Xixón al día

Categoría: Tema del día

  • La Federación de Patinaxe contradiz la versión del equipu de gobiernu de Moriyón pola renuncia a la Copa de la Reina

    La Federación de Patinaxe contradiz la versión del equipu de gobiernu de Moriyón pola renuncia a la Copa de la Reina

    La Federación Española de Patinaxe salió nes últimes hores de la tarde d’ayeri en defensa propia tres les declaraciones de Jorge Pañeda, conceyal de Deportes y Educación, nel que xustificaba la renuncia a la organización de la Copa de la Reina pa la edición del añu 2026. La Federación denuncia la falta total de comunicación” del edil dende mayu y niega rotundamente que s’endurecieren les condiciones p’allugar el tornéu. Coles mesmes, describe que delles de les sos afirmaciones «falten de forma mui grave a la verdá de los fechos».

    La defensa de la propia federación argumenta que l’Ayuntamientu nun contactó con ellos dende’l mes de mayu. Según la Federación, l’últimu intentu d’establecer contactu tuvo llugar el 17 de mayu, cuando’l director xeneral, Xavier Moyano, unvió un mensaxe a Jorge Pañeda al traviés de WhatsApp, coles mires d’alcordar una xunta p’avanzar na organización del eventu. El conceyal respondió indicando que s’atopaba fuera del país y propunxo volver a entamar el diálogu ente’l 26 y el 30 de mayu. “De magar, efectuáronse numberoses llamaes ensin llograr respuesta dalguna. Nun esistió nengún tipu de comunicación posterior per parte del Conceyu nin de los sos representantes”, destaca la RFEP.

    L’organismu tamién recuerda que la Copa de la Reina 2025 terminó celebrándose en Cerdanyola, el pasáu mes de xunu, “precisamente por cuenta de la incertidume sobre la so realización en Xixón, tal como se prometiera primeramente dende la conceyalía, que nun comunicó la so negativa definitiva hasta últimu momentu”. Según la RFEP, el Conceyu yera “dafechu consciente” de les feches propuestes pal eventu.

    En cuanto al antecedente de 2025, la Federación espón la so propia versión de los fechos. “A empiezos d’anguaño, el Sr. Pañeda manifestó’l so interés n’acoyer la edición de 2025, coincidiendo col 30º aniversariu del Telecable HC. Sicasí, más p’alantre informó verbalmente de que nun podríen asumir el compromisu por motivos presupuestarios, plantegando retardar la celebración a 2026”. Dende esi momentu, aseguren, “tou intentu de reactivar el diálogu per parte de la RFEP foi en devanéu”.

    Nun se trata, apunten, d’un casu aislláu. La RFEP sorraya qu’este mesmu patrón “repitióse n’ocasiones anteriores con otres competiciones, como la Copa Intercontinental, que finalmente tuvo llugar en San Juan (Arxentina) énte la falta de meyores per parte de Xixón”.

  • Alejandro Farpón va relevar a Noelia Ordieres como conceyal d’IX nel Conceyu a partir de setiembre

    Alejandro Farpón va relevar a Noelia Ordieres como conceyal d’IX nel Conceyu a partir de setiembre

    Alejandro Farpón, coordinador local d’Izquierda Xunida de Xixón, va asumir la segunda acta de conceyala de la formación nel Plenu del Conceyu a partir del mes de setiembre dando relevu a la conceyala Noelia Ordieres, quien comunicó esta mañana a la Coordinadora d’IX Xixón el so arrenunciu al cargu tres dos años dedicaos n’esclusiva al so llabor como conceyala. Ordieres deseya agora empecipiar una nueva etapa que-y dexe conciliar l’actividá política y el regresu a la so actividá profesional.

