Xixón al día

Categoría: Última hora

  • Universidá d’Uviéu y Ayuntamientu de Llangréu refunden la Casa de La Buelga como exa dinamizadora del Nalón

    Universidá d’Uviéu y Ayuntamientu de Llangréu refunden la Casa de La Buelga como exa dinamizadora del Nalón

    La Universidá d’Uviéu y l’Ayuntamientu de Llangréu van estrechar la so collaboración coles mires de refundar La Casa de la Buelga pa convertila nuna exa fundamental de dinamización del Valle del Nalón. La refundación de La Casa de la Buelga enmárcase dientro de la estratexa UOTerritorio, una iniciativa de la Universidá d’Uviéu que tien por oxetu vertebrar espacios, estructures y programes naquellos conceyos onde la institución académica asturiana nun tien campus universitariu, como en Llangréu.

    La collaboración ente dambes instituciones pal palaciu barrocu de Ciañu busca los siguientes oxetivos:

    • Establecer nel Valle del Nalón un espaciu universitariu que contribuya a activar la vida cultural, a responder a los retos d’Asturies y a ufiertar soluciones a los sos problemes.
    • Materializar el compromisu de la Universidá d’Uviéu con Asturies, la so cultura y el so patrimoniu cultural, per aciu la instalación de les cátedres de la Sidra d’Asturies y de la Cultura Minera.
    • Establecer en La Casa de la Buelga la sede del programa Universitariu de Mayores de la Universidá d’Uviéu (PUMUO), que va ufiertar un mínimu d’ocho asignatures y d’ocho talleres. Dada la orientación de la entidá, dos de les asignatures y dos de los talleres van tar centraos na cultura sidrera y na minera.
    • Convertir La Casa de la Buelga nel centru d’una actividá qu’estableza sinerxes coles instituciones y la comunidá civil: cursos d’estensión, de branu, aules d’estensión, talleres, ciclos de conferencies…
    • Establecer un espaciu d’alcuentru y cooperación colos axentes del territoriu: conceyos, fundaciones, asociaciones, empreses y ciudadanía.
    • Recuperar la biblioteca y espaciu d’estudiu, tanto al serviciu del estudiantáu universitariu, como de la sociedá del Valle del Nalón y como centru especializáu n’estudios sobre la cultura asturiana, especialmente la rellacionada cola cultura de la sidra y la cultura minera.

    Ignacio Villaverde recordó que la Estensión Universitaria ye una actividá fundamental pa la Universidá d’Uviéu que foi pionera nel so desenvolvimientu n’España. “El nuesu oxetivu ye promover y articular l’espardimientu de la conocencia, la cultura, l’arte y la ciencia na comunidá universitaria y na sociedá, con especial atención a les necesidaes de la so redolada”, destacó.

    La Estensión Universitaria cumple asina una doble función. D’un llau, la interna, espublizando conocencies na comunidá universitaria y promoviendo la interdisciplinariedá, l’alderique académicu y la fluidez na tresmisión de les innovaciones científiques, técniques o culturales. Y, d’otru llau, la función esterna, qu’afigura la concepción de la universidá como una institución dinamizadora del territoriu, arguyosa de la so cultura y el so patrimoniu cultural y comprometíu con Asturies.

    El rector sorrayó que, p’articular esi compromisu con Asturies, la Universidá d’Uviéu diseñó’l proyectu UOterritorio, qu’integra centros estables nos que se cunta con una actividá enriquecedora en materia d’estensión universitaria y proyección cultural, como ye’l casu del CSU (Centru de Servicios Universitarios d’Avilés) d’Avilés, al que se va sumar agora La Casa de la Buelga.

    Pela so parte, Roberto García señaló que “pa nós ye un momentu d’allegría ya ilusión. Tamos asistiendo al reverdecer de La Casa de la Buelga, que recupera l’actividá de la estensión universitario y sumo, per primer vegada, dos cátedres que son auténticos emblemes d’Asturies: la de la sidra y la de la minería. Ye un pasu que, ensin dulda, honra la nuesa identidá”.

    García añedió que’l Programa Universitariu pa Mayores de la Universidá d’Uviéu supón “una reconocencia al compromisu cultural del nuesu conceyu, que nel so día foi conocíu como’l kilómetru más cultu d’Europa. Axallá este seya solo’l primer pasu pa responder a les necesidaes formatives de los nuesos vecinos y pa que Ciañu vuelva ser un foru cultural vivu, abiertu, dinámicu y capaz d’impulsar la conocencia y la participación”.

