Xixón al día

Categoría: Tema del día

  • El Gobiernu d’Asturies dedica’l 8M a reivindicar los derechos de les muyeres col lema ‘Igualdá, motor de la democracia’

    El Gobiernu d’Asturies dedica’l 8M a reivindicar los derechos de les muyeres col lema ‘Igualdá, motor de la democracia’

    El Gobiernu d’Asturies dedicará’l 8M, Día Internacional de la Muyer, a reivindicar los drechos de les muyeres con una programación amplia y diversa baxo’l lema: Igualdá, motor de la democracia. La vicepresidenta, Gimena Llamedo, presidió güei la xunta del Conseyu Asturianu de la Muyer, na que se presentó’l cartelu y el programa, y destacó que “la igualdá ente muyeres y homes ye una conquista colectiva sostenida pola determinación y la valentía de millones de muyeres”. “Ensin igualdá nun esiste democracia, por eso Asturies va siguir avanzando, pasu ente pasu, escontra una sociedá más xusta, llibre ya igualitaria”, garantizó.

    L’actu institucional va tener llugar el sábadu 7 de marzu, a les 12:00 hores, nel Muséu Marítimu de Lluanco, en Gozón, y va contar cola intervención del presidente d’Asturies, Adrián Barbón.

    L’axenda diseñada pol Gobiernu d’Asturies con motivu del 8M abarca dende finales de febreru hasta abril y combina reflexón, sensibilización, cultura, deporte y reconocimientu institucional.

    Ente los hitos de la programación destaca la presentación del documental (In)visible, dirixíu por Estela Cubilla, que busca visibilizar la violencia de xéneru y sexual dende una doble perspectiva: per un llau, recueye esperiencies de la mocedá; per otru, incorpora un diálogu interxeneracional con persones espertes n’igualdá qu’arriquez el debate públicu. L’estrenu va tener llugar el 5 de marzu na sala Paraninfo de La Llaboral, en Xixón, y la pieza va emitise’l 11 de marzu na Televisión del Principáu d’Asturies (TPA).

    La programación refuerza, amás, l’impulsu a la coeducación cola presentación del sellu Centru Coeducador, una distinción del Gobiernu d’Asturies pa colexos ya institutos que destaquen pol so llabor na educación n’igualdá. Nesi marcu va rindise homenaxe a centros y profesoráu pol so trabayu sosteníu como palanca de tresformación social dende les aules.

    El capítulu de rellatos y referentes amplíase cola grabación del videu pódcast Construyendo futuru: voces de muyeres que faen territoriu, nel que delles emprendedores que dinamizen el territoriu dende ámbitos y conceyos distintos van compartir les sos esperiencies, retos y aprendizaxes. D’esta manera, va consolidase un espaciu de conversación que pon nel centru’l lideralgu femenín n’Asturies.

    La propuesta cultural inclúi la esposición Asturies, muyeres y movimientos, que va contar cola participación de la cantante Marisa Valle Roso. Per otru llau, en collaboración cola Axencia Asturiana de Cooperación Internacional, va celebrase la xornada Drechos de les muyeres: avances, resistencies y desafíos globales, que va contar cola intervención de la xurista Mar Esquembre, presidenta de la Rede Feminista de Derechu Constitucional, pa abordar los desafíos actuales.

    Los equipamientos culturales súmense a la conmemoración con actividaes que averen la igualdá al públicu xeneral y a les families. Asina, en La Morgal va celebrase la xornada Muyer y deporte, centrada en visibilizar el lideralgu y la participación de les muyeres nel ámbitu deportivu. El Muséu Arqueolóxicu d’Asturies va acoyer la charra Muyeres na práctica museal: diálogos ente Asturies y América Llatina, con espertes que van analizar la función de les muyeres nos museos y na investigación cultural. Nel Centru d’Arte Rupestre Tito Bustillo va impartise’l taller infantil Grandes muyeres vistes al traviés del collage y el Parque de la Prehistoria de Teberga va ufiertar una visita guiada sobre la representación femenina nel arte paleolíticu. Pela so parte, el Muséu Etnográficu de Grandas de Salime Pepe el Ferreiro va inaugurar la esposición En el umbral del olvido. Fotografíes d’Analía Pello, un proyectu que rescata oficios tradicionales en peligru.