    L’hasta agora concejala d’IX va formalizar l’arrenunciu al cargu nel Conceyu’l próximu mes d’agostu y va siguir coles sos responsabilidaes orgániques n’IX d’Asturies, yá que s’incorporó a la dirección a propuesta de la dirección local tres la última asamblea de la formación pa facese cargu de la política llingüística. La Coordinadora d’IX Xixón estimó güei el trabayu desempeñáu por Ordieres nel Conceyu mientres estos dos años, nos qu’el so llabor resultó fundamental en proyectos clave del programa políticu de la formación, como’l cambéu de modelu de los comedores escolares, el refuerzu de los servicios sociales, la promoción del deporte femenín o l’accesibilidá urbana. La dirección destacó tamién el trabayu desenvueltu pola conceyala na promoción del asturianu o en materia de bienestar
    animal.

    A partir de setiembre va ser Alejandro Farpón quien va tomar el relevu. Xixonés de 36 años, ye maestru d’Educación Primaria y anguaño xefe d’estudios del colexu públicu Pumarín. Venceyáu al barriu de Nuevu Xixón dende la so infancia, n’abril de 2024 foi escoyíu por unanimidá coordinador local d’IX en Xixón. Cola so incorporación al Grupu Municipal d’IX, que va coincidir col entamu de la segunda metá del mandatu, la formación va dar continuidá al proyectu políticu empecipiáu en 2023 y va buscar imprimir un nuevu impulsu a la so iniciativa política municipal pa visibilizar una alternativa d’izquierdes al actual gobiernu de Foro y PP.

  • Muerre l’expresidente asturianu Antonio Trevín

    Muerre l’expresidente asturianu Antonio Trevín

    Antonio Trevín Lombán, l’home que foi maestru, presidente d’Asturies, delegáu del Gobiernu, conceyal y alcalde que dio forma a la so Llanes d’adopción, finó esti miércoles a los 69 años na so casa de Llanes tres meses lluchando contra un cáncer de páncrees. En xineru’l presidente Adrián Barbón anunció que se-y apurriría’l máximu galardón institucional de la comunidá, la Medaya d’Asturies, pola so entrega vital al serviciu públicu».

    Dende tolos muérganos políticos vienen dándose pesames y reconocencies a la so figura, especialmente na FSA, de la que formaba parte. “Güei los y les socialistes d’Asturies lloramos la perda d’unu de los nuesos, d’un socialista comprometíu, d’una persona con fondos valores de xusticia, solidaridá ya igualdá, de daquién que trabayó mientres tola so vida con tenacidá, seriedá y sentíu de serviciu públicu”, señala’l secretariu d’Organización de la FSA-PSOE, Luis Ramón Fernández Huerga.

    Pela so parte, dende FORO Asturies, l’alcadesa de Xixón Carmen Moriyón llamentó «fondamente’l fallecimientu del presidente Antonio Trevín, a quien aínda-y quedaba muncha vida per delantre. La so figura forma, de xuru, parte intrínseca de la política asturiana».

    Asociaciones como Iniciativa pol Asturianu tamién amosaron el so pesar, destacando que’l presidente Trevín foi ún de los primeros dirixentes de la FSA-PSOE que, a mediaos de los noventa, apostó claramente pola oficialidá. Asinamesmo, mostró siempres una defensa del patrimoniu llingüísticu, reconociendo la difícil situación del idioma pola perda de falantes. Foi de los primeros conceyales en xurar el so cargu n’asturianu na corporación llanisca. L’ex alcalde de Llanes y ex presidente del Gobiernu asturianu recordaba tamién nos debates sobre esta cuestión y n’entrevistes que la previsión constitucional sobre les llingües ye mui clara. Siempres insistía nel mandatu sobre les llingües que recueye la Carta Magna: “La riqueza de las distintas modalidades lingüísticas de España es un patrimonio cultural que será objeto de especial respeto y protección”. Trevín trató siempres de quitar prexuicios sobre la oficialidá dientro del so partíu y tamién dende la sociedá civil. Collaboró como patronu de la Fundación Caveda y Nava, coleutivu apartidista que, demientres una década, dedicóse a consiguir nuevos consensos sobre la oficialidá de les llingües propies.

