Xixón al día

Etiqueta: Cultura

  • LLABoral Centru d’Arte compite pol premiu del públicu del Premiu Europeu Art Explora – Académie des beaux-arts 2022

    LLABoral Centru d’Arte compite pol premiu del públicu del Premiu Europeu Art Explora – Académie des beaux-arts 2022

    LLABoral Centru d’Arte en collaboración cola asociación BERDE opta al premiu otorgáu pola audiencia del Premiu Européu Art Exploraa – Académie des beaux-arts 2022 col proyectu Filme & Vis-Ability. BERDE, un proyectu d’arte y tresformamientu social pa persones con diversidá intelectual o con problemes de salú mental, presenta al pie de Llaboral Centru d’Arte’l proyectu Filme & Vis-Ability, dirixíu a persones con diversidá intelectual.

    Esta iniciativa va producir un total de 51 curtiumetraxes que darréu van ser proxectaos nel Festival Internacional de Cine de Xixón en 2023, implementando práctiques y diálogos
    innovadores.

    Filme & Vis-Ability ye un programa innovador centráu nel individuu qu’espierta y alimenta los procesos creativos desenvolviendo la capacidá de cuntar hestories al traviés de la inspiración, la observación y l’aprendizaxe del pensamientu visual. L’oxetivu principal ye ufiertar dinámiques d’aprendizaxe, ferramientes y formación que potencien, fomenten y sofiten la espresión artística al traviés de la escritura creativa y el cine pa grupos de persones con diversidá intelectual. Mientres el taller, cada participante va producir un curtiumetraxe- dende la idea hasta’l montaxe final- que se va proxectar nel Festival Internacional de Cine de Xixón 2023.

  • Corrientes gana’l Concursu de Maquetes Pop-Rock 2022 entamáu pol Institutu de la Mocedá y 40 Principales

    Corrientes gana’l Concursu de Maquetes Pop-Rock 2022 entamáu pol Institutu de la Mocedá y 40 Principales

    El grupu Corrientes ganó’l concursu de Maquetes Pop-Rock 2022, qu’entamen conxuntamente l’Institutu Asturianu de la Mocedá y 40 Principales. Esta banda compitió con otres trés formaciones na final: Lofácil, María Díaz y Fesoria a les Ortigues.

    El ganador va recibir un premiu de 3.000 euros que tien de dedicase a la edición d’un CD o EP y un video d’unu cantar, a lo menos. Mientres el primer semestre de 2023, Corrientes va presentar el CD n’una actuación en directu.

    El Concursu de Maquetes Pop-Rock, que celebra la so 37ª edición, ye’l más antiguu d’estes característiques en tol país. A lo llargo de la so trayectoria participaron más de 800 grupos, superáronse los 200 conciertos y editáronse 58 discos.

  • Coldplay aterriza nel Centru Niemeyer

    Coldplay aterriza nel Centru Niemeyer

    D’ente les propuestes culturales qu’ufre esta selmana el Centru Niemeyer d’Avilés destaca, en clave musical, la proyección na Sala de  Cine d’unu de los conciertos de la banda británica Coldplay nel estadiu River Plate de Bonos Aires dientro de la so nueva xira mundial “Music of the Spheres”. Podrá vese como un estrenu, tan solo unes hores dempués de ser grabáu, en Salar Cine del centru cultural el sábadu 29 d’ochobre en dos sesiones, a les 16:30 y a les 20:00. Magar la hora del directu varia de la hora de reproducción, esto asocede para afaer l’eventu en Suramérica al horariu européu.

    Sentáu n’una butaca d’Avilés, pero viendo la gran pantalla directamente dende Arxentina,
    podrá esfrutase de los clásicos de tola carrera del grupu, como “Yellow”, “The Scientist”, “Fix You”, “Viva La Vida”, “A Sky Full Of Stars” y “My Universe”, nun estadiu llenu de vida, lluces, fueos artificiales y emoción. Les entraes pa esti eventu pueden adquirise al preciu de 13 €.

