Mañana xueves día 16 a les 19 h. ( Muséu Casa Natal de Xovellanos ) va tener llugar la conferencia «A KAFKA III. El diálogu de Camín col aceru» al cargu de Soledad Álvarez y Mónica Rubio Camín
Esta conferencia forma parte del ciclu La colección al detalle, que tien como oxetivu favorecer una visión multidisciplinar del fechu artísticu, analizando toos aquellos factores que tienen una influencia determinante nel so desenvolvimientu, proponiendo nueves llectures de les obres qu’integren la colección permanente del muséu.
La conferencia toma como puntu de partida A Kafka III, una de les escultures más representatives de la esperiencia plástica desenvuelta por Camín col aceru como soporte, pa abordar dende los empiezos de la so indagación en dicha materia hasta les resultancies que darréu llogró esquizando les infinites posibilidaes que-y ufiertaben l’angular y otros perfiles industriales d’aceru.
Etiqueta: Conferencia
-
Soledad Álvarez y Mónica Rubio Camín presenten «A KAFKA III. El diálogo de Camín con el acero»
-
Xixón entama una xornada nel marcu de la Conferencia sobre’l Futuru d’Europa
L’Ayuntamientu de Xixón, al traviés del puntu Europe Direct Xixón d’información a la ciudadanía, entama una xornada nel marcu de la Conferencia sobre’l Futuru d’Europa.
Trátase d’una mesa redonda y un alderique participativu que se va celebrar mañana xueves, 27 de xineru, a les 18.00 hores na Escuela de Comerciu, sol títulu Los retos de la UE y el papel de la ciudadanía nel diseñu de ciudaes eficientes.
L’alcaldesa de Xixón, Ana González Rodríguez, va ser la encargada d’inaugurar esti actu. Va Cuntar cola participación de Jonás Fernández Álvarez, diputáu al Parlamentu Européu nel Grupu de l’Alianza Progresista de Socialistes y Demócrates, miembru de la Comisión d’Asuntos Económicos y Monetarios y suplente na Comisión de Presupuestu; Ana Isabel González González, vocal del Conseyu Asturianu del Movimientu Européu; Lorena Álvarez-Sala Villazón, embaxadora del Pactu Européu pol Clima; Marcelino Díaz Acebal, presidente d’Erasmus Student Network Asturies (ESN); y Foína Navas Ricu, representante de l’asociación xuvenil europeísta Equipu Europa
La Conferencia sobre’l Futuru d’Europa, nel que Xixón participa y nel marcu nel qu’entama esta xornada, ye un foru de participación que convida a la ciudadanía europea a cavilgar sobre los retos y prioridaes de la comunidá geopolítica y sobre qué aldu tien de marcar. D’esta miente, afigúrase’l compromisu d’escuchar y dar siguimientu nos sos respectivos ámbitos de competencia a los encamientos formulaos, les sos conclusiones ta previstu que se presenten llueu.
Nesi sen, amás de na xornada de mañana, los vecinos y vecines del conceyu, entidaes y asociaciones, pueden realizar les sos aportaciones nel puntu Europe Direct Xixón, allugáu na Casa Paquet, o directamente na plataforma web de la mesma Conferencia.
-
Xixón acueye esti sábadu la segunda Xuntanza Vegana
Esti sábadu, 11 d’avientu, el Centru Antiguu Institutu Xovellanos (CCAI) va acoyer mientres tol día la segunda Xuntanza Vegana, que se presenta col lema «L’únicu cuerpu que nos pertenez ye’l nuesu» y onde van poder sentise delles conferencies y participar en talleres.
L’actividá tien como oxetivu concienciar a la xente de facer un consumu alimentariu veganu y pa ello, proponen charres dende dellos ámbitos: Shafikah K. H. Perea (nutricionista) va plantegar una conferencia al rodiu de la posibilidá d’una dieta vegana; Nuria Menéndez de Llano (abogada) va falar sobre los espectáculos con crueldá animal nel estáu español y Rocío Fernández Prieto (activista) va aldericar sobre los microsantuarios. Asina, hasta 7 charres alredor del veganismu, xunto con otros dos talleres, unu pa la reciella y otru p’adultos.
El programa completu de l’actividá puedes consultase nes redes sociales del eventu.