Etiqueta: Casu

El Gobiernu d’Asturies firma un alcuerdu cola Asociación d’Ecoturismu n’España pa facilitar la certificación d’empreses turístiques

El Gobiernu d’Asturies firmó güei en Casu un alcuerdu cola Asociación d’Ecoturismu n’España pa facilitar la certificación d’empreses turístiques. Esti conveniu, con más de 18.000€, va facilitar la incorporación de nuevos destinos y compañíes a esta entidá, amás de sofitar la renovación d’aquelles que yá cunten con esta distinción.

«La nuestra voluntá ye que tolos espacios protexíos asturianos vayan sumándose al Club Ecoturismu n’España y consolidar Asturies como llíder del ecoturismu n’España» sorrayó la viceconseyera de Turismu, Graciela Blanco. Tamién señaló que’l Principáu ye la segunda comunidá en convertise en miembru de plenu derechu d’esta asociación nacional.

Nesti sen, Blanco indicó que’l Gobiernu d’Asturies trabaya nun programa de formación pal sector orientáu a la sostenibilidá, col oxetivu d’adherilo a les empreses vinculaes a les siete reserves de la biosfera asturianes. L’ecoturismu ta identificáu como ún de los productos prioritariso na Estratexa de Turismu 2020-2030.

Amás, la viceconseyera anunció la celebración n’Asturies, el prósimu añu, d’un foru d’ecoturismu, y tamién la creación de la Mesa d’Ecoturismo, un espaciu de trabayu con representación de tolos axentes con competencies nesti ámbitu.

11/11/2021
Socorren a un montañeru que cayó en Casu

Efectivos del Serviciu d’Emerxencies del Principáu d’Asturies (SEPA), a bordu del helicópteru medicalizáu, evacuaron a un varón de 65 años que resultó mancáu en sufriendo una cayida entre Felguerina y Infiesta, en Casu. L’afectáu presentaba policontusiones y una posible quebra del brazu esquierdu. Foi treslladáu al Hospital Universitariu Central d’Asturies (HUCA).

El Centru de Coordinación d’Emerxencies recibió l’avisu a les 20:02 hores. Na llamada indicóse que yeren trés montañeros y unu d’ellos, un varón, cayera y nun podía siguir caminando. Darréu movilizóse al equipu de rescate a bordu de l’aeronave medicalizada del SEPA. El grupu de rescate alcontró al afectáu, que s’atopaba acompañáu por otres dos persones. N’atendiendolu foi evacuáu al HUCA.

El grupu de rescate dio per rematada la intervención a la so llegada a base, a les 21:22 hores. La sala del 112 del SEPA informó del sucesu a la Guardia Civil y al Serviciu d’Atención Médica Urxente (SAMU).

22/06/2020
El Gobiernu d’Asturies remata la meyora de viales de Gobezanes

El Gobiernu asturianu remató esta selmana les obres d’acondicionamientu de los viales interiores del pueblu de Gobezanes, nel conceyu de Casu. Los trabayos enllargáronse mientres trés meses y supunxeron una inversión de 144.837 euros. La conseyera de Facienda y Sector Públicu en funciones, Dolores Carcedo, realizó un percorríu pel pueblu col alcalde del conceyu, Miguel Fernández.

L’actuación repercutió, prácticamente, sobre toles cais del pueblu. Asina, anovóse’l pavimentu de los viales y formigonáronse los que yeren de tierra, lo que dexa un meyor tránsitu rodáu y piatonal. Amás, actuóse sobre’l drenaxe de los caminos y reforzóse la seguridá col allugamientu de barandielles. Les obres tamién incluyeron delles meyores na rede d’agua qu’abastez a la localidá.

Los trabayos realizaos en Gobezanes encuádrense nel Programa d’Obres y Servicios, una de les llinies de cooperación colos conceyos de la Conseyería de Facienda y Sector Públicu, qu’anguaño xube a 3,1 millones y contempla hasta’l momentu 56 actuaciones en 45 conceyos. “Obres como esta realizada en Gobezanes contribuyen a ameyorar la calidá de vida de los vecinos y tamién a facer los pueblos más interesantes pa los visitantes, nesti casu los cada vez más numberosos visitantes de la redolada privilexada del parque natural de Redes”, destacó la conseyera mientres la so visita.

Tres el percorríu, Carcedo participó nel alcuentru entamáu polos vecinos nel centru social de la localidá con cuenta del fin de la obra.

