L’Asociación Vecinal de La Serena entama un añu más una folixa de varios díes por mor del Samaín. Dende ayeri, 31 d’ochobre y hasta’l próximu 5 de payares, la Plaza 3 d’abril va acoyer les celebraciones de l’asociación, onde hai programaes una montonera d’actividaes pa tolos públicos mientres tol día.
El Altar del Holocausto ta bien pronto d’aportar a Xixón, onde, como ye vezu nos sos espectáculos, va protagonizar la so próxima homilía. A lo menos, asina ye como la propia banda llama a los sos conciertos. Sedrá’l próximu 27 d’ochobre, na reconocida Sala Acapulco.
Esti grupu ye una banda instrumental de cultu formada por Reaper Model, Weasel Joe, Reverb Myles y Skybite que se mueve ente’l Postrock y el Doom presea. Caún de los miembros tien influencies musicales bien variaes y distintes, esto fai-yos componer soníos, atmósferes y estridencies dignes d’escucha. Cantares con desenvolvimientos y atmósferes bien trupes, melódiques y fondes que tresmiten al oyente a distintos estaos. Ye necesariu parase a escuchar los sos cantares yá que son trupes, con munches transiciones y compendios musicales que te somorguien n’estaos de señardá, allegría, murnia…
La prensa especializao fíxose ecu del impactu y evolución de la banda recibiendo crítiques positives de los sos trabayos y directos en medios como Mondu Sonoru, Vice, Marca, Radio3, El PAÍS, This Is Rock, Rockzone, Binaural, Mautorland, BanderaNegra, MetalKorner, MiradAlternativa, Hipersónica, Hellpress, Fotoconciertos, La heavy, Rockmap, Rafabasa…
Realizaron cerca de 250 conciertos por tola península, Portugal y Francia, presentando la so particular visión de la música instrumental, lo que-yos convirtió en tou un referente dientro de la música instrumental n’Europa.
Presentes en festivales como Download, Tsunami Xixón, Resurrection Fest, Z! Live, Sonic Blast, GetMAD!, Dimetal Fest o Kanekas Fest, los sos conciertos xeneren un aura d’inseguridá, misteriu y pensamientos. Nun dexen a naide indiferente. Y eso ye lo que pretenden cola so fecha anunciada en Xixón.
Les entraes pa la homilía yá tan disponibles nesta web al preciu de 14 euros.
Esti llunes, el salón de recepción del Conceyu de Xixón acoyó la presentación de la XIV edición de Xixón de Sidra – DOP Sidra d’Asturies. Dende’l miércoles 11 al domingu 22 d’ochobre, dolce díes pa prebar les meyores sidres con denominación d’orixe protexida Sidra d’Asturies acompañaes de cazueles. Nesta edición van participar 23 llagares y 33
sidreríes.
Jesús Martínez Salvador, voceru del Conceyu de Xixón: “Ye una actividá dafechu consagrada nel calendariu d’eventos de la nuesa ciudá. Axunta munches de les característiques de los qu’eventos qu’ayuden a construyir una ciudá. Quiero dar les gracies a tolos barrios y, concretamente, a toles sidreríes que s’entornaron con esta nueva edición.
Animo a toos el xixoneses a asitiase’l pañuelu y a compartir unos culinos pela nuesa ciudá.
Pela so parte, Guillermo Guisasola, vicepresidente del Conseyu Regulador de la DOP Sidra d’Asturies, anotó que «ye un arguyu que la DOP Sidra d’Asturies tea presente nesti eventu. Apostar pola Sidra d’Asturies ye facelo pol sector agrícola. Y tamién facelo en beneficiu de la cultura sidrera asturiana, que ta en plenu procesu pa convertise en Patrimoniu Mundial Inmaterial de la Unesco”.
Tamién intervinieron el presidente de OTEA Xixón, Ángel Lorenzo, ya Iván de la Plata, en representación de Fenicia, para afalar a tola población de Xixón, mesmo qu’a los visitantes, qu’esfruten d’esti eventu que nuevamente va axuntar a miles de persones nes sidreríes.
Steam and Gaming ye una nueva forma d’entender y combinar l’ociu y la formación. Va Tener llugar los díes 13 y 14 d’ochobre en Llaboral Centru d’Arte y Creación Industrial y va ser totalmente gratuitu.