  • El FICX medra en presencia asturiana en 2025

    El FICX medra en presencia asturiana en 2025

    La 63ª edición del Festival Internacional de Cine de Xixón (FICX) reafita’l so papel como plataforma esencial pal talentu local con una cifra ensin precedentes de 39 títulos con dirección o producción asturiana, o un fuerte anclaxe temáticu na comunidá. Esta selección tresversal intégrase nel escayu dorsal del certame, dende les principales competiciones internacionales hasta les secciones dedicaes a la esploración de la identidá fílmica y la memoria.

    El cine deasturianu va competir de tu a tu nes secciones de mayor prestíu. La Sección Oficial Competición Internacional Retueyos va acoyer a dos de los nomes asturianos más relevantes: Marcos M. Merino, que va presentar la so documental Plaza Mayor, una íntima semeya de Xixón qu’esplora’l tresformamientu urbanu, la memoria colectiva y el legáu industrial. Al pie d’él, la cineasta Amalia Ulman, criada en Xixón, torna al Festival cola so esperada Magic Farm, una irreverente sátira sobre’l mundu dixital que yá pasó per cites de cultu como Sundance y Berlín. La Sección Oficial de Curtiumetraxes tamién va cuntar con una doble presencia: Pablo Casanueva (quien yá compitió nel FICX con Luna), va presentar El día que tal, una semeya construyida al traviés de l’amistá y la reflexón sobre mieos tabú nel mediu rural. A él va xunise Diego Flórez, qu’estrena mundialmente Tolos fueos el fueu, una pieza urxente que desvela l’amenaza de la incineración de basures nes cuenques mineres y la disolución de la solidaridá obrera, reforzando’l compromisu social del so cine.

    El bloque Asturies Curtiumetraxes – Competición presenta nueve miraes atrevíes que dibuxen un mapa de les esmoliciones contemporanees d’Asturies. Nesta sección destaca IUS del tiempo, codirixda pol asturianu Roberto F. Canuto y Xu Xiaoxi, una hestoria LGBTIQ+ sobre’l choque xeneracional y el pesu de los prexuicios nel mundu rural. El certame acueye tamién a autores como Lía Lugilde con Saltar, un ensayu documental qu’afronta’l suicidiu nel territoriu, y Ana G. Argüelles, con Viena. Xixón, que reflexona críticamente sobre la crisis climática y la responsabilidá corporativa. La tradición se reexamina n’Alimaña, de Juan Villa, un drama sobre un mozu pastor engarráu al legáu destructivu del so padre. Julio de la Fuente afronta un revés vital y l’amor incondicional en Frío Otoño, un drama sobre una pareya acabante xubilar col so futuru puestu en xaque tres una cayida de la muyer. Una mujer que conocí llamada Yudita de Rodrigo Agüeria, ye un documental íntimu qu’esplora nuna revisión d’un pasáu vivío pero escaecío. Per otru llau, Cases de Jandro Llaneza plantega un exerciciu de docuficción n’asturianu sobre les cases vacíes y les voces que les habitaron. Completen la competición, Chicken Jazz d’Imanol Ruiz de Lara Osácar, un trabayu de ficción sobre’l fadiu y la casual recuperación de los suaños abandonaos; y Today, I Washed My Eyes in the River Bed de Hannah Mevis, una pieza esperimental qu’esplora la memoria y les narratives feministes rellacionaes colos llavaderos, enfocada nes muyeres de Les Regueres, proyectu desenvueltu nuna residencia en Llaboral Centru d’Arte y Creación Industrial.