    El programa d’actividaes, que combina formación, sensibilización pública, cultura, deporte y reconocimientu institucional, reafirma’l compromisu del Gobiernu del Principáu cola igualdá como política pública sostenida nel tiempu.

    L’oxetivu ye consolidar una mirada integral que, amás de celebrar llogros, permita siguir avanzando na reducción de breches y na garantía efectiva de drechos.

  • El PSOE pide la constitución urxente del Conseyu de Memoria Democrática tres una nueva concentración fascista n’Héroes del Simancas

    El PSOE pide la constitución urxente del Conseyu de Memoria Democrática tres una nueva concentración fascista n’Héroes del Simancas

    El PSOE esixe, una vegada más, la constitución del Conseyu de Memoria Democrática. Failo tres una nueva concentración fascista atribuyida a un partíu ultraderechista na escultura Héroes del Simancas. Como defendió la vocera del Grupu Municipal Socialista, Carmen Eva Pérez Ordieres, esti órganu tien, ente otres atribuciones, la d’espublizar los valores democráticos de tolerancia y respetu frente a la connivencia de les ideoloxíes contraries al civismu. “Ye urxente la constitución d’un órganu que sirviría pa promover los valores cívicos frente a les manifestaciones antidemocrátiques como la vivida esta fin de selmana. Ye más necesario que nunca dar cumplimientu a les lleis de memoria democrática énte les meyores de la estrema derecha”, señala.

    Pérez Ordieres recordó que’l reglamentu del Conseyu de Memoria Democrática s’aprobó en 2023 pero la llegada de la derecha al Conceyu paralizó la convocatoria. Los socialistes forzaron n’abril del añu pasáu la comparecencia de la conceyala responsable del área, Montserrat López Moro, coles mires de qu’esplicara por qué siguía ensin constituyir l’órganu consultivu, y aseguró entós que se formalizaría enantes de rematar l’añu. La vocera socialista denuncia, poro, que tamos énte un nuevu incumplimientu del gobiernu local, y anunció que volverá preguntar por ello na próxima Comisión de Cultura. “La conceyala de Foro lleva dándonos llargues dende l’entamu del mandatu no que paez un intentu d’aliase colos dogmes de los partíos de dereches colos que tien qu’apautar. El PP y Vox llevaben nel so programa electoral derogar les lleis de Memoria Democrática y, evidentemente, tamién el Conseyu de Memoria Democrática de Xixón. Lo que ta claro ye que Foro ta más allegáu a los postulaos defendíos en Colón que nos que defende la Europa de los derechos y les llibertaes”, añedió.

    El PSOE llamenta que precisamente de la mano de Foro la ultraderecha entró a formar parte del gobiernu llocal per primer vegada en periodu democráticu y, de magar, los discursos d’odiu abondaron nel nuesu conceyu. “Frente a ‘Héroes del Simancas’ hubo a lo menos dos concentraciones con espresiones fascistes nos postreros dos años, ensin que’l gobiernu llocal se pronunciara. Esta manifestación esixiría una condena espresa per parte de quien ta al mandu del nuesu Conceyu”, concluyó Pérez Ordieres.

  • Corto Xixón reivindica’l talentu asturianu na so 12ª edición

    Corto Xixón reivindica’l talentu asturianu na so 12ª edición

    Corto Xixón, celebra la so docena edición del 27 de febreru al 7 de marzu, pon el focu nel cine asturianu presentando más d’una ventena d’obres cinematográfiques de cineastes llocales, lo que supón cuasi la metá de la programación del certame.

    La convocatoria de curtios pa la 12ª edición de Corto Xixón, que va siguir abierta hasta esti domingu 15 de febreru, recibió yá casi dos mil curtios, batiendo de nuevu el so récord de participación, a falta de dos díes pa zarrar el periodu d’inscripción.