L’eventu de referencia d’esta seronda sigue tomando forma y sumando conteníos y talleres a l’actividá qu’actualicen na so web. El sábadu va tener llugar la charra y taller de Paola Guimeráns especialista n’Educación en Y-Testiles, Diseñu y Wearable Technology. Ye graduada n’Artes na Universidá de Sevilla, y tien un MFA en Diseñu y Tecnoloxía na Parsons School de Diseñu de New York amás d’un Master en Educational Innovation na Universidá Europea de Madrid y un Doctoráu pola Complutense. Ye la fundadora del proxecto Aula Steam y autora de Prototipado Lab, ente otres munches creaciones y proyectos.
Amás va cuntase con una programación completa con talleres de Vr, Micro:Bit, Sphero Balls, Retos Indis, Interín y munchos más. Nesta ocasión Diego Pastrana, Fundador y Co-Director del festival declaró en medios que: “Mientres esti eventu tecnolóxicu, rescampla que les árees STEAM nun son a cencielles un enclín, sinón una necesidá. Estes disciplines representen la confluencia de conocencies que van impulsar la innovación y el desenvolvimientu nes próximes décades. Ye crucial que los mozos se somorguien nestes árees pa tar al mandu de la próxima fola de meyores globales». Pela so parte, el director xeneral d’Innovación, Investigación y Tresformamientu Dixital, Iván Aitor Lucas, punxo de relieve la importancia qu’eventos como Xixón Steam and Gaming tienen nel fomentu de les vocaciones científiques, una de les llinies que la conseyería quier impulsar, y destacó la participación d’estudiantes nel eventu. «Ye fundamental llegar a los mozos al traviés de los medios que-yos interesen, implica-yos y convertir la formación en daqué cercanu, amenu y por qué non, risonderu», precisó.
Toles actividaes son gratuites y puede acutase plaza pa los talleres na web. L’eventu va ser los díes 13 y 14 d’ochobre de 10 a 2 y de 16 a 19 hores, siendo puramente’l día 13 pa colexos ya institutos y el día 14 abiertu al públicu xeneral.
Per cuartu añu consecutivu Xixón va cuntar con una nueva edición del Salón del Videoxuegu, un eventu que nació en plena pandemia de COVID como una alternativa segura pa siguir realizando actividaes d’ociu dixital.
L’eventu, que cunta col sofitu de Xixón Mocedá, Xixón Impulsa y Asturies Cultura en Rede pretende ser un puntu d’alcuentru xuvenil, basáu nel ociu dixital y les nueves tecnoloxíes.
Na presente edición va cuntar con dos espacios totalmente estremaos. Un primer espaciu sito nel Espaciu Xóven de l’Antigua Escuela de Comerciu que va cuntar con un total de 16 videoconsoles, dende les más modernes PS5 hasta los equipos retro más clásicos como la Play 1. La organización del eventu convida asina a tolos públicos a realizar un amenu viaxe d’ociu pola hestoria de los videoxuegos de la qu’esfruten d’ellos.
Per otru llau y sito na segunda planta , per primer vegada n’Asturies va tener llugar la parada “ ROAD TO GAMERGY” un tornéu clasificatoriu oficial que va dexar a los ganadores allegar con cuenta d’añu al eventu Gamergy. Esta parada oficial, va dexar clasificar a los meyores xugadores de Smash Bros d’Asturies para el tornéu nacional que va tener llugar.
El tornéu va ser amás stremeáu dende la canal de twitch de Mystic Squad que cunta con más de 14.300 siguidores.
El coordinador de l’actividá Héctor Lasheras declaró que “una vegada más ponemos nel focu d’atención a la ciudá de Xixón y Asturies como un llugar con interés y capacidá pa xenerar conteníos d’ociu alternativu d’alta calidá y diversidá, gracies al compromisu d’instituciones como Xixón Impulsa, Xixón Mocedá y Asturies Cultura en Rede”.
El director xeneral de Mocedá, Francisco de Asís Fernández, destacó esta mañana la importancia de realizar un esfuerzu institucional y social” pa poner nel centru de l’axenda de los poderes públicos y de la sociedá polo xeneral los problemes materiales” a los que s’enfrenta la mocedá na actualidá. En concretu, Fernández sorrayó como principales prioridaes la llucha contra la precariedá llaboral, facilitar l’accesu a una vivienda digna y algamadiza y “el plenu insertamientu psicosocial de les persones”.