08/07/2019
Cuatro firíos en Casu tres salise de la vía’l coche nel que vixaben

Cuatro persones resultaron firíes de diversa considerancia en saliéndose de la vía’l turismu nel que viaxaben. El vehículu cayó per un desnivel d’ente 10 y 20 metros, a un kilómetru de la salida de la localidá d’Orllé en dirección a El Campu, en Casu. L’afectada de mayor considerancia ye una muyer, de 41 años d’edá que foi treslladada al Hospital Universitariu Central d’Asturies (HUCA) con politrauma de pronósticu reserváu.

La muyer foi atendida nel llugar del accidente pola médica-rescatadora del Grupu de Rescate movíu al llugar col helicópteru medicalizáu. En emprestándo-y asistencia foi evacuada, inmovilizada en camiya, acompañada pola médicu, por aciu una operación de grúa na que s’esplegaron unos 45 metros de cable, hasta l’aeronave.

Según los datos facilitaos pol Serviciu d’Atención Médica Urxente (SAMU) otros dos firíos, dos varones de 40 y 51 años, fueron sacupaos nuna ambulancia de soporte vital básicu al Hospital Valle del Nalón con pronósticu leve. El cuartu afectáu, otru varón de 52 medios, podía movese polos sos medios. Nel turismu viaxaba una quinta persona que resultó ilesa.

Nel turismu viaxaba una quinta persona que resultó ilesa

Amás del Grupu de Rescate col helicópteru medicalizáu hasta l’incidente movióse, per tierra, una dotación de Bomberes del Serviciu d’Emerxencies del Principáu d’Asturies (SEPA) con base nel parque de Samartín del Rei Aurelio.

Cuando llegaron al llugar tolos afectaos salieren pelos sos propios medios del interior del coche. Dos bomberos aportaron hasta’l coche y aseguraronlu col cable del furgón multisocorro. Amás, ayudaron a unu de los mancaos a xubir hasta la carretera onde esperaba l’ambulancia.

El Centru de Coordinación d’Emerxencies del 112 Asturies recibió l’avisu a les 16.31 hores. Na llamada señalaben qu’un vehículu cayérase por un terremplén ente 20 o 30 metros. Tolos ocupantes taben fuera del turismu. La Sala 112 del SEPA movilizó a Bomberos del parque de Samartín del Rei Aurelio y al Grupu de Rescate col helicópteru medicalizado. Amás, pasó la llamada al SAMU qu’unvió l’ambulancia de soporte vital básicu de Llaviana y comunicó lo asocedío a la Guardia Civil. Rematada la intervención el Grupu de Rescate tornó a la so base en La Morgal a les 18.31 hores y los bomberos llegaron a parque a les 18.43 hores.

30/05/2019
Un home mancáu al volcar col so tractor en Casu

Un varón de 52 años resultó mancáu, al volcar el tractor nel que circulaba per una pista na zona de Brañagallones, a unos 5 kilómetros de la localidá de Bezanes, en Casu. L’afectáu, que foi sacupáu al HUCA pol Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, presentaba una quebra severa del pie esquierdu y un traumatismu craneoencefálico y facial. Por cuenta de más pruebes y hasta nueva valoración médica’l so pronósticu ye reserváu.

El Centru de Coordinación d’Emerxencies recibió l’avisu a les 17:42 hores. Na llamada indicóse que nuna pista produxérase la cayida d’un tractor y el conductor tenía un golpe na cabeza. Darréu’l Guarda Mayor del Parque de Redes confirmó que l’accidentáu taba atrapáu. De momentu movilizóse al Grupu de Rescate de Bomberos del SEPA, a bordu de l’aeronave medicalizada y a los efectivos de Bomberos del SEPA, con base nel parque de Samartín del Rei Aurelio.

Una vegada na zona, l’arboláu del llugar obligó a executar operaciones de grúa, tantu para baxar los rescatadores hasta l’afectáu, como pa la so posterior evacuación. De primeres, la médica-rescatadora y un bomberu-rescatador aportaron hasta l’afectáu. N’atendiendo al mancáu y estabilizalu, executose de nuevu una operación de grúa para poder izar a la médica-rescatadora, al pie de la camiya col varón accidentáu, a l’aeronave. Una vegada tol equipu a bordu del helicópteru procedióse la evacuación al Hospital Universitariu Central d’Asturies.

La sala del 112 del SEPA informó del sucesu a la Guardia Civil y al Serviciu d’Atención Médica Urxente (SAMU).

26/05/2019