Xixón al día

Categoría: Asturies

  • El pabellón d’Asturies na 68ª edición de la FIDMA va tar dedicáu a la cultura sidrera asturiana

    El pabellón d’Asturies na 68ª edición de la FIDMA va tar dedicáu a la cultura sidrera asturiana

    El pabellón d’Asturies na 68ª edición de la Feria Internacional de Muestres d’Asturies (Fidma) va tar dedicáu a la cultura sidrera asturiana, declarada patrimoniu mundial inmaterial pola Unesco’l pasáu avientu. L’estand institucional acueye una gran esposición sol lema Asturies ye sidrera. Lo nueso ye mundial y va ufiertar tamién actividaes en vivu, xuegos, talleres y recreaciones históriques.

    La viceconseyera de Turismu, Lara Martínez, presentó güei’l conteníu del espositor, nel que destaca l’amuesa comisariada por Luis Benito García, director de la Cátedra Sidra d’Asturies DOP. La esposición plantega una inmersión na hestoria y la cultura de la sidra asturiano, un gran curiosu atractivu de la comunidá, pero tamién reflexu d’una industria sostenible que supo xunir tradición ya innovación pa crear un entramáu gastronómicu basáu na máxima calidá del productu. El pabellón institucional conviértese asina nun homenaxe vivu a una forma d’entender la vida, de compartir y de celebrar.

    El percorríu empieza na zona esterior del pabellón, onde se reproduz una vivienda tradicional con horru y llagar, y sigue na planta baxa, onde s’esplica la dimensión del sector sidreru y la importancia de la reconocencia de la Unesco pa- la comunidá, al traviés de conteníos etnográficos, audiovisuales, grafismos, maquetes, realidá aumentada, esperiencies sensoriales, degustaciones, xuegos interactivos y actividaes pa tolos públicos.

    Dende que se paña la mazana hasta’l corcháu, pasando pol mayáu y la ellaboración artesanal, tol ciclu de la sidra reproduzse na primer planta del pabellón al traviés d’una esposición qu’apuesta polo sensorial, lo lúdico y lo participativo. El visitante va poder entrar nuna pumarada, conocer de cerca los proyectos d’investigación del Serida y vivir una esperiencia inmersiva en 3D sobre’l procesu de mayáu de la mazana. Tamién va poder sumase a la creación d’una gran obra colectiva titulada La sidra compártese, vívese y recuérdase. Gracies por formar parte d’esta collecha.

    El procesu d’ellaboración de la sidra, el de corcháu y los xuegos y costumes amestaos a la cultura sidrera tamién tienen el so espaciu na primer planta, na que’l ciclu de la sidra amuésase al traviés d’un videoxuegu. Amás, ufiértense pa tastiar dalgunos de productos con denominación o indicación xeográfica protexida.

    Pa rematar la visita na planta baxa, el públicu va atopar un chigre tienda y una espicha y va poder poner a prueba, tanto tradicionalmente como virtualmente, la técnica del escanciáu.

  • Movilidá va reforzar el serviciu d’autobuses ente Uviéu y Xixón les fines de selmana d’agostu

    Movilidá va reforzar el serviciu d’autobuses ente Uviéu y Xixón les fines de selmana d’agostu

    El Gobiernu d’Asturies va reforzar la so ufierta de tresporte públicu ente Uviéu y Xixón toles fines de selmana d’agostu. L’oxetivu ye ameyorar la calidá d’un serviciu, emprestáu pol Consorciu de Tresportes d’Asturies (CTA), que rexistra una intensa demanda dende l’entamu de la temporada braniega.

    Asina, los sábados y domingos del próximu mes, la operativa d’autobuses ente los dos principales ciudaes asturianes va ser la mesma que nos díes llaborables, con 62 frecuencies diaries d’ida y vuelta, que suman 124 servicios. Davezu, les fines de selmana ufiértense 48 frecuencies diaries.

