L’Ayuntamientu de Xixón, al traviés de la Fundación Municipal de Servicios Sociales, pon en marcha’l programa ‘Parque con apoyos. Tiempo de ocio, tiempo para ti’, una iniciativa piloto pa facilitar la conciliación de families con fíos y fíes con discapacidá y grandes necesidaes de sofitu les fines de selmana.
Talo que señaló la concejala de Derechos y Bienestar Social, Natalia González, na presentación del programa que tuvo llugar esta mañana nel Salón de Recepciones, a partir de finales de xineru y hasta xunu del añu 2023, neños, neñes y mozos d’ente 6 y 21 años van poder esfrutar de distintes actividaes d’ociu nun espaciu de xuegu integráu nel so contestu comuñal, como ye’l parque d’Isabel la Católica, disponiendo coles mesmes del Complexu deportivu de les Mestes pa los díes d’agua cedíu pol Patronatu Deportivu Municipal.
Amás de les de calter lúdicu nel espaciu natural del parque, van ufiertase otres actividaes n’equipamientos comuñales municipales como museos o instalaciones deportives pa fomentar igualmente la convivencia nel ociu con otros neños, neñes y mozos de la ciudá.
Les actividaes van desenvolvese ente les 11 y les 13 hores, los sábados y los domingos en grupos de 5 participantes dinamizados y supervisaos por un equipu de cuatro profesionales con cualificación y esperiencia n’ociu con infancia y mocedá con discapacidá y grandes necesidaes de sofitu.