    Los llargometraxes documentales y ficciones de la sección Esbilla afronten con fondura la hestoria y la cultura asturianes. El Festival va acoyer l’estrenu mundial de La PLACA, una familia de bien, de José Antonio Quirós, que s’adientra nel trauma familiar marcáu pol esiliu y una enigmática placa nun monte asturianu. Manuel García Postigo recupera la memoria colectiva con Perlora dende 1954, mientres que Valle Blanco, Gallo Negro d’Álex Galán esplora’l rural al traviés de la desapaición del urogallu. La sección complétase cola visión d’Alex Zapico sobre l’oficiu – casi estintu, de la xastrería asturiana en La imperfección y la paciencia, l’homenaxe al esiliu de María Luisa Elío en Volver a casa tan tarde de Celia Viada Casu, la oda a la figura de les fareres españoles que supón el llargumetraxe Anque seamos islas de Cristina R. Paz y la sátira en tonu de mockumentary Alquimia de Konchi Rodríguez.
    Finalmente, la sección Pases Especiales va acoyer dos obres de gran importancia pa la conversación fílmica asturiana. Tito Montero presenta cuartu 207_, un dispositivu cinematográficu qu’axunta a doce cineastes asturianos pa reflexonar sobre la esistencia y la identidá del cine n’Asturies, afondando nel alderique empecipiáu por Ramón Lluís Bande en Hotel Asturies. Amás, José Riveiro firma’l documental Savoy, 35 años y una noche, una emotiva repasada a la hestoria d’un local emblemáticu de la música en directu en Xixón, que se va complementar con un alderique sobre la situación de les sales de conciertos n’Asturies.

     

  • La Bien Querida emociona na seronda

    La Bien Querida emociona na seronda

    Llegamos ceo a la Cai de Pesu, onde ta’l Tribeca col golor de castaña asao nes cais d’Uviéu. La seronda trai golores y collores y un conciertu amiesta bien con ellos, especialmente un de La Bien Querida, que volvía a la capital asturiana gracies al ciclu Directos VibraMahou, que punxo a l’artista como una de les protagonistes d’esta temporada serondiega. Pasaes les 20 hores la fila llegaba hasta l’entamu de la Plaza del Riego pa entrar a la sala. Un públicu que falaba con calma y que foi entrando puntual y con entusiasmu a la sala. Enriba l’escenariu dos sielles e instrumentos sobrios contemplaben al públicu llegar. Un públicu que, dicho sea de pasu, esperó anque non ensin cierta inquietú por mor de la tardanza que retrasó l’entamu hasta’l cuartu d’hora pasáu de les 21 hores. L’horariu quiciabes pudo ser anunciáu con mayor claridá pa nun xenerar confusiones y qu’asina meyorara la esperiencia.

    El conciertu púnxose en marcha cola aparición nel escenariu de David Rodríguez, productor y acompañante a la guitarra d’Ana Fernández-Villaverde, voz, lletrista e imaxe total del proyectu La Bien Querida. Rodríguez colocó con parsimonia les botelles e instrumentos y col bagaxe de proyectos como Bach is Dead, Beef, Telefilme, Joel o La Estrella de David y se sentó. Al poco llegó Fernández-Villaverde ente los aplausos de los y les siguidores que como dixo “tan ehí dende l’entamu”. Asina, La Bien Querida arrincó’l conciertu, de pie, con “Podría haber sido” que n’acústicu gana una fondura mayor que na versión de toques electro-pop del so discu LBQ. El show, que nunca perdió la calidez e intimidá, siguió con lletres que suenen a himnu como “La Perra del Hortelano”: “Soy mi peor enemigo/ Soy buena, soy mala/ Soy todo, soy nada”, del so álbum Paprika. El directu foi ganando n’intensidá al adentrase en cantares como “La pieza que me falta” que recuerda a los discos caberos de Tulsa y les versiones más íntimes de PJ Harvey o Anna Calvi.

    La propuesta en directu de La Bien Querida na so versión “desbandada” caracterízase pola cenciellez y el focu na lletra y la emoción, al estilu de los/les cantautores de siempre, coles sos lletres qu’aluden a lo cotidiano y al dolor del amor o’l desamor, de pareya, o de familia, a la vida o la muerte. La llírica de La Bien Querida manca, como nel so “Naufragio” (tamién del álbum LBQ): “Si pudiera caminar, me iría, pero no duermo desde hace días” onde combina’l cantu con un breve recitáu poéticu que conmueve. El setlist final acutó los sos cantares más conocíos como: “Muero de amor”, “Dinamita” o “De momento abril” que pesie a contar con prácticamente una década, caltienen actualidá, frescura y amuesen una capacidá de facer cantares redondos y que funcionen a la perfección y que xeneraron una complicidá col so públicu. Pal pieslle’l grupu escoyó una versión d’un clásicu como’l “¿Por qué te vas?” de Jeanette, oda eterna a la ausencia que representa dafechu l’estilu y el fondu de la propuesta de La Bien Querida. El tastiu asina foi l’esperáu y daquién del públicu comentó con entusiasmu al rematar: “¡Los meyores 22€ que gasté!”. Ta claro que, l’artista, funciona, dispara y emociona col espíritu d’aquellos que saben del valor de lo sensible. Y, amás, el ciclu entá nun acaba: Grande Amore y Alba Reche van poner el ramu esti vienres 28 de payares na sala Estilo d’Uviéu.

