L’Ayuntamientu de Pravia anunció que, con motivu del 25 de payares, Día internacional de la elminicación de la violencia contra la muyer, el auditoriu José Barrera va acoyer un recital de poesía contra la violencia machista.
L’actu, que va entamar a les 20:00 hores, va tar conducíu por Alma Hidalgo y van participar autores como Yedra Riesgo, Sara Areces, Natalia Campo, o Mª Esther García López, presidenta de l’Asociación d’Escritores d’Asturies.
Mapi Quintana presenta pela primer vez n’Asturies Música pa tornar páxaros, nun conciertu que va ufiertar el 3 d’avientu, a les 20:30 hores, nel Teatru de la Llaboral.
Esta obra musical incluye un repertoriu compuestu a costafecha pal conciertu inaugural del Festival Intercélticu de Lorient, onde Asturies foi la convidada d’honor, según esplicó esta mañana’l director xeneral de Política Llingüística del Principáu, Antón García, xunto a Mapi Quintana.
Los más de los temes tán escritos n’asturianu y inclúyese un cantar en castellanu de Cris Zagaleja, autora y panderetera vallisoletana. El repertoriu contién principalmente música orixinal, anque tamién hai cantares tradicionales de Ḷḷena, conceyu de la propia Mapi Quintana.
Van sentise melodíes asturianes a trés voces, onde l’harmonía va llevar al públicu a dómines más modernes y estétiques, inspiraes principalmente na música impresionista y el jazz. Tamién va haber espaciu pa la improvisación, tanto solista como en grupu.
Mapi Quintana va tar acompañada nel escenariu por César Latorre (pianu), Sonia Cartón (voz y sintetizador), María Sanmiguel (voz y violín), Thomas Welvaadt (trompeta) y Juanjo Díaz (percusión). L’arte visual de Marina Durany tamién va tener una relevancia especial nesti conciertu, completando estéticamente la escena y representando visualmente les emociones que tresmiten los cantares de Música pa tornar páxaros. L’espectáculu rinde homenaxe al artista desapaecíu Elías García y a toles persones que nos dexaron nestos últimos años de pandemia.
La entrada a esti conciertu ye gratuita, previa retirada d’invitaciones na Recepción de la Llaboral, nel Centru d’Información Turística del Principáu d’Asturies (CITPA) n’Uviéu, nel Centru Niemeyer n’Avilés, nel teléfonu 952 076 262, n’unientradas.es y na web de Llaboral Ciudá de la Cultura.
La ufierta cultural de Xixón sigue en marcha mientres, selemente, aporten les feches navidiegues y esti sábadu ye’l turnu de Calea. El grupu de música formáu por Leticia Baselgas, Rubén Bada y Silvia Quesada va tar nestables del Centru de Cultura Antiguu Institutu de Xixón a partir de les 19:00, repasando dalgunos de los temes más reconocíos de la música tradicional asturiana. L’actu ye de baldre hasta completar aforu
“Calea” ye la pallabra que la xente del valle de Cuaya (Grau, Asturies) usa pa referise al camín que ye difícil d’andar por tar enllenu de piedres y broza. Rubén Bada, Silvia Quesada y Leticia Baselgas lleven munchos años ‘caleando’ pelos requexos de la música. Esti proyeutu nuevu, que fai que los tres caminen xuntos, reconduz otra vuelta a estos músicos al entamu de la so andadura creativa: la música tradicional asturiana. Calea ye un grupu principalmente vocal onde les harmoníes y la instrumentación s’axunten pa enfotase nel calter modal y antiguu de la música tradicional asturiana. Zarra un ciclu musical na vida de tres músicos y intérpretes; un camín que namás se deprende al zarapicar milenta veces nes mesmes piedres na “calea”.
El grupu asturianu de punk-rock Desakato, afincáu en Llanera, acaba de dar anuncia al traviés d’un comunicáu oficial nes sos redes sociales la separación de la banda. Una decisión que ye «la más difícil que tomamos a lo llargo de tola nuesa carrera», anque creen que yo lo que tienen que facer.