    La programación d’esti añu va cuntar con más de mediu centenar d’obres cinematográfiques, distribuyíes en cinco secciones. La Seición Oficial va presentar ventiún trabayos a concursu que podrán vese per primer vegada n’Asturies nel marcu de Corto Xixón. La Sección Documental va cuntar con nueve curtios, siendo ún d’ellos un estrenu mundial y los otros ocho trabayos que van poder vese per primer vegada n’Asturies. La Sección Conexones ta compuesta por cuatro obres con sellu iberoamericanu, toes elles tamién estrenu n’Asturies.

    Finalmente, los apartaos centraos nel cine asturianu, la Seición Asturies y la Muestrona, sumen un total de diecisiete trabayos, de los cualos cinco son estrenos absolutos y ún ye estrenu n’Asturies.

    Ente los nomes de los directores s’alcuentren Pablo Casanueva, Rodrigo Agüeria, Diego Flores o Inés G. Aparicio, ente otros.

  • El Gobiernu d’Asturies promueve la declaración de los primeros ocho llugares de memoria democrática

    El Gobiernu d’Asturies promueve la declaración de los primeros ocho llugares de memoria democrática

    La Conseyería d’Ordenación del Territoriu presentó una propuesta pa establecer los primeros ocho llugares de memoria democrática n’Asturies. Estos espacios, qu’inclúin tanto enclaves materiales como inmateriales, son fundamentales pal reconocimientu de los fechos venceyaos cola dictadura franquista y pa caltenelos como homenaxe a les víctimes. La propuesta foi presentada na xunta que celebró esta tarde la Comisión Técnica de Llugares de Memoria.

    La propuesta inclúi la Fosa del Sucu, en Xixón, promovida pol Institutu Asturianu de Memoria Democrática; la Fosa Común d’Uviéu; la Fosa d’El Rellán en Grau; el Pozu Fortuna en Mieres; la Fosa de San Miguel de la Barreda; la Quinta Pedregal n’Avilés; El Mazucu, en Llanes; y les Fuelgues del 62, estes últimes de calter inmaterial.

    La directora xeneral de Memoria Democrática, Begoña Collado, sorrayó qu’esta xunta representa “un pasu fundamental pa dar visibilidá y xusticia a quien sufrió les consecuencies del franquismu n’Asturies”, poniendo en valor la significación histórica y simbólica de caún d’estos espacios.

    La propuesta ellaborada pola Dirección Xeneral de Memoria Democrática incorpora non solo llugares físicos —como fosas comunes y otros vestixos de la represión—, sinón tamién el reconocimientu de les lluches sociales y históriques que marcaron la resistencia n’Asturies. L’apertura d’estos espedientes supón un finxu na xestión de la memoria democrática, al dotar a estos espacios d’un marcu xurídicu de protección. Nesti sentíu, Collado destacó que “ye un día importante: entamamos esta tramitación, considérense estos espedientes y póngense en marcha pa poder declarar, per fin, nel nuesu territoriu, llugares de memoria”.

    Con esti impulsu, la Conseyería d’Ordenación avanza na señalización y preservación d’estos puntos xeográficos y acontecimientos, garantizando’l so caltenimientu como espacios de recuerdu, xusticia y pedagoxía democrática pal conxuntu de la sociedá asturiana.

  • El gobiernu asturianu vuelve reclamar la suspensión del peaxe del Güerna

    El gobiernu asturianu vuelve reclamar la suspensión del peaxe del Güerna

    El Gobiernu d’Asturies volvió reclamar al Ministeriu de Tresportes y Movilidá Sostenible la suspensión del peaxe de l’autopista del Güerna (AP-66) énte les incidencies derivaes de les obres n’execución -tanto les venceyaes a la modernización de los túneles como les d’emerxencia y estabilización del argayu de payares de 2024- y poles llimitaciones recurrentes en carreteres alternatives como la N-630 (puertu de Payares) poles envernaes.