    Tamién se va aumentar la ufierta de búhos, de manera qu’ente les 3:00 y les 6:20 hores de la madrugada habrá salíes cada 20 minutos. Esto supón pasar de 16 a 19 frecuencies d’ida y vuelta a lo llargo de la nueche, que suman un total de 38 servicios.

    Los refuerzos de la operativa de tresporte públicu ente Uviéu y Xixón inscríbense dientro del firme apueste del Gobiernu d’Asturies pa fomentar la movilidá sostenible y facilitar l’accesu al tresporte públicu gracies a la tarxeta CONECTA.

    Estes meyores na movilidá metropolitana súmense a les que CTA punxo en marcha a principios de xunetu en Xixón, cola ampliación d’horarios nes rutes con Uviéu y Avilés hasta la 01:00 y les 00:30 hores, respectivamente. Esta operativa va tar vixente a hasta’l 8 de setiembre, coincidiendo cola temporada de mayor arribación turística. Nesti periodu tamién s’aumentó la conectividá con Mieres del Camín, que caltien les cuatro frecuencies diaries con Xixón qu’operen mientres el cursu universitariu.

  • Ñaz en Castropol el festival El Pueblo

    Ñaz en Castropol el festival El Pueblo

    Nel branu de 2025 ñaz “El Pueblo”, un eventu gratuitu, pa tolos públicos y con calter itinerante, que ñaz coles mires de rindir homenaxe a los pueblos que conformen la identidá d’Asturies y da-yos el protagonismu que merecen. Esta iniciativa busca non solo fortalecer l’arguyu de pertenencia rural, sinón tamién xenerar un impactu positivu na imaxe y la economía local de cada llugar onde se celebre.

    La primer edición va tener llugar los díes 13 y 14 de setiembre en Castropol, una de les xoyes del occidente asturianu, asitiáu en plena Reserva de la Biosfera del Eo. Mientres tola fin de selmana, el conceyu va tresformase nun espaciu d’alcuentru, cultura, música y tradición.

    Un programa pa tola familia

    El Pueblo va ufiertar una variada programación d’actividaes pensaes pa tolos públicos:

    • Conciertos de primer nivel, con artistes como Sidonie, cabeza de cartelu, al pie de Marlena, King África, The Rapants, Sangrixueles del Guadiana, Neños Bravos, Amor Líquido, The Goodmen, Alfredo García, La Banda de Gaites El Penedón, y una potente sesión electrónica con Héctor Llamazares, Yahaira, Kresy y Alejandro Ávila.
    • Actividaes tradicionales y locales, como les emblemátiques alfombres florales de Castropol, rutes guiaes, paseos a caballu, esposiciones de semeyes históriques y una zalea por embarcaciones del Club de Vela de Castropol.
    • Mercáu de productos asturianos y Alimentos del Paraísu, colo meyor de la nuesa gastronomía y artesanía.
    • Yoga con Betty Ewan, pa esfrutar d’un momentu de relax nuna redolada privilexada.
    • Espacios y talleres infantiles: pintacares, globoflexia y munches sorpreses más pa la reciella.

    “El Pueblo” ñaz con una clara vocación social y cultural: demostrar que los nuesos pueblos nun son namás llugares guapos pa visitar, sinón tamién espacios ideales pa vivir, entamar y construyir comunidá. Esta primer edición, que se va celebrar en Castropol, marca l’entamu d’un proyectu itinerante que va percorrer distintes localidaes asturianes en futures ediciones.

  • El Muséu Xurásicu d’Asturies modernízase con una inversión de 600.000€

    El Muséu Xurásicu d’Asturies modernízase con una inversión de 600.000€

    El Muséu del Xurásicu d’Asturies (MUJA), unu de los grandes emblemes del turismu familiar na comunidá, avanza na so modernización con una inversión global de 600.000 euros destinada a incorporar conteníos dixitales y interactivos que tresformen la esperiencia del públicu.

