Xixón al día

Etiqueta: conciertu

  • Xabier Díaz e Adufeiras de Salitre llega esti sábadu a Llangréu

    Xabier Díaz e Adufeiras de Salitre llega esti sábadu a Llangréu

    La xira de conciertos de Xabier Díaz e Adufeiras de Salitre pela Península Ibérica llega esti sábadu al conceyu de Llangréu. Concretamente, va facelo a La Felguera, ufriendo’l so espectáculu nel Nuevu Teatru de La Felguera magar de les 20:00 hores. Queden poques entraes pal conciertu, que pueden mercase calcando nesti enllaz.

    Nesti eventu va haber dellos artistes asturianos invitaos, que van poner el ramu a un conciertu nel que la música gallega y asturiana van xuntase p’amosar el valor de la cultura tradicional. Pel escenariu van pasar Algaire, ganadores del Premiu Camaretá al Meyor Cantar; Marta Elola, Muyer Rural del Oriente 2022; Marisa Valle Roso, cantadora; Ramses e Ambas, investigadores de la cultura tradicional asturiana y Xuan Nel Expósito, curdionista que tien tocao con Llan de Cubel o Felpeyu, ente otros.

  • Maverick esiste y persiste n’Uviéu

    Maverick esiste y persiste n’Uviéu

    La nueche del vienres 3 de marzu foi de Maverick dende l’entamu a la fin. El grupu mierense llegaba a Uviéu cola fuercia que-yos caracteriza a presentar el so primer trabayu d’estudiu, Existir – Persistir. A les nueve de la nueche, Misa, Saúl, Nacho y Carlos xubíense al escenariu de la Lata de Zinc pa facer un repasu a esi primer LP, col que ganaron recién el premiu AMAS al diseñu de meyor portada gracies al trabayu de l’artista Noelia Amieva.

    D’esta mena, Maverick entamaba el so segundu conciertu del añu ente un públicu qu’esperaba por sentir dalgunos de los sos meyores temes, como No hay final, La espiral, Travis Bickle o La Viña. Así fue hasta interpretar los doce cantares que componen Existir – Persistir.

    Nun conciertu rápidu ya intensu, como lo son los de punk (o pop punk, como ellos mesmos se definen), los mierenses ficieron vibrar al públicu mientres los 45 minutos que pusieron en valor y amosaron el valir de la música alternativa asturiana. Porque esti grupu de creación recién quier amosar la situación d’una tierra y una xeneración que s’enfrenta a munchos problemes a caldía que pasa. Y a eso ye a lo que-y canten. Por eso, Maverick, esi grupu de la «North Coast», esiste y persiste. De manera mui necesaria.

    Darréu, dieron pasu a State of Crime & Science, el grupu xixonés que peslló la xornada y que lo dio too nel escenariu con un públicu qu’esfrutó de la so música, la del hard rock qu’entá anguaño sigue resistiendo.

     

  • Algaire y Delagua van tocar nel Paraninfu de la Llaboral

    Algaire y Delagua van tocar nel Paraninfu de la Llaboral

    El Paraninfu de la Llaboral acueye dos conciertos con sellu asturianu de les bandes Algaire y Delagua.

    Algaire llega esti domingu 27 de payares, a les 13:00 hores, al Paraninfu en formatu cuartetu, con trés voces con percusiones y una guitarra eléctrica/acústica. A esta formación súmense programaciones lletróniques que refuercen y potencien la puesta n’escena, otorgando dinamismu al conciertu y dexando crear en dellos temes ambientes tranquilos y cenciellos y dar a otros una gran fuercia y enerxía. La banda foi galardonada apocayá col Premiu Camaretá al Meyor Cantar n’asturianu 2022 pol so cantar Coral y Maera, con lletra y música de Luis Ángels Fernández Santos.