    Esta nueva comunicación, formalizada nuna carta del conseyeru de Movilidá, Alejandro Calvo, al secretariu d’Estáu de Tresportes, enmárcase nel siguimientu que’l gobiernu realiza sobro la situación de la AP-66. En particular, da continuidá al escritu unviáu’l 5 de xineru, nel que se sollertaba sobre l’impactu de les obres nel serviciu de la infraestructura y nos tiempos de desplazamientu.

    Na carta, refléxase que los rexistros oficiales de la Dirección Xeneral de Tráficu (DXT) acrediten que l’autopista viose afectada de forma simultánea y enllargada por dos actuaciones con impactu directu na so capacidá y funcionalidad. D’una banda, les obres de modernización y meyora de la seguridá nos túneles del Güerna, empecipiaes en 2025, que riquieron amenorgamientos de carriles, circulación per calzada contraria, estrechamientos y llimitaciones de velocidá. Per otra parte, los llabores d’emerxencia derivaes del argayu del 10 de payares de 2024, qu’obligó al corte total de l’autopista y a la posterior creación d’un bypass provisional, lo que supon un amenorgamientu efectivu de la capacidá nel tramu afectáu mientres s’executen los trabayos de estabilización.

    Estes circunstancies traduciéronse, según la DXT, n’incidencies repitíes clasificaes d’especial relevancia, con circulación irregular, velocidaes mui amenorgaes, retenciones enllargaes y paraes intermitentes, mesmo que medríes significatives de los tiempos de percorríu. Too ello afecta de forma directa al nivel de serviciu de la infraestructura.

  • El Festival L.E.V. celebra la so 20ª edición en 2026 y anuncia los primeros espectáculos audiovisuales en Xixón

    El Festival L.E.V. celebra la so 20ª edición en 2026 y anuncia los primeros espectáculos audiovisuales en Xixón

    El festival L.E.V. (Laboratoriu d’Electrónica Visual) celebra la so 20ª edición en 2026 y anuncia’l primer adelantu de directos audiovisuales que formarán parte de la so programación en Xixón. A lo llargo d’estes dos décades, el festival consolidóse como un espaciu clave pa la creación audiovisual, sonora y dixital contemporánea, y presenta una programación basada na esperiencia en directu y na investigación artística.

    Col sofitu del Ayuntamientu de Xixón y del Principáu d’Asturies, el festival celebraráse del 30 d’abril al 3 de mayu de 2026 y desplegará cuatro díes de programación en distintes sedes de la ciudá.

    Na so 20ª edición, el festival L.E.V. presenta una primer fola de programación marcada por estrenos internacionales y propuestes audiovisuales concibíes pal escenariu.

    El Teatru de la Llaboral acueye proyeutos d’alta integración audiovisual concibíos como performances escéniques, con trabayos centraos na abstracción, la precisión técnica y la investigación sobre percepción, sincronía y estructura audiovisual.

    Pela so parte, la programación de La Nave articula propuestes de live AV y performance sonora venceyaes a escenes post-club y esperimentales, onde la dimensión audiovisual se despliega dende’l pulsu rítmicu y la fisicidá del soníu.

    L’entornu natural del Xardín Botánicu Atlánticu va ser l’escenariu de clausura del L.E.V. y el contrapuntu a los espacios escénicos industriales, con una propuesta centrada na escucha y na inmersión sonora.

    El Teatru de la Llaboral concentra’l nucleu escénicu del festival, acoyendo propuestes concibíes dende una lloxica unitaria ente soníu, imaxe y dispositivu escénicu. L’escenariu conviértese nun sistema precisu que integra percepción, tiempu y espaciu.

    Alva Noto (Alemaña) presenta l’estrenu mundial de HYBR:ID PARA PARA, un nuevu capítulu de la so serie HYbr:ID, na que procesos basaos en datos se traducen n’arquitectures sonores y visuales d’alta precisión.

    L’artista xaponés Ryoichi Kurokawa vuelve a L.E.V. col estrenu mundial del so show nD, pieslle d’una triloxía entamada va más de dos décades y cuyes entregues anteriores yá formaron parte del festival. Concibida como un dípticu audiovisual, la obra esplora la sincronía estrema ente soníu ya imaxe.