    Esta renovación refuerza’l papel del MUJA como motor cultural, científicu y turísticu. La vicepresidenta y presidenta en funciones, del Gobiernu d’Asturies, Gimena Llamedo, visitó güei l’equipamientu pa conocer de primer mano les nueves instalaciones y recursos tecnolóxicos, diseñaos ya impulsaos pola Sociedá Pública de Xestión y Promoción Turística y Cultural del Principáu. “El MUJA ye un referente internacional del patrimoniu xeolóxicu. Con esta inversión, damos un pasu más para convertilo nun muséu del sieglu XXI: un espaciu qu’anueva pa emocionar, enseñar y conectar con tola familia”, sorrayó Llamedo.

    Ente les principales novedaes destaquen les siguientes:

    • Trés nueves pantalles de gran formatu na Sala del Xurásicu Asturianu que proyecten recreaciones animaes del paisaxe y la biodiversidá de cada periodu xeolóxicu, venceyaes a los fósiles esibíos.
    • Na Sala d’Introducción al Xurásicu, el visitante puede ver cómo s’allumen ciertos güesos del ictiosauriu más completu topáu na península Ibérica, que se resalten simultáneamente nuna proyección mural pa reconstruyir la cadarma completa. Al traviés d’una recreación animada, tamién s’amuesa’l fondu marín nel qu’habitaba esti reptil xurásicu y cómo se movía.
    • Un nuevu vídeu animáu esplica cómo una pisada de dinosauriu se convirtió en fósil, acompañáu por una lluz dixital que marca caúna de les icnites esibíes.
    • Sustitución de reproductores antiguos por sistemes dixitales. Amás, ente otres iniciatives trabáyase na instalación de rede wifi nel interior y esterior del muséu, asina como nel refuerzu del sistema de megafonía esterior pa fortalecer la comunicación y la seguridá.
  • La Universidá d’Uviéu allúmase d’azul pa xunise a la campaña “La tolerancia apaga l’odiu”

    La Universidá d’Uviéu allúmase d’azul pa xunise a la campaña “La tolerancia apaga l’odiu”

    La Universidá d’Uviéu xúnese a la campaña La tolerancia apaga l’odiu 2025 pa conmemorar la celebración del Día Européu de les Víctimes de Crímenes d’Odiu que se celebra cada 22 de xunetu por cuenta de los atentaos d’Oslo y Utoya, que tuvieron llugar nel añu 2011 en Noruega. Pa simbolizar el sofitu a esta causa, la institución académica va allumar d’azul la torre del Edificiu Históricu mientres la nueche d’esti martes.

    La iniciativa, puesta en marcha por Movimientu contra la Intolerancia, fai estensible l’alcordanza a toles víctimes de delitos d’odiu yá seyan por razones de raza, relixón, sexu, orientación sexual, ideoloxía o cualesquier otra condición. El Conseyu d’Europa proclamó va una década’l 22 de xunetu como Día Européu en Memoria de les Víctimes de Crímenes d’Odiu pa recordar a los 77 mozos asesinaos nos atentaos de Noruega va yá 13 años.

    Numberosos parlamentos autonómicos, diputaciones y conceyos de toa España súmense a la campaña La tolerancia apaga l’odiu 2025 allumando d’azul les sos fachaes o edificios más emblemáticos. Ente les instituciones xuntaes atópense casi una ventena d’universidaes que, al igual que la Universidá d’Uviéu, alcen la bandera de la tolerancia pa facer frente al odiu, seya la que seya la so motivación.

     

  • El conseyeru de Facienda reclama “el mayor consensu posible” pa defender los intereses d’Asturies na negociación sobre’l modelu de financiamientu autonómicu

    El conseyeru de Facienda reclama “el mayor consensu posible” pa defender los intereses d’Asturies na negociación sobre’l modelu de financiamientu autonómicu

    El conseyeru de Facienda, Xusticia y Asuntos Europeos, Guillermo Peláez, reclamó güei na Xunta Xeneral “el mayor consensu posible” pa defender los intereses d’Asturies na negociación sobre’l nuevu modelu de financiamientu autonómicu. “Queremos y esiximos negociar nun planu d’igualdá pa llegar a un alcuerdu multillateral nel Conseyu de Política Fiscal y Financiera”, sorrayó.