    El próximu 11 d’avientu, a les 13:00 hores, Delagua va llevar al Paraninfu’l so proyectu Animalías, un viaxe al traviés de los sentíos onde les hermanes Sil y Gema Fernández van esbardiar enerxía acompañaes de los músicos Héctor Tuya, Sergio Pevida y Alfonso Vega. Animalías ye un proyectu musical que pretende exercer como revulsivu contra la dictadura de la perfección. Reivindica, al traviés de los sos cantares, la orixinalidá frente a la homoxeneidá, la rotura de los cánones impuestos y defende la guapura de lo distinto, la vuelta al orixe, la esencia.

    La propuesta de Delagua llega cargada de cantares que tomen dende la crítica social y la defensa de los derechos de la muyer hasta’l tratamientu de lo cotidiano como daqué escepcional, l’humor como arma de construcción masiva o la simbiosis natural ente poesía y música. Tou ello acompañáu de la proyección de vídeos ya imaxes qu’actúen como soporte integrador y evocador de lo que n’escena se manifiesta.

    Les entraes pa cada conciertu tienen a un preciu de 8 euros, con descuentu del Club Cultura Asturies hasta’l día antes (llindáu a 50 unidaes). Les localidaes tán disponibles na Recepción de la Llaboral, nel Centru d’Información Turística del Principáu d’Asturies (CITPA) n’Uviéu/Uviéu, nel Centru Niemeyer n’Avilés, nel teléfonu 952 076 262, en unientradas.es y na web de Llaboral Ciudá de la Cultura.

  • Calea ufre un conciertu nel CCAI esti sábadu

    Calea ufre un conciertu nel CCAI esti sábadu

    La ufierta cultural de Xixón sigue en marcha mientres, selemente, aporten les feches navidiegues y esti sábadu ye’l turnu de Calea. El grupu de música formáu por Leticia Baselgas, Rubén Bada y Silvia Quesada va tar nestables del Centru de Cultura Antiguu Institutu de Xixón a partir de les 19:00, repasando dalgunos de los temes más reconocíos de la música tradicional asturiana. L’actu ye de baldre hasta completar aforu

    “Calea” ye la pallabra que la xente del valle de Cuaya (Grau, Asturies) usa pa referise al camín que ye difícil d’andar por tar enllenu de piedres y broza. Rubén Bada, Silvia Quesada y Leticia Baselgas lleven munchos años ‘caleando’ pelos requexos de la música. Esti proyeutu nuevu, que fai que los tres caminen xuntos, reconduz otra vuelta a estos músicos al entamu de la so andadura creativa: la música tradicional asturiana. Calea ye un grupu principalmente vocal onde les harmoníes y la instrumentación s’axunten pa enfotase nel calter modal y antiguu de la música tradicional asturiana. Zarra un ciclu musical na vida de tres músicos y intérpretes; un camín que namás se deprende al zarapicar milenta veces nes mesmes piedres na “calea”.

  • Llangréu abre’l plazu pa conseguir les entraes del conciertu de baldre de Marisa Valle Roso

    Llangréu abre’l plazu pa conseguir les entraes del conciertu de baldre de Marisa Valle Roso

    El Conceyu de Llangréu yá tien a disposición del públicu gratuitu les entraes pal conciertu que la cantante Marisa Valle Roso va ufiertar el vienres 28 d’ochobre, a les 20.15 hores, nel Nuevu Teatru de La Felguera. L’accesu va ser de baldre amosando les invitaciones que pueden retirase na Casa de Cultura Escueles Doráu de Sama, el centru cultural Casa de los Alberti de Ciañu y la mesma taquilla del Teatru.

    L’actuación, na que l’artista va presentar los cantares del so últimu álbum, Lo fugaz, publicáu ese mesmu añu, ta incluyíu nel programa Dinamizart del Ministeriu pa la Transición Xusta y el Cambéu Demográficu, y ta promovíu pol Institutu pa la Transición Xusta, la Fundación Ciudá de la Enerxía (CIUDEN) y el Conceyu de Llangréu.