  • El Muséu Arqueolóxicu ya cunta col llibru de la so hestoria

    El Muséu Arqueolóxicu ya cunta col llibru de la so hestoria

    El Muséu Arqueolóxicu d’Asturies cunta yá col relatu de los sos más de 150 años de trayectoria. El Gobiernu d’Asturies y la editorial Impronta coeditan Hestoria del Muséu Arqueolóxicu d’Asturies, escritu pol arqueólogu José Antonio Fernández de Córdoba Pérez. El llibru presentóse ayeri nel salón d’actos del muséu pol director xeneral de Cultura y Patrimoniu, Pablo León; la directora del Muséu, María Antonia Pedregal, Marcu de la Rasilla Vives, profesor titular de Prehistoria de la Universidá d’Uviéu, y el mesmu autor.

    La obra recueye la evolución d’esta institución dende 1844 hasta 1996, lo que dexa realizar un viaxe al traviés de la hestoria de l’arqueoloxía n’Asturies al traviés de más de sieglu y medio. El testu pon especial atención n’esplicar la formación de l’actual colección y en dexar constancia de les persones que d’una o otra forma caltuvieron un venceyu relevante cola institución, especialmente los sos conservadores y los principales donantes de pieces.

    L’orixe del Muséu Arqueolóxicu remontase a la obligación de la Comisión de Monumentos d’Asturies de recoyer les pieces más relevantes procedentes de la desamortización. Sicasí, dende’l so entamu aprecia l’interés de los sos promotores por axuntar los oxetos más significativos pa ilustrar la hestoria d’Asturies, nel contestu de la creación de la idea de la nación española y les sos rexones.

    El llibru ocúpase tamién de les distintes sedes qu’ocupó la institución a lo llargo d’esos 150 años d’hestoria como’l conventu de San Francisco d’Uviéu/Uviéu, el patiu central de les Escueles Normales de la cai Uría, los baxos de casa del deán Payarinos (l’edificiu del actual conservatorio) y, finalmente, el monesteriu de San Vicente.

    Al mandu de la institución tuvieron personalidaes destacaes y venceyaes col estudiu de la hestoria y la cultura n’Asturies, como l’historiador Ciriaco Miguel Vigil, el profesor de la Universidá d’Uviéu Fermín Canella Secades o l’escultor Víctor Hevia Granda. A partir de 1952 asocediéronse como directores del mesmu Manuel Jorge Aragoneses, Francisco Jordá Cerdá, Carlos María de Luis y Matilde Escortell Ponsoda.

    El llibru revisa la evolución de les esposiciones permanentes y recueye les vinculaciones del Muséu con otres instituciones, especialmente la Comisión de Monumentos d’Asturies y el Serviciu d’Investigaciones Arqueolóxiques, sobre la so hestoria ufiértase importantes novedaes. Inclúi tamién un averamientu a la formación de la so biblioteca y al montaxe museográficu de la celda del padre Feijoo.

  • Amosando pieslla 2022 con Slum Suit y Mostru l’Horru

    Amosando pieslla 2022 con Slum Suit y Mostru l’Horru

    Esti domingu 23 a les 12h remata la edición 2022 d’Amosando, el ciclu de presentaciones de novedaes discográfiques impulsáu por musicasturiana.com, con un formatu ente conciertu acústicu con aforu reducíu, programa de televisión y alderique. Nesta grabación participen el grupu jazz Slum Suit pa presentar el so discu ‘La Casa Vieya’ y el dúu de rap Mostru l’Horru, que publicaron apocayá’l so primer trabayu ‘Señales de Fumu’.

    Slum Suit ye una banda de jazz de raigañu que trabaya cola música popular asturiana amestándola a armoníes jazz. Formólu en 2017 el gaiteru y saxofonista carbayón Carlos Casado, cuando taba emigráu a Nueva York, y en 2019 afitó’l proyectu n’Asturies. ‘La Casa Vieya’ ye’l so tercer EP, nel qu’anoven el so soníu y incorporen al grupu a veteranos de la escena jazzística astur.

    Mostru l’Horru ye una formación de hip hop n’asturianu fundáu en 2021 pol xixonés Fran
    Méndez y nel que participa’l productor llangreanu Zeros. ‘Señales de Fumu’ ye’l so primer
    trabayu, un discu rap d’ocho cantares nel que tamién suenen influyencies d’otros estilos
    como’l reggae o’l rock.