    Peláez intervieno nel plenu estraordinariu convocáu pol Parlamentu p’afrontar esti asuntu. “Güei toca compartir lo esencial, la defensa de los intereses d’Asturies y el refugu atayante a los privilexos y la desigualdá. Eso ye lo que-yos propón esti gobiernu y creo, bonalmente, demándanos Asturies”, repitió.

    El titular de Facienda unvióse a los dos documentos que reflexen la postura d’Asturies énte la reforma del modelu: l’alcuerdu suscritu por tolos grupos parlamentarios sacante Vox en 2020 y la Declaración de Santiago, roblada en payares de 2021 coles comunidaes de Galicia, Castiella y Llión, Castiella-La Mancha, Estremadura, Cantabria, La Rioxa y Aragón. “Esos dos alcuerdos comprometen a esti Gobiernu y toles nueses acciones tán guiaes non solo a respetalos, sinón a facelos valir”, aseguró.

    Respectu al alcuerdu suscritu fai una selmana pol Gobiernu d’España y la Generalitat de Cataluña, Peláez alvirtió de que la salida de cualquier comunidá del réxime común acarretaría una merca de los recursos del Estáu, que ye “la meyor palanca de redistribución de la renta y la riqueza, mesmo qu’una garantía última d’un estáu del bienestar fuerte y equitativu”.

  • Les 6 de La Suiza entren finalmente a prisión por facer sindicalismu

    Les 6 de La Suiza entren finalmente a prisión por facer sindicalismu

    Les 6 sindicalistes de la CNT condenaes pol casu de La Suiza deciden ingresar voluntariamente en Villabona, según dicta la sentencia que les condena a 3 años y mediu de cárcel, anque siguen llamando a la protesta
     
    El Xulgáu de lo Penal nº1 de Xixón dictaba esti miércoles la orde de detención de les 6 cenetistes imputaes pol famosu casu de la Pastelería La Suiza. El delitu foi defender los derechos d’una compañera sobre la que la xerencia de la Pastelería La Suiza exercía acosu y abusos llaborales, tando amás embaranzada. Cuando van 8 años desque s’aniciare’l conflictu y énte la orde d’arrestu inmediatu dictada pol xulgáu, güei xueves 10 de xunetu de 2025, les 6 condenaes por facer sindicalismu ingresaben voluntaria y pacíficamente na prisión de Villabona, nun xestu qu’evita les detenciones a pie de cai y un mayor trauma pal so entornu. Les 6 cuerren peligru de cumplir hasta a 3 años y mediu por delitos de coacción continuada, nun casu amparáu pola famosa Llei Mordaza. Esta decisión del xulgáu asienta un precedente mui peligrosu que fai peligrar tol trabayu sindical escontra la defensa de los derechos llaborales y de llibre asociación, non sólo de la propia xente sindicalista, sinon de tola ciudadanía.
    El Xulgáu, na mesma llinia de servilismu pa cola patronal que vieno siguiendo mientres tou’l procesu, dictó ayeri miércoles autu de detención inmediata. Nun s’esperó pa esta acción pola resolución de la petición d’indultu apoyada pola mayoría social asturiana, tolos sindicatos de clase del estáu, el Gobiernu asturianu y el propiu Ministeriu de Trabayu d’España. Tampoco quiso’l Xulgáu xixonés dar tiempu al pronunciamientu del Tribunal Européu de Derechos Humanos, que tovía tá en procesu de considerar el recursu de revisión del casu presentáu pola defensa.