    Asina la xente foi marchando pela Cai del Pesu y la Plaza de Riego, un públicu nel que se pudo ver artistes del panorama asturianu de distinta triba y xente variao que pon en valor una trayectoria onde lo importante son los cantares, la memoria y la celebración del arte y la cultura en directu. Que nunca nos falten les sales de conciertos o la capacidá d’emocionanos en seronda.

  • Barbón reivindica, nel 75 aniversariu de Fabada Litoral, que “Asturies ye, en sí mesma, una gran marca de calidá”

    Barbón reivindica, nel 75 aniversariu de Fabada Litoral, que “Asturies ye, en sí mesma, una gran marca de calidá”

    El presidente d»Asturies, Adrián Barbón, reivindicó güei el valor de la industria agroalimentaria asturiana nel actu de celebración del 75º aniversariu de Fabada Mariniega, celebráu na planta de Nestlé en Xixón. “Asturies ye, en sí mesma, una gran marca de calidá”, afirmó’l xefe del Executivu, quien tamién destacó’l papel de Litoral como embaxadora gastronómica de la comunidá en tol mundu.

    Mientres la so intervención, sorrayó que la fabada ye’l platu típicu por antonomasia d’Asturies yllendes d’Asturies. “Dicir fabada ye dicir Asturies”, señaló, de la que valoró el raigañu xixonés de la empresa y el so apueste por caltener los venceyos col territoriu.

    Barbón emponderó la trayectoria de la compañía, propiedá de Nestlé dende 1985, y la so capacidá pa combinar tradición ya innovación. Nesti sentíu, recordó campañes publicitaries icóniques como la de les güeles, que refuercen el venceyu emocional col orixe del productu.

    Con motivu del aniversariu, Nestlé anunció una nueva inversión pa modernizar la planta de Xixón, qu’alza a siete millones el desembolsu realizáu nos postreros cinco años. Barbón celebró esti apueste pol futuru, que garantiza la continuidá d’una instalación que da empléu a más d’un centenar de persones.

    Amás, Barbón señaló que’l modelu de Litoral puede sirvir d’inspiración pa otres empreses del sector agroalimentariou asturianu, especialmente nun momentu nel que los y les consumidores valoren cada vez más l’orixe, l’autenticidá y la calidá de los productos. “La industria agroalimentaria asturiana tien énte sí una gran oportunidá pa crecer, xenerar empléu y dinamizar el mediu rural”, afirmó.

    La celebración del 75º aniversariu foi tamién una ocasión pa reivindicar el potencial d’Asturies nel mapa européu de l’alimentación. “Dende Sebares hasta Xixón, Nestlé demostró qu’invertir n’Asturies ye apostar pola excelencia”, concluyó Barbón, animando a siguir construyendo una hestoria empresarial que xune tradición, innovación y compromisu col territoriu.

  • El Centru Niemeyer acueye cinco proyecciones, trés d’elles estrenos nacionales, de la 63ª edición del FICX

    El Centru Niemeyer acueye cinco proyecciones, trés d’elles estrenos nacionales, de la 63ª edición del FICX

    Per décimu añu consecutivu’l Festival Internacional de Cine de Xixón (FICX) podrá esfrutase tamién n’Avilés. El Centru Niemeyer acueye na so Sala de Cine Fran Gayo, ente los díes 16 y 20 de payares, cinco de los títulos que podrán vese nesta 63ª edición de la cita fílmica xixonesa.

    Les entraes pa ver estes cinco películes podrán adquirise dende güei, miércoles, 5 de payares, a les 11:00 hores, al preciu de 5 € por proyección. Los socios del Club Cultura qu’adquieran les sos entraes hasta’l día anterior a la respectiva proyección van poder beneficiase d’un descuentu de 2 € por entrada. Les entraes van tar a la venta na Taquilla y páxina web del Centru Niemeyer. Toles proyecciones van realizase en versión orixinal subtitulada al español o n’español directamente.

