ver de cerca’l so testimoniu sobre una tradición poco conocida, la de los “cantares de pisar o mayar”, que s’interpretaben a lo menos nesta zona, nel momentu de la mayanza, cuando se pasaben hores y hores de duru y repetitivu trabayu.

     El programa va tener tamién espaciu pa una nueva receta sidrera del Club de les Guisanderes d’Asturies, que conocen abondo les posibilidaes de la Sidra d’Asturies combinando colos productos asturianos más variaos. 

    El programa va tener tamién un momentu pa falar de la Denominación d’Orixe, posándose nesta ocasión nel llabor de losinspectores del Conseyu Regulador de la Sidra d’Asturies, dientro de los llagares.

    Con esti programa acaba la tercer temporada de Mundu Sidreru, programa producíu por Cuatro Gotes Producciones. Nesta edición pasaron pel espaciu figures como los presentadores Pedro Durán, Ana Francisco, Camilo Sousa o Arantxa Margolles, los cantantes Luis Núñez, Silvia Quesada y Beatriz, el pilotu de rallies Jose Antonio “Cohete” y la escritora Pilar Sánchez Vicente.

    Inaciu Galán, presentador y director del programa, mostróse mui satisfechu col resultáu de la temporada, “paezme que volvimos a consiguir poner en valir la importancia de la cultura sidrera p’Asturies y la necesidá d’enfrentar al futuru dende la garantía que supón una denominación d’orixe”.  Sobre’l programa final muéstrase entusiasmáu, “paezme que tamos énte un capítulu únicu, un verdaderu regalu que nos faen Xosé Ambás y Ramses Ilesies, yá que vamos ver de cerca un testimoniu únicu y que poles edaes de les informantes, Gregoria y Nedi, ye difícil d’atopar yá. Ye un homenaxe a les persones que permitieron tresmitir la cultura sidrera hasta güei y dexanos un patrimoniu únicu que dalgún día, más pronto que tarde, sedrá Patrimoniu de la Humanidá”.

  • Miércoles, 25 payares a les 19:30: Muyeres campesinas en Colombia

    Miércoles, 25 payares a les 19:30: Muyeres campesinas en Colombia

    #LaLlegraOnline torna a abrir con una actividá nel Día Internacional pol Desaniciu de les Violencies Machistes
    El viniente miércoles, 25 de payares, celébrase’l día escontra les violencies machistes y el Llar La Llegra convídavos a toes y toos a participar d’una actividá online que va entamar a les 19.30h na canal de YouTube de La Llegra (click equí)
    Pa falar d’un tema tan importante vamos tener la suerte de sentir a la compañera Claribel, refuxada colombiana n’Asturies, que va falanos de la so perspeutiva como llideresa campesina nel departamentu de Tolima. Claribel ye representante de les muyeres del campu en dellos espacios organizativos, sindicales ya institucionales y ye dirixente de l’Asociación de Trabayadores Campesinos del Tolima. Claribel ta menaciada de muerte pol so trabayu a la d’organizar muyeres campesines en sindicatos y cooperatives y pola so participación política con perspeutiva de xéneru.
    Nesta charra entitulada «Muyeres campesines en Colombia: ente la escluxón como pandemia y la violencia impune» vamos poder conocer de primer mano’l so sentir énte la situación de les muyeres nel so ámbitu y vamos poder intercambiar comentarios y sentires en direuto, al traviés de les redes sociales de La Llegra.
    Les charres de #LaLlegraOnline tán funcionando mui bien no tocante a la participación y animámosvos a toes y toos a esparder esta actividá pa que los centros sociales nun muerran metanes d’esta pandemia. ¡Sigamos abriendo espaciu nes redes!
  • Lorena Gil abandona la so acta de diputada

    Lorena Gil abandona la so acta de diputada

    Ayeri 19 de payares, la yá exdiputada xixonesa Lorena Gil, comunicó al conseyu ciudadanu autonómicu de Podemos Asturies la so decidión d’abandonar la so acta de diputada tres una reflexión personal y política.

    Una decisión que, según les sos propies pallabres nuna nota de prensa, resultó «mui difícil, por munches razones, especialmente porque lo último que querdría ye defraudar l’enfotu y les mires de quien me avaló por col so sofitu y tuvieron emburriando tou esti tiempu». Magar d’esto, Lorena Gil asegura que «la mesma honestidá y coherencia coles que intenté realizar el mio trabayu, y que considero fundamentales na política como na vida, son les máximes que me lleven a tomar esta determinación.».