  • Canción lírica asturiana de conciertu, de Vicente J. Sánchez García, va presesentase al travíes d’un conciertu-presentación

    Canción lírica asturiana de conciertu, de Vicente J. Sánchez García, va presesentase al travíes d’un conciertu-presentación

    Canción lírica asturiana de conciertu, de Vicente J. Sánchez García, va presesentase al travíes d’un conciertu-presentación el próximu vienres, 7 d’ochobre, a les 19:00 hores nel Conservatoriu Superior de Música “Eduardo Martínez Torner” d’Uviéu.

    L’actu va cuntar coles actuaciones d’Eliana Sánchez (declamación), Beatríz Díaz (sopranu) y Mario Bernardo (pianu). Amás, va participar Antón García, director xeneral de Política Llingüística y Esther Prieto, d’Ediciones Trabe.

  • Alan Parsons aplaza al 6 d’ochobre’l conciertu na Llaboral

    Alan Parsons aplaza al 6 d’ochobre’l conciertu na Llaboral

    Alan Parsons aplaza la xira mundial prevista pa marzu d’esti añu, polo que’l conciertu que se diba celebrar el 14 de marzu nel Teatru de la Llaboral retrásase y va realizase’l 6 d’ochobre. Les entraes adquiríes para esti conciertu van ser igualmente válides pa la nueva fecha, nun siendo necesariu nengún tipu de truecu o operación sobre les mesmes.

    Aquelles persones comenenciudes na devolución del importe de les entraes van tener la opción de solicitalo, siendo l’importe devueltu pola mesma canal nel que s’efectuó la compra. La devolución de les entraes mercaes n’Internet o per teléfonu ha solicitase nel corréu eventos@turismoycultura.asturias.es , indicando los siguientes datos: canal de compra, corréu electrónicu apurríu pa la compra d’entraes, nome, localizador, númberu de teléfonu, númberu d’entraes adquiríes, fila y butaca.

    Pa la devolución de les entraes mercaes en taquilles tendrá d’allegase cola/es entrada/es y la tarxeta de compra al centru onde s’adquirieron (Llaboral Ciudá de la Cultura, el Centru Niemeyer n’Avilés y l’Oficina d’Información Turística d’Asturies n’Uviéu). El plazu de devolución de les entraes va permanecer abiertu hasta’l día 10 de mayu de 2022.

  • Misiva llanza nuevu videuclip y anuncia conciertu pol 10+2 aniversariu

    Misiva llanza nuevu videuclip y anuncia conciertu pol 10+2 aniversariu

    Tres cuasi dos años de parón y yá recuperaos de nun poder cellebrar el X Aniversariu en 2020, los moscones MISIVA vuelven a la carga con una riestra de novedaes que va facer que toda esta espera pagara la pena.

    Conciertu X+II Aniversariu, temes nuevos, videoclip, nueva imaxe… Y sobre too un puntu d’inflexón na banda que paez dexar pa prau aquella atmósfera apocalíptica y murnia que presentaben nel so trabayu anterior “L’Ultimu Aliendu”.

    En pallabres d’ellos “tamos fartos de males noticies, de nun poder ver a la xente, a la familia, de nun poder tocar nin dir a conciertos, de nun vevos, de nun sentivos… Queremos qu’esto sía un chute d’enerxía pa encarar esti final del andanciu y que nos volvamos a ver coles ganes de dexar esto atrás pa siempre”. Esti sentir ocúpalo too. Tresmítese na nueva imaxe, obra como siempre del tamién moscón Rubonón, con collores más vivos, con elementos más “entusiastas”…Y nótase tamién nel soníu y na lletra del tema homónimu qu’acaben de presentar xunto con un videoclip fechu como davezu por Titi Muñoz.