    Un capítulu nuevu, pero non un final

    La noticia del ingresu en prisión amuesa la capacidá de represión de la patronal a comuña col sistema de xusticia que l’ampara. Pero’l percorríu d’esti drama llaboral, que trai en fierros al movimientu obreru y a la sociedá asturiana dende hai yá 8 años, nun acaba col encarcelamientu de les 6 de La Suiza, sinon qu’ábrese una nueva etapa del mesmu.
    Nin un día tardaron en convocase nueves movilizaciones pa sofitar la llucha de les 6 de La Suiza.La primera, esta mesma tarde del xueves na Plaza‘l Conceyu de Xixón a les 19.30 y siguiendo mañana vienres cola convocada en Llión a les 12.00 énte la Subdelegación de Gobiernu. Miembros de la CNT y d’otros sindicatos mayoritarios afirmen que les movilizaciones van siguir hasta que s’indulte a les 6 compañeres encarcelaes.
  • Asturies medra en población tres años siguíos

    Asturies medra en población tres años siguíos

    Asturies llogró revertir l’enclín históricu de perda de población y encadena yá trés años consecutivos de crecimientu. Tres tocar suelu demográficu en 2022, la comunidá ganó más de 9.000 habitantes. En 2024 llégase a 1.014.112 persones residentes, según datos de la Sociedá Asturiana d’Estudios Económicos ya Industriales (Sadei). En gran parte, esti cambéu débese al récord migratoriu rexistráu mientres trés años consecutivos, con un saldu positivu de casi 13.000 persones en 2024, abonda pa compensar el descensu natural por avieyamientu. Per primer vegada, lleguen más persones del estranxeru que d’otres comunidaes, lo que consolida Asturies como un territoriu atractivu pa vivir y trabayar.

    El Gobiernu d’Asturies constituyó formalmente la Comisión Gubernamental pal Retu Demográficu, el muérganu encargáu de coordinar de forma tresversal toles polítiques qu’inciden na evolución de la población. La vicepresidenta y conseyera de Presidencia, Retu Demográficu, Igualdá y Turismu, Gimena Llamedo, presidió la xunta, na que punxo en valor el xiru positivu na evolución demográfica de la comunidá.

    Nesi alcuentru, constatóse que’l gobiernu ameyoró los sos fluxos con otres rexones clave: dende 2020, el saldu migratoriu con Madrid pasó de ser negativu a convertise nel meyor ente toles comunidaes, lo que reflexa l’impactu de les polítiques d’atracción de talentu, torna y calidá de vida impulsaes pol Executivu autonómicu.

    “Asturies ye una tierra d’oportunidaes. Estos datos demuestren que les nueses polítiques tán funcionando: tamos recuperando población, atrayendo talentu y xenerando futuru”, destacó la vicepresidenta.

  • El Gobiernu d’Asturies lleva la intelixencia artificial a los conceyos de menos de 20.000 habitantes al traviés del programa ‘Ruta dixital’

    El Gobiernu d’Asturies lleva la intelixencia artificial a los conceyos de menos de 20.000 habitantes al traviés del programa ‘Ruta dixital’

    El gobiernu asturianu punxo en marcha Ruta dixital, un programa innovador p’averar la formación en nueves tecnoloxíes a los conceyos rurales con menos de 20.000 habitantes, col fin de combatir la fienda dixital.

    Al traviés d’un conveniu robláu ente la Conseyería Presidencia, Retu Demográficu, Igualdá y Turismu, y la Cámara de Comerciu d’Uviéu y dotáu con 2,4 millones, un aula móvil va movese per 71 conceyos con una ufierta formativa gratuita de cien cursos, caún de siete hores y media de duración, en formatu dixital y online.

    L’aula móvil tien un llargor de diez metros a los que se suman dos módulos llaterales estensibles, lo que dexa ufiertar casi 42 metros cuadraos. Amás, cuenta con equipos pa diez alumnos de forma simultánea, accesu a internet d’alta velocidá y un sistema de conexón vía satélite.

    La vicepresidenta del gobiernu d’Asturies, Gimena Llamedo, visitó la primer parada, en La Ribera, onde señaló l’importante esfuerzu que ta realizando l’Alministración pa llegar a tolos requexos d’Asturies, smesmo que’l so compromisu col desafíu demográficu, “pa que naide quede tras”.