    La xixonesa reflexiona diciendo que «Reconstruyir un horizonte compartíu que nos devuelva cierta certidumbre requier perseverar na defensa de derechos y llibertaes, d’un modelu de bienestar que curie y protexa a toles persones, d’una reconfiguración democrática de la economía, y requier faelo dende múltiples espacios, cada cual dende onde se sienta más útil.» y que «Dende ehí voi siguir tratando d’impulsar cambeos, como lo facen acaldía miles de ciudadanos y ciudadanes.»

    Lorena Gil nun quinxo despidise ensin «espresar el mio sinceru agradecimientu pol llabor incansable de toes y cada una de les persones que col so enfotu, entrega y
    aliendu incondicional permanecieron al llau nesti tiempu, especialmente nos
    momentos más complicaos.»

  • TPA cuntará la hestoria de la lliteratura n’asturianu fecha por muyeres

    TPA cuntará la hestoria de la lliteratura n’asturianu fecha por muyeres

    El programa estrénase esti miércoles 18 de payares a les 23:30 hores en TPA con un documental de trés capítulos.

    TPA va emitir un programa documental de trés capítulos nel que se percuerre la hestoria
    de la lliteratura asturiana fecha por muyeres a lo llargo de la hestoria. L’espaciu “Elles,
    muyeres na lliteratura asturiana”, va emitise los miércoles n’horariu de nueche.
    Esti espaciu divulgativu pensáu pa dar a conocer a les muyeres escritores n’asturianu y
    gallego-asturianu visita los llugares nos que vivieron y crearon estes escritores, recreando
    les vides de dalgunes d’elles, con actrices que dramaticen les sos vivencies.
    El programa-documental, realizáu por Cuatro Gotes Producciones, ta presentáu pola
    periodista Sonia Avellanada, con guión y dirección del periodista y Doctor n’Humanidaes
    Inaciu Galán, cunta col asesoramientu de les escritores y estudioses de la lliteratura
    asturiana Marta Mori, profesora de la Universidá d’Uviéu, Esther Prieto, editora, y María
    Esther García, presidenta de l’Asociación d’Escritores d’Asturies.
    La serie dixébrase en trés capítulos plantegaos n’orde cronolóxicu y caún d’ellos arranca
    cola presentadora nos llugares onde vivieron les autores, n’espacios rellacionaos con
    elles, introduciendo la cuestión como si d’una investigación se tratara y como un viaxe
    alredor d’Asturies.
    Más de mediu centenar d’investigadores y escritores participen col so testimoniu nesti
    documental, cuntando les característiques de cada autora, la novedá y la importancia de
    la so obra.

    Nel primer capítulu, dedicáu, a les pioneres de la lliteratura asturiana, fálase de les autores del sieglu XVIII y XIX: Xosefa Xovellanos y Taresa Cónsul (XVIII) y Enriqueta
    González Rubín y Matilde de Soingie (XIX), destacando en Xovellanos la importancia de
    la so obra, como primer muyer qu’escribe n’asturianu y la misteriosa hestoria d’Enriqueta
    González Rubín, qu’inaugura la novela n’asturianu y de la que nun llegó nenguna semeya,
    asina como’l misteriu de la desapaición del so llibru El viaxe del tíu Pacho el Sordu a
    Uviedo, redescubiertu en 2008.
    El segundu capítulu céntrase yá nes autores del sieglu XX, hasta l’apaición del
    Surdimientu y el cambiu de paradigma que supón nos años setenta. Setenta años nos
    que tenemos una amuesa muncho mayor d’autores, que vivieron momentos mui
    estremaos, los años trenta, la Guerra, l’exiliu o la dictadura franquista.
    El tercer capítulu dedícase a la obres de les autores contemporánees y la so visión del
    presente y el futuru de la lliteratura asturiana. Nesti capítulu va poder sentise la voz
    d’autores de xeneraciones tan estremaes como Sabel de Fausta o Laura Marcos,
    pasando per Lourdes Álvarez o Berta Piñán, ente munches otres.