Desakato, una de les bandes de más éxitu nel panorama nacional, aprovechó tamién el comunicáu pa dar anuncia de les feches confirmaos de la que sedrá, pel momentu, la so última xira. «El año que vivimos intensamente» sedrá’l nome y de momentu les confirmaciones son en Barcelona, Madrid, Villarobledo y Valencia. Entá nun hai fecha confirmada de la so despedida n’Asturies.
El tema «Al Final de la Carretera» incluido en la B.S.O. de la película «Vamos a Volvernos Locos» está en la candidatura de la 37 edición de los Premios Goya.
Nada ye lo que paez, y naide ye quien diz ser. Cuando nin el momentu más sagráu ta llibre de mentires, basta con una gota de sinceridá pa desvelar «la mázcara que lleves puesta». Este ye la tema qu’ocupa a la banda asturiana nel so postreru senciellu, “A la fin de la Carretera”, escrita pa la banda sonora de “Vamos Volvenos Llocos”, una película de Desenfocado Producciones empobinada por José Luis Velázquez que va ver la lluz nel mes d’ochobre.
Metanes la xira de presentación de “Lo que siempre has querido”, Staytons atopó un buecu pa componer esta tema y grabala n’Estudios Dynamita baxu la producción d’Igor Paskual. “Al final de la Carretera” ye una cantar con arume a banda clásica, como si los miembros de The Black Crowes o Eagles coyeren les sos guitarres acústiques dempués d’un bañu nel Cantábricu. A diferencia de los cantares del so últimu discu onde van “al granu» directamente, equí tómense’l so tiempu pa crecer progresivamente.
En palabres de Juanvi Stroup, vocalista de Staytons: “Equí prima lo narrativo. Escribir pa una película brindónos la oportunidá d’esplayanos na forma y conteníu del cantar, y aprendimos a caltener l’atención del oyente d’otra manera. En cuenta de responder “sí o non”, caltenemos una conversación ensin priesa”.
La Habitación Propia, llibrería asitiada na cai Celestino Junquera, 1 de Xixón va acoyer esti vienres a les 20 hores la presentación del discu «Viaxar con pocu pesu», un trabayu fechu en comuña ente Luis Núñez y Susana Sela.
Viaxar con poco pesu, ye’l primer proyectu de llarga duración que firmen conxuntamente la escritora Susana Sela y el músicu Luis Núñez. Tres llanzar dellos singles a lo llargo l’añu, publiquen agora los diez cantares que dan forma a esti álbum nel que suenen xéneros como’l folk, pop, jazz, rock o spoken word enriba de los poemes y la voz recitada de Susana Sela.
Pravia acueye mientres esti fin de selmana les XXII Xornaes Lliteraries, entamaes pola asociación d’escritores d’Asturies. Una nueva edición que va tratar sobre la lliteratura xaponesa y que llevan el nome de «Ikebana lliterariu».
Van tener presencia ponentes espertos nesta lliteratura como Minako Takahshi de la Universidá de Santiago, Raúl Fortes de la Universitat de València, Carlos Rubio de la Llave de la Universidá Complutense de Madrid y otros espertos orientalistes como Enrique Llinares,(Alicante) director de la Gaceta del haiku » Holas na cera» y Fernando Cid de la Universidá de Guglielmo Marconi de Roma (Italia); escritores con obra publicada de haikus como Aurelio González Ovies, Esther García López, Carmen Nozal, Ánxel Álvarez Llano y Francisco Velasco. L’antropólogu Roberto González Quevedo va facer una comparanza ente los cuentos tradicionales asturianos y los xaponeses.
Tamién van tener presencia les editoriales de temes de Xapón que tienen el so allugamientu n’Asturies como Satori y Milky Way y empreses rellacionaes col mundu de l’animación (anime) como The Angry Metal Company ya ilustradores como Borja Saura y Angye Fernández. Primeramente los díes 8 y 26 d’ochobre, celebráronse talleres de haikus nos Centros Educativos de Pravia que van tener participación nes Xornaes con una puesta de mancomún de los sos trabayos el vienres día 18 a les 12:00 na Casa de Cultura de Pravia.