    – Las corrientes, Milagros Mumenthaler, Sección Esbilla (Domingu 16 de payares, 20:00 hores)

    – Emergency Exit, Lluís Miñarro, Sección Oficial Albar (Estrena n’España), Llunes 17 de payares, 20 hores)

    – Punku, J.D. Fernández Molero, Sección Xeneración Mutante (Estrena n’España), Martes 18 de payares, 20:00 hores)

    –  As Liñas Descontinuas, Anxos Fazáns, Sección Oficial Albar (Estrena n’España), Miércoles 19 de payares, 20:00 hores)

    – Aunque seamos islas, Cristina R. Paz, Sección Esbilla (Estrena Mundial), Xueves 20 de payares, 18:00 hores) + alderique cola directora

     

  • IX va presentar enmiendes al presupuestu pa que “Moriyón empiece a pagar lo que debe a los vecinos poles sovenciones de fachaes”

    IX va presentar enmiendes al presupuestu pa que “Moriyón empiece a pagar lo que debe a los vecinos poles sovenciones de fachaes”

    El voceru d’Izquierda Xunida nel Conceyu de Xixón, Javier Suárez Llana, anunció esta tarde, tres aconceyar cola Federación d’Asociaciones Vecinales, que la so formación va presentar enmiendes a los presupuestos pa que “Moriyón empiece a pagar lo que debe a les 155 comunidaes de vecinos a les que concedió sovenciones pa rehabilitar les fachaes de los sos edificios, pero nunca pagó. Los trés gobiernos de Moriyón atropen una delda que supera los 10 millones por subvenciones que concedíen, pero nun pagaben”.
    Suárez Llana criticó que “un Conceyu que debe más de 10 millones d’euros a los vecinos, en dellos casos por ayudes concedíes va más de 8 años, nun puede presentar un presupuestu nel que se contempla más dinero pa entamar un nuevu eventu navidiegu que pa pagar esta delda”, pa la que les cuentes de Foro y PP solo conseñen 115.400 euros.

    Per otru llau, el voceru d’IX coincidió cola Federación d’Asociaciones Vecinales a la d’enfear al Gobiernu municipal que se salte’l Conseyu Social y los Conseyos de Distritu na tramitación presupuestaria”, y acusó a Foro y PP de “torgar al texíu asociativu de la ciudá participar nel alderique más importante del añu”.

     

  • Constitúyese’l Conseyu de la Memoria Democrática d’Asturies

    Constitúyese’l Conseyu de la Memoria Democrática d’Asturies

    El Conseyu de la Memoria Democrática d’Asturies quedó constituyíu ayeri, tres la celebración de la so primer xunta. Mientres l’alcuentru, los miembros del órganu escoyeron como presidente al conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico.

    Esti conseyu ta integráu por representantes de diverses direcciones xenerales del Gobiernu del Principáu, partíos políticos con representación na Xunta Xeneral –sacante Vox-, la Universidá d’Uviéu, la Federación Asturiana de Conceyos (FACC) y les principales entidaes memorialistas.

    Mientres l’alcuentru, el conseyeru Ovidio Zapico destacó que la creación d’esti organismu supon “un pasu más pa fortalecer administrativamente les polítiques de memoria”. Nesti sentíu, recordó que nesta llexislatura tamién se punxeron en marcha l’Institutu de la Memoria Democrática y el Comité Técnicu. Sobre esti postreru, Zapico sorrayó que la so constitución depermite, ente otres funciones, planiar añalmente les exhumaciones.

    Zapico definió al Conseyu de la Memoria como “un foru d’alcuentru y participación” y anunció la puesta en marcha de dos comisiones de trabayu: una centrada nos llugares de la memoria p’avanzar na so declaración oficial, y otra que se va encargar del aspectu educativu de les polítiques de memoria que va afrontar “cómo treslladar los principios de verdá, xusticia, arreglu y garantía de non repetición al ámbitu educativu”.

    “L’oxetivu ye sensibilizar a la mocedá asturiana de lo que suponen estes polítiques y de lo que supunxeron aquellos años tan escuros de la nuesa hestoria, frente a lo que güei ye un periodu evidentemente de rellumanza en redol a la democracia ye una área esencial”, sentenció’l conseyeru.