  • Iniciativa pol Asturianu participó, un añu más, nel HIGA! 2025 en Vitoria-Gasteiz

    Iniciativa pol Asturianu participó, un añu más, nel HIGA! 2025 en Vitoria-Gasteiz

    Iniciativa pol Asturianu, organización de reivindicación llingüística comprometida cola defensa, promoción y revitalización de la llingua asturiana, tuvo presente un añu más nel alcuentru HIGA! 2025 na ciudá de Vitoria-Gasteiz. Víctor Manuel Fernández, vocal delegáu de la entidá en Madrid, foi el representante de l’asociación nesta convocatoria de mocedá falante de diferentes idiomes minorizaos pa presentar la realidá llingüística del asturianu y tamién pa conocer midíes que se podríen implementar n’Asturies pa llograr nuevos espacios de normalidá pal idioma.

    Esti certame de mocedá falante de llingües minorizaes pretende revitalizar los idiomes y fomentar la collaboración ente diferentes comunidaes llingüístiques a nivel mundial. La convocatoria xenera un espaciu pa que les nueves xeneraciones revitalicen les llingües de les sos comunidaes, aprendan y practiquen estratexes pa llograr caltener la so cultura y patrimoniu, y formen, al mesmu tiempu, redes de collaboración.

    A lo llargo del foru, el representante de l’asociación participó en dellos talleres y espacios de diálogu, compartiendo esperiencies y estratexes pa la preservación y el fortalecimientu del asturianu. De manera concreta, Víctor Manuel Fernández, representante de la entidá, recalcó la importancia d’integrar les llingües minorizaes nel ámbitu educativu -como afiten la Llei d’Usu y la Carta Europea de les Llingües- y tamién nel ámbitu tecnolóxicu pa garantizar la so tresmisión a les nueves xeneraciones; asina como aprovechar el potencial que podría tener la Intelixencia Artificial pal casu de la llingua asturiana.

    “HIGA! 2025 foi una plataforma prestosa pa texer redes con organizaciones afines de distintos territorios y pa visibilizar la riqueza llingüística que xeneren los idiomes. Munchos participantes treslladáronnos la importancia de cuntar col estatus d’oficialidá del asturianu y del eonaviego p’asegurar el futuru del nuesu patrimoniu llingüísticu”, destacó Fernández.

    Amás de la so participación nes actividaes programaes, Iniciativa pol Asturianu faló de dellos proyectos nos que collabora como ye’l casu del Archivu de la Represión Llingüística del Asturianu [ARLAS] que recueye testimonios de persones que sufrieron casos de discriminación llingüística y tamién de los grupos de conversación telemáticos n’asturianu. Les iniciatives pretenden, per un llau, reconocer a les persones que nun se-yos permitió falar asturianu y por otru acercar l’idioma a nuevos falantes.

    HIGA! 2025 axuntó a más de noventa representantes de comunidaes llingüístiques, asociaciones culturales y responsables institucionales, col oxetivu común de defender la diversidá llingüística y promover polítiques actives de protección de les llingües minorizaes en tol mundu.

  • La gran movilización social llogra la llibertá de Les 6 de La Suiza

    La gran movilización social llogra la llibertá de Les 6 de La Suiza

    La fuerte movilización social que se dio dientro d’Asturies y al traviés de tol Estáu español consiguió llograr un primer pasu haza la llibertá de Les 6 de La Suiza. Esti vienres, les autoridaes penitenciaries concedieronyos el tercer grau, lo que supón una importante meyora na so situación.

    Dende’l grupu de sofitu que lleva años reclamando la so llibertá, valórase esti pasu como un ésitu claru de la presión social, les movilizaciones, les campañes de sensibilización y el trabayu incansable del movimientu popular. «Ye un pasu importante, pero insuficiente. Dende’l colectivu de sofitu reclamamos que se les exima de cualquier réxime penitenciariu. Les 6 de La Suiza nun tendríen que tar suxetes a nenguna medía restrictiva», señalaron nun comunicáu públicu.