    Llamedo venceyó esta iniciativa al apueste pola simplificación burocrática qu’impulsa l’Executivu autonómicu y que pretende averar l’Alministración a les persones. Un procesu, añedió, nel que llueu va encaxar una nueva pieza: la evolución de la sede lletrónica escontra la nueva plataforma dixital MiPrincipado. “Con ella, vamos poder llevar l’Alministración nel bolsu”, valoró la vicepresidenta, quien amestó qu’esta nueva canal va dexar realizar trámites, pagar tases, consultar carnés o espedientes, too ello ensin pasar por un ventanu.

    Respectu al programa Ruta dixital, incidió en que va consistir “en dir pueblu a pueblu dando formación dixital básica a más de 11.000 persones de toles edaes”.

    La ufierta formativa dedica un apartáu específicu a la intelixencia artificial (IA), una ferramienta fundamental en tolos ámbitos y pieza clave d’estos cursos. Hai trece títulos nos que se van ufiertar pautes pal usu básicu de la IA nel día a día, la redacción de Prompts, usos prácticos de ChatGPT o cómo crear una identidá de marca con esti tipu de tecnoloxía.

    Destaquen tamién los cursos empobinaos a les persones mayores, con conteníos enfocaos a utilidaes como pidir cita previa, xestionar contactos y axustes del móvil, reconocer estafes, unviar audios, compartir imaxes o realizar videollamadas. Coles mesmes, va haber formación pa persones adultes y tamién pa escolares.

    Les próximes paraes de Ruta dixital van ser Les Regueres, Candamo, Grau, Tameza, y Salas. El percorríu va siguir con Santo Adriano, Proaza, Teberga, Morcín y Riosa, pa retomar l’actividá en septiembre, cola vuelta al cole.

  • Iniciativa pol Asturianu pide “coherencia” al Conceyu d’Uviéu y reclama midíes pa visibilizar l’asturianu

    Iniciativa pol Asturianu pide “coherencia” al Conceyu d’Uviéu y reclama midíes pa visibilizar l’asturianu

    Iniciativa pol Asturianu reclama coherencia al equipu de gobiernu uvieín pol usu del asturianu nel conceyu. La llingua propia ye ún de los exes vertebradores de la campaña de la candidatura a Capital Europea de la Cultura nel añu 2031 col lema ‘Puxa Europa. The future is now’. Na so presentación, el xefe del serviciu de comunicación y director del proyectu, Rodolfo Sánchez, valoró la llingua asturiana como un elementu distintivu, arriquecedor y un atractivu cultural. Afirmó tamién que l’asturianu apurría un valir añedíu a la candidatura y qu’Europa premiaba l’usu de les llingües minorizaes nes candidatures.

    L’asociación valora la reconocencia del patrimoniu llingüísticu como un aspectu a curiar y reclama al Conceyu d’Uviéu pasos alantre pa que nun queden en pallabres. Iniciativa pol Asturianu recuerda qu’Uviéu nun tien plan de normalización llingüística, serviciu de normalización llingüística nin fai usu de la toponimia oficial.

    La entidá recuerda tamién que’l Partíu Popular, que gobierna con mayoría absoluta nel conceyu, presume constantemente de l’aprobación de la Llei d’Usu del Asturianu, pero cuando tien capacidá p’aplicala, como ye’l casu, nun lo fai. «Allegrános esa valoración del asturianu na campaña a la capitalidá pero nun entendemos l’ausencia del idioma na páxina web municipal, nos autobuses urbanos, na cartelería (Antroxu, San Xuan, San Matéu…), etc».

    Iniciativa pol Asturianu contactó col director de la campaña pa reconocer la inclusión del asturianu y poles pallabres envalorando’l patrimonio llingüísticu y reclamó avances nel usu normal y la visibilización del idioma como ocurre en centenares de conceyos de Galicia, Comunidá Valenciana o Baleares, comunidaes con llingua propia que cuenten con gobiernos autonómicos y municipales del PP. La organización de reivindicación llingüística considera que la capital nun pue quedar atrás na normalización social del asturianu. «Ye’l momentu d’aplicar el discursu del Partíu Popular sobre l’asturianu y ser mínimamente coherentes colo que se diz na Xunta Xeneral y nel Plenu d’Uviéu», sentenciaron dende l’asociación.