Sobre esti últimu aspeutu refirióse a estudios recién que demuestren que la construcción de llazos sociales calidable, como los que se crean al traviés del asociacionismu xuvenil, contribúin a amenorgar el riesgu de carecer enfermedaes mentales. “Hai qu’entender la salú non como l’ausencia d’enfermedá, sinón como’l plenu insertamientu de les persones nel so espaciu, nes sos relaciones”, esplicó.
Francisco de Asís Fernández fixo estes declaraciones nel Espaciu Nuevu de la Escuela de Comerciu de Xixón, mientres la rueda de prensa de presentación de la 41ª edición de los Alcuentros Internacionales de Mocedá de Cabueñes, entamaos pol Gobiernu del Principáu d’Asturies al traviés del Institutu Asturianu de la Mocedá, el Conceyu de Xixón, l’Institutu de la Mocedá d’España (Injuve), el Conseyu de la Mocedá d’España (Cje), el Conseyu de Mocedá del Principáu d’Asturies (Cmpa) y el Conseyu de Mocedá de Xixón (Cmx).
L’oxetivu d’esta nueva edición de los alcuentros Kbuñs, que se van celebrar ente los próximos díes 12 y 15 d’ochobre, ye cavilgar sobre los servicios de mocedá y la participación xuvenil con un nuevu formatu qu’inclúi llaboratorios destinaos a mozos y un foru de profesionales. La cita ta dirixida a moces d’ente 18 y 30 años, amás d’a profesionales de la mocedá mayores de 18 años, y el plazu d’inscripción pa participar remata’l próximu miércoles 20 de setiembre.
La localidá de La Pola Llaviana va concentrar del 8 al 10 de setiembre los actos entamaos pa festexar el Día d’Asturies, cola cultura popular y el deporte tradicional como protagonistes. La viceconseyera de Cultura, Política Llingüística y Deportes, Vanessa Gutiérrez, y l’alcalde de Llaviana, Julio García, presentaron esta mañana nel conceyu’l programa de la celebración, que combina folclore, artesanía, música, teatru, xuegos tradicionales y exhibiciones na cai con talleres de deporte adaptáu y masterclass d’echar sidra, ente otres propuestes.
La cai Llibertá y les víes llinderes van acoyer el mercáu tradicional, nel que participen más de 70 puestos d’artesanos y productores asturianos. Va abrir los trés díes dende les 12.00 hores.
Les exhibiciones de deportes y xuegos tradicionales van tener llugar el vienres y el sábadu nel parque de los Príncipes de 12:00 a 14:30 y de 16:30 a 20:00. La pista deportiva Joaquín Blume, allugada al llau del parque, va ser l’espaciu reserváu pa los talleres de deporte adaptáu que va impartir la Federación de Deportes pa Persones con Discapacidá Física del Principáu d’Asturies (FEDEMA), programaos de 12:00 a 14:30 los trés díes y de 17:00 a 20:00 el vienres y el sábadu.
El vienres, a partir de les 17:00 hores, va impartise nel quioscu de la música una masterclass d’echar de sidra y una exhibición de campeones. La tonada tamién va tar presente nesi mesmu allugamientu con dos conciertos de l’Asociación de la Canción y el Folklore Valle del Nalón y l’Asociación de Intérpretes de la Canción Asturiana, respectivamente: el primeru, el sábadu a les 17:30 y el segundu, el domingu a les 12:30.
Nos trés díes, va haber pasucáis del grupu folklóricu Virgen del Otero, los Gaiteros del Carbón, la Banda de Gaitas Casa de Asturias de Guadarrama y la Banda de Música de Llaviana. Tamién va actuar la Banda de Acordeones de Villoria.
La programación d’esta edición tamién inclúi una exhibición de la Unidá Canina de Rescate del Principáu, que se va realizar nel parque de los Príncipes el domingu 10 a partir de les 12.30 hores.
Amistades Peligrosas y Dixebra, y Texedor y Hevia van zarrar con dos conciertos nel escenariu de la plaza del Conceyu les xornaes del vienres y el sábadu.
