El Consorciu de Tresportes d’Asturies, dependiente de la Conseyería de Fomentu, Cooperación Local y Prevención de Quemes, va poner en marcha a partir del llunes 11 de setiembre una nueva llinia de tresporte n’autobús ente’l conceyu de Siero, el campus de Viesques y la Universidá Llaboral, en Xixón, especialmente diseñada pa estudiantes universitarios.
La llinia, que va operar una vegada al día en toles xornaes lectives, va partir a les 8:05 hores de la Avda. d’Uviéu, 25, n’El Berrón, conceyu de Siero, va parar na estación d’autobuses de La Pola Siero, na Escuela d’Inxenieros, na de Marina y nel Aulariu del campus de Viesques de Xixón, pa rematar el so percorríu al rodiu de les 8:40 hores na Universidá Llaboral. El viaxe de vuelta, que va tener el mesmu itinerariu, va empezar a les 14:10 hores na Universidá Llaboral y va rematar n’El Berrón.
El Consorciu de Tresportes tamién va poner en marcha’l 11 de setiembre xuna nueva frecuencia de tresporte públicu n’autobús ente L.luarca y A Veiga, coles mires de reforzar la movilidá sostenible nel noroccidente.
La ruta, que va operar de llunes a vienres va partir a les 7:00 hores de L.luarca, y va tornar a les 14:30 dende A Veiga, con paraes en tolos conceyos de la mariña occidental: Valdés, Navia, Cuaña, El Franco, Tapia de Casariego, Castropol y A Veiga. Tamién va dar serviciu a dellos centros educativos – Carmen y Severo Ochoa (L.luarca), Galiléu Galilei (Navia), Marqués de Casariego (Tapia) y Elisa y Luis Villamil (A Veiga)- y al Hospital de Xarrio.
