Podemos Asturies volvió reprochar al Gobiernu de Barbón la so “falta de compromisu”
colos derechos de les persones LGTBI al caltener “paralizada” la llei en Asturies. Asina lo manifestaron esti xueves la coordinadora autonómica de la formación morada, Sofía Castañón, y el voceru parlamentariu, Rafael Palacios, nun alcuentru con representantes de l’asociación Llar Trans.
Castañón llamentó que fai más d’un añu’l presidente asturianu comprometióse con esta norma y “cuando ta a puntu de terminar la llexislatura, nun tamos viendo nenguna meyora per parte del Gobiernu autonómicu” y pidió-y al Executivu de Barbón “menos trampes y más garantía de derechos en Asturies”.
Amás, esplicó que “apura una llei que dea respuesta a les persones trans y a la comunidá LGTBI nel so conxuntu y anque tengamos un marcu estatal, esto tien qu’aterrizase en toles competencies del Gobiernu d’Adrián Barbón”.
Los dirixentes de Podemos manifestaron que nun pueden entender que la FSA “caltenga esta llei nun caxón, porque tenemos la sensación de que cuando falamos de derechos civiles paez que siempres pueden quedar retardaos”. Y en ese sentíu, recordaron los casos recién d’agresiones LGTBIfóbicas asocedíos en Asturies. Dende la formación morada apuraron al Executivu autonómicu a que saque la llei “del caxón” y a qu’escuche a los colectivos que yá presentaron allegamientos, como ye’l casu de Llar Trans. “L’Alministración asturiana tien qu’activar yá esti procesu porque non puede faese apriesa y corriendo y, comoquier. Y, por supuestu, nun puede facese dando’l llombu al marcu que yá s’asitia nel Estáu sobremanera porque esa yera la escusa pa nun activalo antes”, señalaron
Castañón y Palacios.
Pela so parte, la presidenta de Llar Trans, Ánxeles Fal recordó que tanto los colectivos LGTBI como los sindicatos “amosemos el nuesu refugu al anteproyectu d’esa llei tanto pol fondu como pola forma, por eso presentemos 44 allegamientos”. Fal señaló la importancia de faer una llei “na que se reflexe’l sentir de les persones afectaes y que cunte con elles pa la so ellaboración. Y esti nun foi’l casu porque se nos presentó un borrador yá ellaboráu ensin nengún tipu d’aportación pela nuesa parte. Va un mes que s’acabó’l periodu d’allegamientos y nun volvimos a saber nada del anteproyectu”.