Programación infantil y globu aerostáticu
Otru de los encantos pal públicu que visite La Pola Llaviana va ser la exhibición del globu aerostáticu que’l Gobiernu d’Asturies contrató como soporte promocional turísticu del lema Paraísu Natural, que va realizar 50 vuelos cautivos dende’l prau Nardón el vienres y otros tantos el sábadu, reservando enantes nel siguiente teléfonu: 902 306 600 / 985 185 860 (de 10:00 a 16:00 h).
El conciertu del grupu Cantares de… y pa neños el vienres a les 19:30 nos xardinos de Palacio Valdés, na localidá d’Entrialgo, va ser mui prestosu pa de los más pequeños con melodíes tradicionales asturianes emplegaes en xuegos y actividaes cotidianes.
Y mesmo’l sábadu que’l domingu a les 13:00, nel espaciu Xoven del CIDAN, vamos disfrutar cola compañía Tras la puerta títeres de dos propuestes teatrales diferentes cada día dirixíes a públicu infantil.
El Trasiegu Fest, festival de la cultura sidrera asturiana contemporánea, ta acabante de dar anuncia de tolos artistes musicales que van facer presencia nel festival al rodiu de la bebida d’Asturies. D’esta manera, hasta 8 grupos van pasar pelos escenarios sidreros.
D’una banda, la nueche del vienres 22 de setiembre va ser el momento nel que’l grupu folklóricu Trebeyu entame, magar de les 21:00 hores, una nueche en mayanza na plaza del conceyu de Santolaya de Cabranes. Pela otra parte, el sábadu va empecipiar cola música de Los Gascones, que van tocar peles cais de la mesma llocalidá. A la tarde, va empezar la nueche musical. Mientres casi 8 hores, Luis Núñez y los Folganzanes, Algaire, La Tarrancha y Llevólu’l Sumiciu van poner la nota musical al Trasiegu Fest, de nueves, na plaza del conceyu de Santolaya de Cabranes. El domingu, día de clausura d’un festival que va allargase dende’l 18 al 24 de setiembre, tamién va tener actuaciones musicales. Mestura y David Varela fadrán de la mañana un momentu pa esfrutar de la música asturiana cola reciella na Casa de la Cultura de Santuyano, nel Conceyu Bimenes.
Nos próximos díes, el Trasiegu Fest va dir confirmando toles actividades qu’engloben a esti festival de la cultura sidrera asturiana contemporánea, onde va haber, amás de música y danza, talleres, charres, lliteratura y gastronomía.
El Trasiegu Fest ye un proyectu que naz col envís d’amosar la bayura de la cultura sidrera n’Asturies. Pa ello, tando na sociedad d’anguaño, ye importante facelo al traviés d’un formatu modernu y que llegue al públicu. Poro, tamién ye bien importante sacar la cultura sidrera de los sos llugares habituales y treslladala a llugares populares y onde’l gran públicu pueda averase. Sicasí, caltener les ubicaciones ye esencial pal desenvolvimientu de l’actividá. Esti festival, va desenvolvese nos conceyos de Sariegu, Bimenes, Colunga y Cabranes, toos ellos enmarcaos dientro de la Mancomunidá Comarca de la Sidra, na postrer selmana del mes de setiembre. Entama VerAsturies cola collaboración de Cuatro Gotes Producciones y los conceyos de Bimenes, Cabranes, Colunga y Sariegu, amás del sofitu del Plan de Recuperación Tresformación y Resiliencia.
CometCon, la feria d’ociu alternativu de referencia nel norte d’España, espera bater el récord de 24.000 asistentes del añu pasáu, gracies a la so variada programación d’actividaes y a los sos grandes y peculiares artistes invitaos. La undécima edición de la CometCon, que se va celebrar del 1 al 3 de setiembre nel Recintu Ferial Luis Adaro de Xixón, va complementar la so ufierta d’ociu alternativu habitual con talleres, charres y esposiciones rellacionaes cola ilustración, videoxuegos, música, ciencia ficción, rol, baille o cómics, ente otros.
“La Cometcon pon el broche final a un branu xixonés cargáu d’actividaes y xusto dempués de la fiesta de la sidra. El festival, consolidándose como polu d’atracción del comic y cosplay del norte d’España, supón un revulsivu cultural y turísticu mientres la primer
selmana de setiembre. Atrai a visitantes de toa Asturies y tamién turistes interesaos cada vez mas polos intereses que son amosaes nel Recintu ferial Lluis Adaro”, afirma Ángela Pumariega, primer teniente d’Alcaldesa del Conceyu de Xixón.