El vienres día 18, va tener llugar un conciertu de koto al cargu de la profesional xaponesa Yoshie Sakay, nel entemediu va haber un recital de haikus al cargu d’una representación d’escolinos de los colexos de Pravia. L’Asociación cultural Nikau Dan allugada en Xixón, va proxectar el vienres a les 19:20 unos curtios de temes xaponeses. El sábadu tamién se va celebrar un vermut Lliterariu, n’El Teatrillo, a les 13:30. Va presidir les Xornaes una escultura nomada «Célula blanca» del artista xaponés Tadanori Yamaguchi, afincáu en Pravia. Va Tar ubicada nel patiu del Ayuntamientu de Pravia y podrá vese una esposición de lliteratura xaponesa nel Salón de Plenos del Ayuntamientu onde se van celebrar toles Ponencies. El día 20 va realizase una visita empuesta a Santianes de Molenes de Pravia, a les 11 de la mañana con Salida del Hotel Casona del Busto.
La ciudá de Xixón prepárase pa volver ser, nos próximos díes, esi puntu d’alcuentru nel que cineastes y públicu déxense abasnar pola gran fola del cine independiente del FICX, el 60
Festival Internacional de Cine de Xixón. Van ser nueve díes nos qu’afayar les miraes de creadores de tol mundu al traviés de más de 250 proyecciones, y d’esfrutar cola visita de más d’un centenar de personalidaes del cine del nuesu tiempu que van presentar les sos nueves producciones, van charrar col públicu tres los pases y van protagonizar les actividaes paraleles d’esta edición.
Precisamente la pieza cinematográfica que va sirvir como cabecera del 60 FICX, Cinetract, roblada pola cineasta asturiana Elisa Cepedal, treslládanos a la Sablera de San Llorienzo como esi llugar representativu de la ciudá onde atopase y onde contemplar les foles que lleguen. Per segundu añu consecutivu, el FICX emplega como cabecera una obra audiovisual realizada por un cineasta asturianu, iniciativa qu’inauguró en 2021 la pieza Folaxe, de Ramón Lluis Bande.
Con dos premios Ondes por El Intermedio (2009 y 2013) y el prestixosu Premiu Internacional d’Humor Gat Perich (2015), El Gran Wyoming fixo incursiones tamién nel mundu del cine como actor en más d’una trentena de filmes ente los que destaquen
Ópera Prima, de Fernando Trueba o El Día de la Bestia d’Álex de la Ilesia; pero tamién como guionista ( Historias de la puta mili y Quiero que sea él). En Xixón va allegar a la cita col cine independiente como maestru de ceremonies d’una inauguración na que van reconocese les trayectories de les actrices y cineastes Maria de Medeiros y Elina Löwensohn. La proyección de Armageddon Time, la última película del aclamáu cineasta estadounidense James Gray ( La noche es nuestra, Two Lovers, Z. La ciudad perdida, Ad Astra) protagonizada por Anne Hathaway, Jeremy Strong y Anthony Hopkins, va poner
el broche d’oru a la nueche que va marcar l’entamu del 60 FICX.
Esti xueves 10 de payares presentóse, na see del Conseyu Regulador de la DOP Sidra d’Asturies, el llibru La Sidra d’Asturies, una bébora mui nuesa. Con testos de David Acera ya ilustraciones de Raquel Lagartos atópase empobináu al públicu infantil coles mires d’empecipialos na conocencia de la Cultura Sidrera Asturiana, candidata española a Patrimoniu Inmaterial de la Humanidá énte la UNESCO. Na obra detállense los métodos de producción y ellaboración, les tradiciones lúdicu y festivu, el calter sostenible del sector y la manera en que los neños participen del nuesu elementu más identitario.
“Esti llibru ye un viaxe nel tiempu. Los cuentos sirven pa conectar col pasáu, cola cultura sidrera asturiana que sigue bien viva y qu’hai de tresmitise de xeneración en xeneración”, manifestó l’autor del cuentu, David Acera.
«La función del Conseyu Regulador de la DOP Sidra d’Asturies ye promocionar y defender la Sidra d’Asturies, que ye l’orixe de la cultura sidrera asturiana. Caltener esta cultura nos neños ye necesariu pa que se familiaricen coles nueses tradiciones y caltengan esti patrimoniu”, espresó el presidente del Conseyu Regulador de la DOP Sidra d’Asturies, Guillermo Guisasola.