    El colectivu taiwanés NonTech (creáu pol fundador de NAXS Corp y NONEYE) presenta l’estrenu mundial de Ignorance Online: ev0, una propuesta de live cinema construyida como ficción especulativa alredor del entretenimientu inmersivu y la intelixencia artificial.

    La programación del Teatru de la Llaboral complétase con una constelación de performances que amplíen y matizen esti exa conceptual. Myriam Bleau (Canadá) y Pierce Warnecke (EE. UU.) presenten The End Product, una performance audiovisual que examina la esperiencia cotidiana de los entornos dixitales y les dinámiques d’estracción na economía de l’atención.

    Meuko! Meuko! & Hsiangfu Chen (Taiwán) desplieguen una propuesta que cruza electrónica esperimental y ritual contemporaneu, esplorando la materialidá del soníu y la so dimensión sensorial n’escena. Tacit Group (Corea del Sur) presenta una performance audiovisual na que procesos de machine learning xeneren dos intérpretes d’intelixencia artificial que interactúen col artista en tiempu real.

    Abul Mogard (Italia) presenta una performance basada n’arquitectures sonores denses centraes na resonancia y na escucha fonda. Corin (Australia / Filipines) y l’artista visual Tristan Jalleh (Malasia / Australia) presenten un directu audiovisual inspiráu nes mitoloxíes filipines de la creación y en narratives simbóliques ancestrales.

    La Nave concentra la programación nueche del festival y articula un espaciu dedicáu al club audiovisual y a les práutiques post-club. Nesti contestu de creación en direutu, la esperiencia constrúyese dende’l ritmu, la corporalidá del soníu y la interacción ente música, visuales y públicu.

    Destaca la collaboración ente μ-Ziq y ID:Mora (Reinu Xuníu / República Checa), un alcuentru ente dos trayectories clave de la electrónica contemporánea que dialoguen dende la esperimentación rítmica y la manipulación audiovisual en tiempu real.

    Xunto a ellos, Catnapp (Arxentina) presenta un directu que cruza enerxía club, performance vocal y presencia escénica, ente que Nova Materia (Francia / Chile) despliega una propuesta híbrida onde electrónica, xestu y materia sonora s’articulen dende una lloxica performativa y física.

    La artista británica NikNak presenta un nuevu live AV, una propuesta construyida a partir del turntablism que sitúa la manipulación del soníu como actu performativu y espande’l llinguaxe del club escontra territorios d’investigación sonora y audiovisual.

  • Pasión pol turismu rural: 372 bonos vendíos nel primer día

    Pasión pol turismu rural: 372 bonos vendíos nel primer día

    El Gobiernu d’Asturies punxo en marcha una nueva campaña de bonos de turismu rural, que nun solu día consiguió una notable rempuesta tanto del sector empresarial como de la ciudadanía. Asina, nes 24 hores que lleven en marcha estos descuentos yá se vendieron 372 bonos y la rede d’agospiamientos axuntaos creció de forma notable, casi un 73%, al pasar de los 208 rexistraos en 2025 a los 360 d’anguaño.

    Esta campaña yá sirvió pa impulsar el turismu rural l’añu pasáu. En 2025, Asturies algamó’l so récord históricu nesti tipu d’establecimientos, con 304.979 visitantes. Amás, rexistró un aumentu de visites del 9,6% ente setiembre y avientu, los meses nos que tuvieron activos los descuentos.

    Esta iniciativa, concebida pa dinamizar l’actividá y aguiyar el consumu, dexa a la ciudadanía esfrutar de la ufierta turística d’Asturies con ventayes económiques, al beneficiase d’estancies n’agospiamientos de turismu rural a metá de preciu.

    Los bonos, que pueden descargase dende ayeri, van tar disponibles hasta que s’escosen. Van poder canxease hasta’l 31 d’avientu de 2026, coles escepciones del 1 de mayu, Xueves y Vienres Santu, y el periodu entendíu ente’l 1 de xunetu y el 15 de setiembre.