  • El Festillingües entama esti vienres n’Avilés

    El Festillingües entama esti vienres n’Avilés

    Avilés acoyerá los díes 17, 18 y 19 d’ochobre la primer edición de Festillingües, un alcuentru cultural que cuenta cola collaboración del Conceyu d’Avilés y que va tresformar el Palaciu de Campusagráu nun espaciu pal alcuentru, el diálogu y la folixa  les llingües y les cultures.

     

    La conceyala de Normalización Llingüística, Ana Solís, y el direutor del festival, Inaciu Galán, presentaron la cita esti miércoles. En tres xornaes intenses, Festillingües convidará a reflexonar na riqueza cultural que supón el plurillingüismu y a disfrutar d’actividaes pensadas pa tol mundu: dende conferencies y meses redondes hasta conciertos, talleres y espectáculos al aire.

     

    El vienres 17 entamará’l festival abriendo’l mercáu de les llingües y les cultures, un espaciu que xunta asociaciones, editoriales y empreses culturales. Darréu habrá una mesa redonda alrodiu de la Intelixencia Artificial, les teunoloxíes y el futuru de les llingües minorizaes. Dempués, les creadores de conteníu en redes sociales Marina García y Elena Álvarez falarán del so proyeutu Asturxules, que tien miles de seguidores. La xornada va pesllase cola proyeición del documental ‘De güeles a nietes. La tresmisión xeneracional del asturianu’ y con una mesa redonda sobre creación artística moza en llingües minorizaes.

     

    La del sábadu 18 sedrá la xornada más intensa del festival. Entamará con un taller sobre les  llingües y la bayura llingüística pa dempués siguir con un foru de llinngües y cultures. La matinal completaráse con teatru de cai y la performance ‘Les verdaderes poses del home planta’. Yá pela tarde habrá un taller de creación musical pal públicu infantil, un taller de comedia l’arte pa la improvisación de llingües, una conferencia sobre prexuicios llingüísticos y diversidá y una visita guiada teatralizada alrodiu de la figura de Marcos del Torniello.

     

    Pa poner el ramu a la xornada del sábadu celebraráse la ‘Folixa de les llingües y les cultures’, con un recital poéticu y musical y la actuación de Mestura. Sedrá un conciertu festivu y collaborativo nel que les músiques y les lliteratures meceránse como símbolu de xuntura.

     

    Festillingües pesllará’l domingu 19 pela mañana cola proyección del documental ‘No se dice ye, se dice es. Represión llingüística na Asturies franquista’, producíu por Cuatro Gotes Producciones y el cuentacuentos pa la reciella ‘La curuxa Catuxa’.

     

    El festival tien el sofitu económicu  del Gobiernu d’Asturies y del Ministeriu de Cultura pa la promoción de la llectura.

     

    Programa de Festillingües

    Del 17 al 19 d’ochobre

    Palaciu de Campusagráu

    Vienres 17

    • 17:00 h. Inauguración del mercáu de les llingües y les cultures. Abiertu de 16:00 a 21:00 hores.
    • 17:00 h. Mesa redonda: ‘IA, tecnoloxíes y futuru de les llingües minorizaes’. Participen: Laura García (llingüista computacional), Aymara González Montoto (Verbéu, Asociación de Traductores Profesionales n’Asturianu), Próspero Morán (periodista) y Mikel García (Softastur).
    • 18:00 h. Conferencia ‘Asturxules. Una esperiencia de normalización na mocedá’, a cargu de Marina García y Elena Álvarez, responsables del proyeutu Asturxules
    • 19:00 h. Proyeición del documental ‘De güeles a nietes. La tresmisión xeneracional del asturianu’, producíu por Iniciativa pol Asturianu
    • 20:00 h. Mesa redonda: ‘La mocedá crea. Creación artística moza en llingües minorizaes’. Participen: Gala Valdés (ilustradora), Ferla Megía (músicu) y Blanca Fernández Quintana (escritora y cosplayer).