    Les movilizaciones, que se intensificaron nos últimos meses con concentraciones, actos públicos y campañes en redes, evidenciaron que’l apoyu popular ye una ferramienta imprescindible frente a la inxusticia.

    El casu de Les 6 de La Suiza convirtióse nun símbolu de resistencia, solidaridá y denuncia de les polítiques represives. La comunidá asturiana y los colectivos sociales a nivel estatal celebren esta victoria parcial ensin baxar la guardia na llucha pola llibertá total de toles represaliaes.

  • Izquierda Xunida plantega nuevos servicios pa ciclistes con estaciones de llaváu en Moreda y El Molinón

    Izquierda Xunida plantega nuevos servicios pa ciclistes con estaciones de llaváu en Moreda y El Molinón

    El grupu municipal d’Izquierda Xunida en Xixón vien de presentar una propuesta pa incorporar dos puntos de llaváu de bicicletes na ciudá. La iniciativa, que se debatirá na comisión municipal d’Urbanismu y Mediu Ambiente, busca dar un pasu más nel apoyu a la movilidad sostenible y al usu de la bici, tanto como mediu de tresporte como d’ociu.

    Javier Suárez Llana, voceru de la formación, esplicó que “nun ye abondo con tener una rede de carriles bici bien conetada, que ye esencial, sinón que tamién hai que dotar a la ciudá de servicios que faciliten y animen l’usu cotidianu de la bicicleta”. Nesi sentíu, propón instalar dos estaciones de llaváu como prueba piloto: una na zona oeste, nel parque de Moreda, y otra na parte este, cerca d’El Molinón.

    “En munches ciudaes europees y d’otres partes del Estáu esti tipu d’infraestructures yá son comunes. En Xixón sería un bon complementu pa lo que yá tenemos, como la estación de reparación de bicicletes nos Xardinos del Náuticu”, recordó Suárez Llana. Tamién comentó que “hai munchos vecinos que nun tienen un llugar adecáu onde llavar la so bici, porque la guardan en pisos, trasteros o garaxes ensin acomodos pa ello”.

    Mejoras nel serviciu d’aseos públicos en Cimavilla

    Amás, Izquierda Xunida va solicitar la reparación del aseo públicu del camín de La Fontica, xunto al skatepark de Cimavilla, que lleva meses ensin funcionar. Suárez Llana defenderá la necesidá de que l’Aplicación oficial Gijón/Xixón recueya información sobre la situación real d’estos baños, “pa que cualisquier persona pueda saber, dende’l móvil, ónde tán, si tán abiertos o si hai dalguna incidencia”.

    Con estes midíes, IU sigue apostando por una ciudá más accesible, cómoda y comprometida col mediu ambiente y cola ciudadanía que apuesta pola bici nel so día a día.

  • Folixa pola Paz: cultura y reivindicación contra’l militarismu en Xixón

    Folixa pola Paz: cultura y reivindicación contra’l militarismu en Xixón

    Xixón, 17 de xunetu de 2025 — Esti domingu 20 de xunetu vuelve la Folixa pola Paz, una xornada festiva y reivindicativa que se cellebrará ente les 12:00 y les 19:30 hores nel Museu del Pueblu d’Asturies de Xixón. L’eventu, que se presenta como una alternativa al espectáculu aéreu militarista que se celebra n’otres partes de la ciudá, quier ser un espaciu de convivencia, cultura y denuncia pacifista.

    La Folixa contará con conciertos, música popular, talleres infantiles, danza, cuentacuentos y comida pa toles edaes. Tamién habrá espacios de reflexión y encuentros pa reafirmar el compromisu col pacifismu y la cultura de paz.