    Cola participación d’estos dos proyectos musicales nuevos -que reflexen la diversidá de la música fecha n’asturianu-, Amosando zarra la so cuarta temporada. La entrada pal eventu ye de baldre, pero namás tienen invitación les persones asociaes a L’Ensame de musicasturiana.com que ganaron el sortéu d’entraes.

    Cuatro años y 20 artistes
    Amosando nació en marzu de 2019 a idea de la plataforma musicasturiana.com. Nesti
    tiempu tocaron 20 artistes pa presentar les sos novedaes discográfiques: L-R, Xaime
    Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla, Caldo y Os Rabizos Baxel y Algaire. La suma de los videos de los conciertos algama más de 200.000
    reproducciones en YouTube. Estes actuaciones amuesen la calidá de la música fecha en llingua asturiana amás de la so variedá, yá qu’estilos como’l pop, indie, electrónica, folk, tonada, canción d’autor, rap, jazz y rock suenen nesta iniciativa producida por Ixuxú Cultura, realizada audiovisualmente por Javi Lueje y Rubén Álvarez, patrocinada nesta edición por Fundación Caja Rural de Asturias, cola collaboración de Fuensanta y subvencionada pola Fundación Municipal de Cultura y Educación de Gijón/Xixón.

  • Les XI Xornaes de Cine y Bioética del Nalón aborden la despoblación de les zones rurales y el manexu de les emociones na mocedá

    Les XI Xornaes de Cine y Bioética del Nalón aborden la despoblación de les zones rurales y el manexu de les emociones na mocedá

    Les XI Xornaes de Cine y Bioética qu’entama’l comité d’ética pa l’atención sanitaria del área VIII, con cabecera en Llangréu, van encetar na so undécima edición la despoblación de les zones rurales y el manexu de les emociones na adolescencia, cola proyección de dellos curtiumetraxes y coloquios posteriores.

    La presidenta del comité, Marta Iglesias, va presentar les xornaes mañana, miércoles, a les 18:30 hores, nel Cine Felgueroso de Sama. Darréu, van proxectase los curtios Pueblos nel olvidu y El valor de ser rural, a los que va siguir un coloquiu nel que va participar al comisionáu pal Retu Demográficu, Jaime Izquierdo, y que va moderar l’abogáu Pablo Herrero.

    La segunda xornada, dedicada al control de les emociones na adolescencia, va celebrase’l día 28, a partir de les 17:00 hores, nel Centru d’Innovación y Desenvolvimientu del Altu Nalón (Cidan), en Llaviana, onde van proxectar los curtiumetraxes Identidá y La adolescencia: asina nos sentimos. Darréu, un grupu d’estudiantes del conceyu van participar nun alderique moderáu pol pediatra Marcelino García-Noriega.

    El ciclu cunta cola collaboración de la conxusta cinematográfica Sala Escura, los conceyos de Llangréu y Llaviana, Alimentos L’Arcu, la Conseyería de Salú y el Serviciu de Salú del Principáu (Sespa).

    El comité d’ética pa l’atención sanitaria de la área VIII ye un órganu consultivu y interdisciplinar qu’asesora a pacientes, profesionales ya instituciones sanitaries en situaciones que plantegen dilemes éticos. Amás, contribúi a la protección de los derechos de les persones usuaries de los centros sanitarios y propón a les instituciones midíes afeches pal so cumplimientu.

  • Llangréu abre’l plazu pa conseguir les entraes del conciertu de baldre de Marisa Valle Roso

    Llangréu abre’l plazu pa conseguir les entraes del conciertu de baldre de Marisa Valle Roso

    El Conceyu de Llangréu yá tien a disposición del públicu gratuitu les entraes pal conciertu que la cantante Marisa Valle Roso va ufiertar el vienres 28 d’ochobre, a les 20.15 hores, nel Nuevu Teatru de La Felguera. L’accesu va ser de baldre amosando les invitaciones que pueden retirase na Casa de Cultura Escueles Doráu de Sama, el centru cultural Casa de los Alberti de Ciañu y la mesma taquilla del Teatru.