    Esti sector, líder del turismu rural na España Verde —formada por Asturies, Galicia, Cantabria y el País Vascu—, destaca pola so ufierta d’ecoturismu, la so biodiversidá y el so enfoque sostenible, y constitúi una de les señes d’identidá del turismu asturianu.

    Con esti nuevu impulsu, l’Executivu autonómicu refuerza una política turística empobinada al equilibriu territorial, el sofitu al texíu empresarial del mediu rural y el refuerzu d’un modelu que favorez l’actividá mientres tol añu.

  • El PSOE denuncia l’abandonu del proyectu del Hogar de Ciares

    El PSOE denuncia l’abandonu del proyectu del Hogar de Ciares

    El Grupu Municipal Socialista va llevar a Plenu’l proyectu del Hogar del Productor de Ciares al comprobar nel espediente que lleva paráu dende, lo menos, mayu del añu pasáu. Va preguntase por esti asuntu dempués de que l’alcaldesa anunciara nel alderique del estáu del conceyu que la obra yá taba en llicitación por 1.200.000 euros, pero lo cierto ye que nun se realizó nenguna actuación nestos últimos meses. “Nun se produció nenguna meyora alministrativa, nun se movió nin un papel. Queremos que’l gobiernu local esclarie por qué Carmen Moriyón afirmó públicamente que la obra taba yá en llicitación cuando, según consta nel mesmu espediente, dichu trámite nun se realizó”, aseguró la vocera Carmen Eva Pérez Ordieres en rueda de prensa.

    Coles mesmes, los socialistes constataron qu’hai trámites paralelos imprescindibles que tampoco se tán llevando a cabu. Son los requerimientos del Conseyu de Patrimoniu del Principáu pa que l’edificiu entre nel Catálogu Urbanísticu y pa que se revise’l proyectu d’obra tanto no relativo al ascensor como a la fachada. “Nada d’esto se fixo. ¿Por qué nun se tán realizando los trámites pendientes? Ensin ellos, nun pueden siguir alantre col proyectu del Hogar del Productor de Ceares”, denunció Pérez Ordieres.

    La conceyala socialista Carmen Eva Pérez Ordieres amuesa, por tanto, la so esmolición poles contradicciones que treslladen a les vecines y vecinos del barriu, a quien aseguraron, amás, que les obres pa la rehabilitación d’esti emblemáticu edificiu empezaríen en septiembre del añu pasáu. “La realidá ye mui distinta. Nin siquier va podese licitar el proyectu hasta que la Universidá Europea abone l’importe correspondiente a la finca del Parque Científico y Tecnolóxico na que se va a instalar”, señaló.

    Pa concluyir, la vocera llamentó qu’esti asuntu “vien engrosar esa llista d’asuntos que nun superen el nivel d’infografía pero que’l gobiernu vende como realidá aumentada, queriendo faer ver a la ciudadanía qu’hai lo que nun esiste. Tamos énte un exemplu más de la política de ficción a la que nos tienen avezaos”.

  • Iniciativa pol Asturianu denuncia l’incumplimientu d’un compromisu pa modificar cartelería cola toponimia deturpada en Xixón

    Iniciativa pol Asturianu denuncia l’incumplimientu d’un compromisu pa modificar cartelería cola toponimia deturpada en Xixón

    Iniciativa pol Asturianu fizo llegar una quexa al Conceyu de Xixón a finales del mes d’agostu una quexa pol incumplimientu de la toponimia oficial de Xixón na cartelería de les nueves cámares de seguridá distribuyíes pela zona rural de Xixón. Nel caxetín de les nueves equipaciones electróniques de seguridá apaez únicamente la toponimia deturpada de ‘Gijón’.