    La organización —formada por colectivos sociales, culturales y pacifistes— esplica que l’oxetivu ye “amosar que hai otres maneres de cellebrar ensin glorificar la guerra nin el militarismu”, promoviendo valores de solidaridá, inclusión y defensa del bien común.

    Toes les actividaes son de baldre y abiertes al públicu, nun entornu únicu como ye’l Museu del Pueblu d’Asturies, que se tresforma n’escenariu d’esta folixa alternativa que yá ye una cita marcada nel calendariu social de la ciudá.

    ¡Tol mundu ta convidáu a participar y celebrar la paz con alegría y compromisu!

  • El Sporting presentó la so nueva camiseta na sablera de San Llorienzo énte cientos d’aficionaos

    El Sporting presentó la so nueva camiseta na sablera de San Llorienzo énte cientos d’aficionaos

    La sablera de San Llorienzo, unu de los escenarios más emblemáticos de Xixón, acoyó esti martes la presentación de la nueva camiseta del primer equipu del Real Sporting pa la temporada 2025/26. L’actu, que se celebró xunto a la escalera 12, contó con una gran presencia d’aficionaos, aproximao unos 600, que nun quixeron perder el momentu.

    La nueva equipación, que podrá mercase dende les 10:00 hores d’esti miércoles tanto na tienda oficial como na plataforma online del club, llama l’atención pol so diseñu d’estilu clásicu con toques modernos. Destaca’l cuellu blancu con un ribete coloráu, que s’estiende tamién a les manegues, amás de les rayes verticales que, esti añu, baxen hasta’l final de la camiseta, a diferencia d’otres temporaes.

    La elección del arenal de San Llorienzo como llugar pa esti actu nun ye casualidá: foi nesa mesma sablera onde l’equipu tuvo los sos entamos hai yá 120 años. De fechu, parte de la nueva campaña de socios grabóse nesi escenariu tan simbólicu. Nos años anteriores, les presentaciones fixéronse en llugares como’l Palaciu de Revillaxexéu, l’Acuariu de Xixón o’l muelle.

    Nel actu participaron xugadores del primer equipu como Nacho Martín, César Gelabert y Lucas Perrin, y les xugadores Antía y Rosa del equipu femenín. Toos ellos formaron parte d’un entreteníu partidillu na arena xunto a un grupu de guajes sportinguistes. Esta ye la cuarta temporada na que’l club viste con ropa de la marca Puma y la segunda cola empresa asturiana Siroko como patrocinador principal de la camiseta.

    Mentanto, l’equipu siguió colos sos entrenamientos nesta pretemporada. Esti martes pela mañana, los xugadores volvieron a exercitarse na Escuela de Fútbol de Mareo, onde se xuntaron dellos seguidores pa velos. Pa mañana ta prevista una doble sesión: pela mañana a les 09:30 hores, abierta al públicu, y pela tarde a les 18:00 hores, a puerta zarrada.

  • El Círculo Gijón Noega Baloncesto planifica yá la temporada 25/26 en Segunda FEB

    El Círculo Gijón Noega Baloncesto planifica yá la temporada 25/26 en Segunda FEB

    El Círculo Gijón Noega Baloncesto, que’l pasáu 25 de mayu roblaba l’ascensu a Segunda FEB, yá trabaya nos preparativos del so retornu a la división de plata del basket español. Esta mañana del miércoles 15 de xunetu, responsables del club dieron una rueda de prensa na sala de recepciones del ayuntamientu xixonés. Ente les novedaes, diéronse los detalles de la nueva campaña de socios 25/26, amás d’anunciar el primer fichaxe de la temporada que va entamar el prósimu ochobre.

    L’entrenador Nacho Galán, el presidente Carlos Rodellar, el conceyal de Deportes y Educación y presidente del PDN Jorge Pañeda y el nuevu fichaxe Javi Menéndez, foron los encargaos de tresmitir les novedaes, comunicar l’apoyu del consistoriu xixonés al club y animar tanto al equipu técnicu como al públicu a volcase col proyectu que se plantega con vistes pal regresu a lo qu’enantes fore la LEB Plata. Amás de los nuevos precios, anuncióse que les 100 primeres persones abonaes recibirán de regalu una camiseta conmemorativa cola que remembrar la emoción de la fase d’ascensu.