     

    Sábadu 18

    • 11:00 a 14:00 y 16:00 a 21:00 h. Mercáu de les llingües y les cultures
    • 11:00 h. Talleres sobre llingües y bayura llingüística
    • 12:00 h. ‘Foru de les llingües y les cultures’. Participen: Eleazar Jiménez (Fundación Secretariáu Xitanu), Lula Montes (Universidá d’Uviéu) y Arantxa Margolles (Iniciativa pol Asturianu)
    • 13:00 h. Teatru na cai: ‘ La figura del pelegrin’, a cargu de Sergio Buelga
    • 14:00 h. Performance ‘Les verdaderes poses del home planta’, a cargu de Francisco Priegue. Esterior del palaciu de Camposagrado
    • 16:00 h. Taller de creación musical pa la reciella, a cargu de Vero Rubio
    • 17:00 h. ‘Improvisando llingües. Taller de comedia dell arte’, a cargu de Sergio Buelga
    • 18:00 h. Conferencia ‘Prexuicios llingüíticos y diversidá’, a cargo de Ramón d’Andrés (Universidá d’Uviéu)
    • 19:00 h. Visita guiada teatralizada ‘Marcos del Torniello’, a cargu de Sergio Buelga.
    • 20:00 h. ‘Folixa de les llingües y les cultures’. Recital poético y musical interllingüísticu. Participan: Susana Gudín, Dani García Granda, Serveh Hozhabri, Inaciu Galán, María Esther García López y Marta Mori.
    • 21:00 h. ‘Folixa de les llingües y les cultures’. Conciertu multillingüe, cola actuación de Mestura

     

    Domingu 19

    • 11:00 a 14:00 h. Mercáu de les llingües y les cultures
    • 11:00 h. Proyección del documental ‘No se dice ye, se dice es. Represión llingüística na Asturies franquista’, producíu por Cuatro Gotes Producciones
    • 12:00 h. Cuentacuentos pa la reciella: ‘La curuxa Catuxa’
    • 14:00 h. Pieslle del festival
  • Xixón ya tien puestes les lluces de Navidá en delles cais

    Xixón ya tien puestes les lluces de Navidá en delles cais

    Les lluces de Navidá yá tán escolingaes en delles cais de Xixón, mui enantes del entamu oficial de les fiestes. En zones como la cai General Suárez Valdés, yá se pueden ver los primeros adornos lluminosos qu’anuncien la llegada de la Navidá. L’Ayuntamientu prevé que nos próximos díes se complete la instalación pel restu de barrios.

  • Zapico reivindica la xestión de Vivienda, que tresformó’l riesgu de perder fondos comunitarios nuna inversión de 55 millones

    El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, destacó güei na Xunta Xeneral que, gracies a la xestión de la Dirección Xeneral de Vivienda nos postreros dos años, Asturies pasó de tar en riesgu de perder 50 millones de fondos europeos a invertir casi 55.

    Mientres el plenu, en respuesta a una entruga del grupu parlamentariu popular sobre la execución de los recursos del Mecanismu de Recuperación y Resiliencia (MRR), Zapico sorrayó qu’estos fondos yá se tán utilizando. En concretu, les 570 viviendes públiques destinaes al arriendu afayadizu que cunten con esta cofinanciación tán llicitaes y n’execución en doce conceyos asturianos.

    A xuiciu de Zapico, la cuestión plantegada pol grupu popular sería más pertinente va dos años, cuando asumió’l cargu de conseyeru, por cuenta de la complicada situación que travesaba la conseyería, lo qu’inclusive llegó a poner en peligru’l desenvolvimientu d’estes actuaciones.

    Nesi contestu, rellató que, poques selmanes dempués de tomar posesión, foi convocáu a una xunta nel Ministeriu de Vivienda y Axenda Urbana (MIVAU), onde se-y plantegó la posibilidá de que’l Principáu arrenunciara a los 50 millones asignaos, yá que dende’l Gobiernu central considerábase invidable la so execución y contemplábase redirixilos a otres comunidaes más avanzaes na xestión.

    Zapico esplicó que’l so equipu pidió al ministeriu “un votu d’enfotu, xuna oportunidá” pa revertir la situación. “Meses dempués, en demostrando la nuesa capacidá pa reorganizar la estructura alministrativa de la conseyería y sacar alantre les llicitaciones, non solo se caltuvo l’asignación inicial, sinón que se nos concedieron más de cuatro millones adicionales, que dexaron impulsar una nueva promoción en Carreño”, añedió.

    Finalmente, el conseyeru reafitó’l compromisu del so departamentu col derechu a una vivienda digna, afayadiza y algamadiza pa tola ciudadanía, y contrapunxo esti modelu al de les comunidaes gobernaes pol Partíu Popular, que los sos responsables, según dixo, solicitaron na última conferencia sectorial destinar fondos europeos a financiar segundes residencies.