“Esta publicación de la Cátedra de la Sidra d’Asturies atópase empobinada al públicu infantil coles mires d’empecipialos na conocencia de la cultura sidrera asturiana, candidata española a ser reconocida como Patrimoniu Cultural Inmaterial de la UNESCO, llueu”, amestó Luis Benito, director de la Cátedra de la Sidra d’Asturies de la Universidá d’Uviéu.
Esta publicación en dixital va xubir a les páxines web de dambos organismos y va distribuyise físicamente a tolos colexos nel primer nivel de primaria 6- 10 años. Tamién s’editó una versión n’asturianu.
La vida de los pobladores del Seya dende’l final del Paleolíticu hasta la Romanización centra l’últimu bloque espositivu de l’amuesa «De la escuridá a la lluz». La cultura material de les cueves de Ribeseya nos fondos del Muséu Arqueolóxicu d’Asturies nel Centru d’Arte Rupestre de Tito Bustillo. Esta mañana’l director xeneral de Cultura y Patrimoniu, Pablo León, visitó la esposición acompañáu, ente otros, por Ramón Canal, alcalde del Conceyu de Ribeseya; les conceyales Belén Fernández y Cristina Cerra; la directora del Muséu Arqueolóxicu d’Asturies, María Antonia Pedregal; y por guarda-guíes de Patrimoniu Cultural Santiago Calleja y Miguel Polledo, qu’ellaboraron el conteníu de l’amuesa.
El viaxe retrospectivu qu’anguaño realizó l’equipamientu ribeseyanu pa recordar cómo yeren y vivíen los nuesos antepasaos nesti territoriu del oriente asturianu remata cola amuesa de pieces arqueolóxiques del Mesolíticu a la Romanización.
Nos materiales espuestos pueden reparase restos líticos del Asturiense, una de les cultures clásiques del Mesolíticu européu presente nunos 150 xacimientos del oriente asturianu. Concretamente pueden vese trés picos asturienses, preseos fabricaos a partir de cantos de cuarcita y tallaos por una única cara, procedentes d’El Cierro y restos de concheros de la Cueva d’Ardines.
Tamién hai fragmentos de material cerámico del Neolíticu, Calcolítico y Edá de Fierro topaos n’El Cierro y La Lloseta y monedes romanes d’El Cierro procedentes de les escavaciones arqueolóxiques de Francisco Jordá que, xuntu colos afayos y noticies procedentes de la cercana necrópolis del Forniellu, dexen acolumbrar la presencia nel territoriu d’una clase de propietarios acomuñaos a núcleos d’hábitat y esplotación rural mientres la Romanización.
La esposición «De la escuridá a la lluz», con accesu gratuitu cola entrada al Centru d’Arte Rupestre, puede visitase hasta’l 30 d’avientu nel horariu d’apertura del equipamientu riosellano.
L’amuesa complétase con delles actividaes. El 5 de payares Miriam Cubas, Doctora en Prehistoria pola Universidá de Cantabria ya investigadora “Ramón y Cajal” de la Universidá d’Alcalá, va ufiertar una conferencia pa esplicar qué pasu a la fin de la Prehistoria na desembocadura del Seya, na que va faer un percorríu polos momentos finales d’esti periodu, incidiendo especialmente dende l’Holocenu hasta l’apaición de los primeros metales. El llabor investigador de Cubas céntrase nel estudiu de la tecnoloxía cerámica na Península Ibérica con especial incidencia na apaición d’esta tecnoloxía na rexón cantábrica. Dirixió y collabora de forma habitual con numberosos proyectos d’investigación nacionales ya internacionales con ocupaciones del Neolíticu, centrándose na investigación de l’apaición de la tecnoloxía cerámica.
Tamién va haber visites empuestes a l’amuesa temporal de la mano de Miguel Polledo y Santiago Calleja’l 12 de payares y el 3 d’avientu y pal públicu familiar van realizase dos talleres: Evolucionamos al Neolíticu los díes 5, 6, 12 y 13 de payares, nos que probar la nuesa habilidá na fabricación d’oxetos de folla tomando como inspiración los restos de materiales cerámicos atopaos n’El Cierro y La Lloseta; y Comerciamos con Roma les fines de selmana del 19 de payares al 18 d’avientu, na que se va esplicar d’una entretenida manera la romanización de les poblaciones prehistóriques y l’apaición de les primeres monedes.