    El compromisu de la cantera, constante nel equipu xixonés, fíxose notar tamién esta mañana cola asistencia de dellos miembros de les categoríes moces, tanto masculines como femenines, que recibieron con ilusión al nuevu fichaxe. El naviegu Javi Menéndez vuelve p’Asturies tres del so pasu per Primera FEB, onde exerció d’ala-pívot nes files del TAU Castelló. Un primer fichaxe que vien a reforciar l’equipu de cara pa la campaña viniente y que de xuru va dar munches allegríes al públicu del Círculo

  • Les 6 de La Suiza entren finalmente a prisión por facer sindicalismu

    Les 6 de La Suiza entren finalmente a prisión por facer sindicalismu

    Les 6 sindicalistes de la CNT condenaes pol casu de La Suiza deciden ingresar voluntariamente en Villabona, según dicta la sentencia que les condena a 3 años y mediu de cárcel, anque siguen llamando a la protesta
     
    El Xulgáu de lo Penal nº1 de Xixón dictaba esti miércoles la orde de detención de les 6 cenetistes imputaes pol famosu casu de la Pastelería La Suiza. El delitu foi defender los derechos d’una compañera sobre la que la xerencia de la Pastelería La Suiza exercía acosu y abusos llaborales, tando amás embaranzada. Cuando van 8 años desque s’aniciare’l conflictu y énte la orde d’arrestu inmediatu dictada pol xulgáu, güei xueves 10 de xunetu de 2025, les 6 condenaes por facer sindicalismu ingresaben voluntaria y pacíficamente na prisión de Villabona, nun xestu qu’evita les detenciones a pie de cai y un mayor trauma pal so entornu. Les 6 cuerren peligru de cumplir hasta a 3 años y mediu por delitos de coacción continuada, nun casu amparáu pola famosa Llei Mordaza. Esta decisión del xulgáu asienta un precedente mui peligrosu que fai peligrar tol trabayu sindical escontra la defensa de los derechos llaborales y de llibre asociación, non sólo de la propia xente sindicalista, sinon de tola ciudadanía.
    El Xulgáu, na mesma llinia de servilismu pa cola patronal que vieno siguiendo mientres tou’l procesu, dictó ayeri miércoles autu de detención inmediata. Nun s’esperó pa esta acción pola resolución de la petición d’indultu apoyada pola mayoría social asturiana, tolos sindicatos de clase del estáu, el Gobiernu asturianu y el propiu Ministeriu de Trabayu d’España. Tampoco quiso’l Xulgáu xixonés dar tiempu al pronunciamientu del Tribunal Européu de Derechos Humanos, que tovía tá en procesu de considerar el recursu de revisión del casu presentáu pola defensa.

    Un capítulu nuevu, pero non un final

    La noticia del ingresu en prisión amuesa la capacidá de represión de la patronal a comuña col sistema de xusticia que l’ampara. Pero’l percorríu d’esti drama llaboral, que trai en fierros al movimientu obreru y a la sociedá asturiana dende hai yá 8 años, nun acaba col encarcelamientu de les 6 de La Suiza, sinon qu’ábrese una nueva etapa del mesmu.
    Nin un día tardaron en convocase nueves movilizaciones pa sofitar la llucha de les 6 de La Suiza.La primera, esta mesma tarde del xueves na Plaza‘l Conceyu de Xixón a les 19.30 y siguiendo mañana vienres cola convocada en Llión a les 12.00 énte la Subdelegación de Gobiernu. Miembros de la CNT y d’otros sindicatos mayoritarios afirmen que les movilizaciones van siguir hasta que s’indulte a les 6 compañeres encarcelaes.