    L’actuación, na que l’artista va presentar los cantares del so últimu álbum, Lo fugaz, publicáu ese mesmu añu, ta incluyíu nel programa Dinamizart del Ministeriu pa la Transición Xusta y el Cambéu Demográficu, y ta promovíu pol Institutu pa la Transición Xusta, la Fundación Ciudá de la Enerxía (CIUDEN) y el Conceyu de Llangréu.

  • Preséntase la primer edición n’asturianu de la Biografía de Xovellanos

    Preséntase la primer edición n’asturianu de la Biografía de Xovellanos

    El profesor de la Universida d’Uviéu D. Juan Carlos Busto Cortina va presentar la primer edición de la Biografia de Jovellanos de José Miguel Caso González, n’asturianu, cola adautación de testos de M.a Teresa Caso Machicado y tradución de la Oficina de Normalización Llingüística del Conceyu de Xixón. Va facese esti martes 18 d’ochobre na Escuela de Comerciu, dientro del programa Ochobre lliterariu

    El pasáu 10 de setiembre cumplíase’l tercer aniversariu de la muerte del Profesor Caso que foi, de xuru, la máxima autoridá del xovellanismu nos últimos tiempos. La Fundación Foro Jovellanos del Principau d’Asturies, en sintonía colos sos principios d’esparder la vida y la obra del ilustre patriciu xixonés, quier testimoniar otra vuelta l’agradecimientu públicu al llabor realizáu en vida pol Prof. Caso cola espublización d’esta nueva obra.

  • Héroes ensin nome arranca esta nueche en RPA

    Héroes ensin nome arranca esta nueche en RPA

    Héroes ensin nome entama esta nueche nes ondes de la Radio del Principáu d’Asturies a partir de les 23:30 hores. Esti programa, que de manera independiente llanzó en redes sociales una primer temporada con 21 programes y entrevistes a xente como L-R, Misiva o Inaciu Galán, ente otros, vuelve agora al traviés de la radio y con una producción fecha por Cuatro Gotes Producciones.

    La nueva temporada pretende ser una continuación de l’anterior, onde dellos personaxes de la cultura asturiana van pasar pelos sos micros a falar de la so trayectoria, d’Asturies y a pasar un bon ratu con delles preguntes incómodes, pero gracioses. Nel primer episodiu, que s’estrena güei, falen dende Mieres con Ferla Megía, cantautor sierense. Sicasí, les entrevistes a personaxes más relevantes del panorama cultural asturianu tovía tan por llegar. Bandes como Desakato o Algaire y escritores como Diego Solís van tener la oportunidá de sentase a charrar con Yedra Riesgo y Raúl Alonso, presentadores del programa.

    Héroes ensin nome ye un proyectu fechu por xente mozo, col asturianu como llingua vehicular, col oxetivu de promover y d’esparder les propuestes y proyectos culturales que surden n’Asturies al traviés d’entrevistes onde s’analiza y se debate colos propios autores y onde se conversa tanto formal como informalmente. La finalidá del proyectu ye amosar, al públicu xeneral, al traviés d’un alderique curtiu, la bayura cultural qu’hai dientro de la sociedá asturiana en dellos ámbitos, como la música, la lliteratura o la moda, ente otros.

  • Les Biblioteques de Xixón súmense a la celebración del Día de les Escritores

    Les Biblioteques de Xixón súmense a la celebración del Día de les Escritores

    La Rede Municipal de Biblioteques de Xixón súmense a la celebración el día 17 d’ochobre de la VII edición del Día de el Escritores, promovío pola Biblioteca Nacional d’España, col enfotu de reivindicar el llabor y el legáu de les escritores a lo llargo de la hestoria, entamando nes biblioteques de la Rede esposiciones bibliográfiques coles obres de les autores escoyíes pola Biblioteca Nacional d’España nesta ocasión sol lema «Antes, mientres y dempués de les guerres».

    Amás ellaboróse una guía de llectura con una selección d’obres de lliteratura infantil y xuvenil escrites por muyeres que traten la tema de la guerra y que tán disponibles pal préstamu nel so catálogu. Les esposiciones pueden visitase a partir del 17 d’ochobre en toles biblioteques de la Rede y la guía de llectura va poder llograse en papel nes biblioteques, y en formatu dixital nes sos redes sociales y páxina web.