    “La Misiva”, que ye como se llama’l cantar qu’escoyeron d’ente tolos que compunxeron mientres la pandemia, ta grabáu en l’OVNI Estudio con Pablo Martínez y fala d’esti nuevu estáu d’ánimu de los de Grau. Fala de que magar los confinamientos, les restricciones y tolo que tuvieron que dexar pa un llau; magar que los más de 10 años que lleven y de que va pasando’l tiempu pa toos; ye dicir, magar toles llaceries que-yos puedan pasar, Misiva “sigui’l so camín”. Y sigui’l so camín cola mesma enerxía de siempre, cola mesma ilusión pero ensin complexos y quitándose tolos corsés que podíen tener si ye que dalguna vez los tuvieron.

    Por eso quieren qu’esti añu sía l’añu de volver entamar. El de volver a la normalidá ¿y qué meyor que retomando aquello que meyor saben facer? Pal 12 de marzu, na sala uvieína Gong Galaxy Club, Misiva va dar el so primer conciertu en 2 años (sacantes el del Kuivi PopUp) y va facelo colos mesmos compañeros de viaxe que nel so últimu bolu: Los Bárcenas.

    Un conciertu que nomaron “ANIVERSARIU X+II” nel que, amás de delles sorpreses que tienen preparaes, van facer un repasu a tolo que lleven fecho dende aquel 2010 onde entamó esti proyectu referente de punk-rock n’asturianu.

  • Los Secretos, en conciertu nel Centru Niemeyer el vienres 12 de payares

    Los Secretos, en conciertu nel Centru Niemeyer el vienres 12 de payares

    L’actual xira estatal de Los Secretos va cuntar con una actuación nel Centru Niemeyer el vienres 12 de payares a les 20:30. La formación creada en Madrid celebró recién su cuarenta aniversariu y Avilés ye una ciudá bien conocida por ellos. A principios de los años 80 el grupu ufrió un conciertu na Pista de la Esposición de Les Meanes, y tamién en 2016 grabó nesta ciudá parte del so documental Una vida a tu lado. Sicasí, esta ye la primer vez qu’actuen nel Centru Niemeyer.

    Los Secretos planteen esti conciertu como «un show enlleno d’emociones y optimismu tres l’andanciu». Mientres l’espectáculu, el públicu va poder esfrutar de dalgunos de los sos cantares más emblemáticos, himnos de toda una exeneración, como Déjame, La calle del olvido o Pero a tu lado, y tamién temes más recientes. Con esti repertoriu busca ufrir a la audiencia un crisol d’emociones nel que los asistentes puedan sentise identificaos.

    Les entraes tán disponibles al preciu de 35€ y pueden mercase na taquilla y na páxina web del Centru Niemeyer y les recepciones de Llaboral Ciudá de la Cultura y CITPA.

     

  • Los centros sociales axúntense en defensa del Llar El Mataderu

    Los centros sociales axúntense en defensa del Llar El Mataderu

    El sábadu el Llar El Mataderu va acoyer la I Xuntanza de Centros Sociales Autoxestionaos d’Asturies, que se lleva a esti espaciu polesu pa sofitalu énte la intención del Conceyu de Siero de valtalu. Participen el CSA La Xusticia (La Felguera), el CSA La Semiente (L’Entregu), l’Espaciu La Llegra (Uviéu), el CSA L’Apiaderu (El Remediu), Sestaferia CS (Xixón), CSA La Kuadra (La Pola Llaviana) y l’AC Les Ablanes (Piloña).

    L’actividá nel llugar va arrancar a les 11 hores, con un alderique progromáu pal meudía entituláu ‘De los CSOA a los CSA, pasáu, presente y futuru’. A les 13.30 hores va entamase un campeonatu de gomeru y va celebrase dende les 14 un vermú amenizáu por Nun Tamos Toes y Femfarria.

    Llueu d’una xinta popular va haber de tarde, dende les 16 hores, xuegos tradicionales y, a les 18, un pasucais reivindicativu per La Pola. Pa poner el ramu a la xuntanza va celebrase un conciertu solidariu a les 19 hores cola participación de los grupos Disaster Sisters, Sangre d’Ochobre, Expropiazión, Karank, Desaniciu, Ochobre, KPE(r) y The Rotten Teens.