  • La Comisión d’Igualdá debate l’informe d’evaluación y siguimientu del II Plan d’Igualdá del Ayuntamientu

    La Comisión d’Igualdá debate l’informe d’evaluación y siguimientu del II Plan d’Igualdá del Ayuntamientu

    L’Ayuntamientu de Xixón celebró esta mañana, de manera telemática, la primer Comisión d’Igualdá d’esti mandatu, encargada de realizar el siguimientu al II Plan d’Igualdá del Consistoriu.

     

    La Comisión, presidida pola alcaldesa de Xixón, Ana González Rodríguez, ta integrada pola concejala d’Hacienda, Marina Pineda, les directores xenerales de Servicios ya Igualdá, Beatriz Zrezal y Goretti Avello, respectivamente, asina como por una persona en representación de los organismos autónomos del Conceyu, otra persona en representación de les empreses de desenvolvimientu local y una persona en representación de cada un de los sindicatos (UXT, CC.OO, USO, USO, CSI, USIPA y SIPLA).

     

    La directora xeneral d’Igualdá, Goretti Avello, presentó al entamu de la comisión y pal so debate, l’Informe d’evaluación y siguimientu del II Plan d’Igualdá del Conceyu, aprobáu’l pasáu 2018, que confirma que la meyora n’igualdá nun ye significativu nel Consistoriu, ya que les breches de xéneru nun s’encurtiaron abondo dende entós, y “entá queda enforma por facer pa una igualdá efectiva y real”. Coles mesmes identifica que lo qu’asocede nel Ayuntamientu, no qu’a la brecha de xéneru refierse, ye’l reflexu de la situación de les muyeres na sociedá polo xeneral.

     

    Avello destacó mientres la so intervención, la revisión de les acciones llevaes a cabu nes distintes conceyalíes del Ayuntamientu, para identificar aquelles árees nes que yera más urxente realizar cambeos coles mires d’impulsar la igualdá. Asina se detectaron importantes sesgos de xéneru na Axencia Local d’Empléu, concretamente, nes ufiertes del Plan Local de Formación, qu’encontiaben l’empléu de les muyeres n’oficios claramente feminizadas, como les de camarera de pisu o ayudante de cocina. Cuestiones que yá fueron iguaes.

     

    Per otru llau, los permisos para conciliar nel Conceyu siguen siendo solicitaos, mayoritariamente, por muyeres, un total de 11.452, frente a 3.296 homes.

     

     

    La propuesta realizao y alcordao esta mañana ye qu’esta Comisión axúntese una vegada cada cuatrimestre.

  • Confinaos dos pueblos de Ḷḷena y Ponga por dellos casos de coronavirus

    Confinaos dos pueblos de Ḷḷena y Ponga por dellos casos de coronavirus

    El Serviciu de Salú del Principáu (Sespa) empecipió la realización de peneraos en Xomezana Riba (Ḷḷena) y Sobrefoz (Ponga) en detectándose 7 y 3 casos positivos, respectivamente. En dambos casos trátase de poblaciones vulnerables al coronavirus. Les pruebes empezaron esti llunes pa los 72 habitantes de la localidá ḷḷeniza, onde s’instaló un dispositivu especial con personal de la área sanitaria VII. Esti martes va habilitase otru con profesionales de la área VI pa tomar amueses a los 40 vecinos de Sobrefoz. Dase la circunstancia de que Ponga nun rexistrara nengún positivu por Covid dende l’entamu de la pandemia.

    Coles mesmes, el Sespa remató ayeri la toma d’amueses a 600 adolescentes de Llaviana que dieron negativu por coronavirus la selmana pasada. El Serviciu de Vixilancia Epidemiolóxica previera esti segundu peneráu pa reparar la circulación del coronavirus, cuidao que la medría de casos prodúxose nesa franxa d’edá.

    Per otra parte, la Conseyería de Salú confirmó 64 nueves andaes de coronavirus diagnosticaos esti domingu. Una persona precisó ingresu hospitalariu y les demás permanecen asintomátiques o con síntomes leves, aisllaes nes sos cases. El Serviciu de Vixilancia Epidemiolóxica sigue coles investigaciones pa determinar la vinculación de tolos casos detectaos. Per otra parte, cuatro persones diagnosticaes en díes anteriores tuvieron que ser hospitalizaes, y otros dos ingresaron na UCI. Nun se rexistraron nuevos fallecimientos por covid-19. El Sespa efectuó’l domingu 1.711 pruebes PCR, que los sos resultancies asitien la tasa positividad nel 3,74%.