El cosplay, una práctica onde les persones vístense y actúen como personaxes de ficción
de diverses obres, como películes, cómics y videoxuegos, va siguir siendo una de les
grandes protagonistes de la CometCon. Ente los sos invitaos va tar Siwen Cosplay, una cosplayer francesa especializada na creación d’armadures y props con espluma foam y otros materiales, que va tar presente nel so stand a lo llargo de los 3 díes con prints, props y cosplays.
Baltes of Lightning, cosplayer y tiktoker sevillana, lleva dende 2010 diseñando cosplays
más ellaboraos, y asistió a bien de eventos como convidada cosplayer y concursante. Amás, encánta-y realizar actuaciones ya interpretar a los sos personaxes favoritos. Pela so parte, Lala Mercury, va participar como xuráu nel Cosplay Stage y la Pasarela Cosplay. Esta cosplayer granadina va realizar una charra de «Iniciación al Cosplay».
CometCon va convertir nel puntu de referencia de la innovación, les nueves tecnoloxíes
y l’emprendimientu maker del norte d’España. La undécima edición de la CometCon, que se va celebrar del 1 al 3 de setiembre na Recintu Ferial Luis Adaro de Xixón, va complementar la so ufierta d’ociu alternativu habitual con talleres, charres y esposiciones que van poner de relieve’l potencial innovador y científicu d’Asturies.
L’apueste de la CometCon por visibilizar les últimes novedaes en materia d’innovación lleva cuayándose mientres años sol nome de CometMaker. Fueron decenes d’empreses, entidaes y asociaciones -tantu d’Asturies como d’otres rexones- les que presentaron los sos productos más tecnolóxicos. «El fomentu de les vocaciones científicu- tecnolóxiques, por aciu talleres y charres, ye capaz de conectar a la ciudadanía coles empreses y l’alministración pública rellacionada cola innovación», afirma Héctor Lasheras, director de la CometCon.
El firme apueste de Xixón por esti ámbitu ta presente nel día ente día de les distintes iniciatives económiques y sociales de la ciudá. Luis Díaz, director xerente de Xixón Impulsa, afirma que “Xixón Impulsa tien de tar presente nos eventos en que la innovación, la tecnoloxía y, a última hora, los nuevos enclinos tán presentes. Amás, el perfil de públicu nuevu dexa animar y fomentar les vocaciones tecnolóxiques como opciones de futuru”.
La impresión 3D va tener presencia destacada gracies a la collaboración d’Escueye 3D o QuimiCafeina. Esti postreru ye un equipu de dos químicos apasionaos pola impresión 3D
y el diseñu dixital que’l so oxetivu futuru ye diseñar y producir recursos educativos para ayudar a profesores y alumnos a superar distintos tipos de conteníos, como química, física, matemátiques o bioloxía.
Los drones d’última xeneración tamién van tar presentes en CometCon de la mano de Esdronia, una empresa asturiana esperta en realizar soluciones eficientes ya innovadores
por aciu l’usu de drones para facilitar el resolvimientu de problemes. Siguiendo col ociu dixital, los asistentes van poder esfrutar de FADU -gracies a Aules del Futuru-, una actividá que permedia l’habilidá física y l’estratexa. Dambos factores son fundamentales dientro d’un equipu pa consiguir la victoria, yá que ye un xuegu tantu d’ataque como de defensa. Los xugadores determinen la configuración de les sos habilidaes antes del entamu de cada ronda (velocidá y tamañu de les boles, fuerza y duración del escudu, etc.), equí tomar de decisiones conxuntes tien una parte fundamental.
Anguaño tamién se va desenvolver el Indie Dev Play, una iniciativa que llega dende Barcelona, basada nunu de los meyores eventos Indie de Cataluña, el IndieDevDay. Los talleres STEAM van celebrar del 1 al 3 de setiembre en distintos horarios. El taller de Gafes de VR va celebrase’l 1 de setiembre de 13.30 a 15.00 y el 2 de setiembre de 18.00 a 19.30. Per otru llau, el taller de Drones va celebrase’l 1 de setiembre de 17.00 a 18.30h y el 3 de setiembre de 13.30 a 15.00. Los talleres de Videoxuegos Arcade van celebrase’l 2 de setiembre n’horariu de 13.30 a 15.00 y el 3 de setiembre de 17.00 a 18.30.