    La organización de reivindicación de llingüística argumentó nel so escritu que que’l cumplimientu de la toponimia ye un mandatu de la Llei d’Usu y Promoción del Asturianu, qu’establez nel so artículu 15, relativu a la toponimia, que “los topónimos de la Comunidad Autónomadel Principado de Asturias tendrán la denominación oficial en su forma tradicional”; amás la toponimia oficial del conceyu de Xixón ta recoyida nel Decretu 105/2006, de 20 de septiembre, de 20 de setiembre, pol que se determinen los topónimos oficiales del conceyu. La entidá tamién llamentó na comunicación que nun paecen de recibu que se dean estos pasos atrás na visibilización y normalización de la toponimia oficial y de la llingua asturiana. Asinamesmo, solicitó’l cambéu de la pegadiella col logotipu del conceyu col nome en billingüe pa dar cumplimientu a la llexislación vixente en materia toponímica.

    El Conceyu de Xixón retrucó’l 19 de septiembre de 2025 al escritu acusando’l recibu del mesmu y comunicando que se diera treslláu de la mesma al serviciu correspondiente” añandiendo que “al respeuto, la Policía Local informa que siera avisu a la empresa instaladora pa que proceda a la so subsanación”.

    Depués de la confirmación de la modificación de la cartelería p’adaptala a la llexislación vixente, los carteles siguen igual cola toponimia deturpada. Nesi sen, Iniciativa pol Asturianu considera preocupante l’escaezu del usu de la toponimia oficial nuna montonera d’actividaes, cartelería y comunicaciones del conceyu xixonés, pero amás llamenta la falta de compromisu colos propios compromisos de la institución.

    La presidenta d’Iniciativa pol Asturianu, Arantza Margolles, aprovechó pa solicitar más celeridá nel cumplimientu de los compromisos del Conceyu de Xixón y un apueste firme pol usu de la toponimia oficial. Margolles declaró que “l’usu de la toponimia oficial nun puede depender del conceyal de turnu o de la naturaleza del actu. L’usu del topónimu oficial de “Xixón” tien que ser tresversal a l’acción de gobiernu y en toles conceyalíes del mesu, como ye’l casu de la cartelería de les cámares de videovixilancia de la zona rural que cinco meses dempués de confirmar el cambéu siguen cola toponimia deturpada”.

  • Mocedaes Socialistes de Xixón denuncia que l’alcaldesa se ríe de la mocedá de la ciudá nel so discursu sobre vivienda

    Mocedaes Socialistes de Xixón denuncia que l’alcaldesa se ríe de la mocedá de la ciudá nel so discursu sobre vivienda

    Mocedaes Socialistes de Xixón llamenta fondamente’l tonu y el conteníu del discursu de l’alcaldesa nel Alderique sobre l’Estáu del Conceyu, nel que volvió falar de la política de vivienda como si fuera un ésitu mientres miles de mozos xixoneses nun pueden emancipase nin aportar a una vivienda digna.

    Pa la organización xuvenil socialista, les palabres de l’alcaldesa non solo demuestren una falta d’autocrítica, sinón que supon una auténtica burlla escontra una xeneración que vive atrapada ente arriendos imposibles, precariedá llaboral y ausencia d’alternatives públiques reales. “Falar de planes y de xestión intelixente mientres la mocedá vese obligada a colar de Xixón o a siguir viviendo coles sos families ye, cenciellamente, rise de nós”, señaló Pablo Blanco.

    Les Mocedaes Socialistes consideren que’l llamáu Plan Llave, presentáu otra vegada más como la gran solución municipal, nun ta dando respuesta a la urxencia habitacional de la mocedá, y denuncien que’l gobiernu local sigue ensin impulsar polítiques valientes que garanticen vivienda pública n’arriendu afayadizu.

    “Xixón precisa una política de vivienda pensada pa quien güei nun pueden empecipiar el so proyectu de vida equí. Y eso pasa por aumentar de verdá el parque públicu de vivienda, regular el mercáu del arriendu y esixir al Principáu y al Estáu cooperación real, non discursos trunfalistes”, añedió Blanco.

    Mocedaes Socialistes de Xixón repite’l so compromisu de siguir defendiendo’l derechu de los y les moces a vivir na so ciudá, y esixen a l’alcaldesa que dexe de facer propaganda y empiece a ufiertar soluciones reales.