Xixón al día

Etiqueta: Dani Martín

  • Última selmana de competición pal Sporting

    Última selmana de competición pal Sporting

    El Sporting empieza la última selmana de competición. El sábadu va zarrar la temporada cola visita del Cádiz. En sumando los trés preceptivos puntos del partíu énte’l Reus, los de José Alberto encaren esti zarru de campaña col ánimu de quedar lo más alto posible na clasificación. Pela so parte, el cuadru andaluz tien inda pindiu d’apostar mañana énte l’Estremadura’l so penúltimu alcuentru, aplazáu pol fallecimientu de Reyes.

    La selmana empezó en Mareo con delles ausencies nel entrenamientu del grupu: Dani Martín, cola Selección Española Sub21; Lod, cola de Finlandia; Geraldes, Aitor García y Álvaro Jiménez, col readaptador; Hernán Santana, na so casa por una afección vírica; Traver, sometíu a tratamientu y fisioterapia, y Diego Mariño, col rehabilitador, ente que Isma Cerro emplégase parcialmente colos sos compañeros. Ye baxa federativa pa la próxima xornada Peybernes.

    El Sporting volverá entrenase mañana martes a les 10.30 hores en réxime de concentración, con comida a la fin del mesmu nes instalaciones raxones.

  • Dani Martín, Santana, Djurdjevic y Alegría reincorpórense al entrenamientu

    Dani Martín, Santana, Djurdjevic y Alegría reincorpórense al entrenamientu

    L’entrenamientu del Sporting d’esta mañana volvió cuntar cola presencia nel mesmu de Dani Martín, Hernán Santana, Djurdjevic y Álex Alegría. Los cuatro xugadores reincorporánse al trabayu una vez superaes les sos respectives molesties físiques. Nel casu del porteru ye’l so últimu entrenamientu de la temporada antes d’incorporase a la disciplina de la Selección Española Sub21. Tamién toma parte de manera parcial Isma Cerro.

    Tabayaron nel ximnasiu Traver, Álvaro Jiménez y Geraldes, Aitor atópase col readaptador y Diego Mariño col fisioterapeuta.

    Mañana vienres va tener llugar a les 10.30 hores, nuevamente en Mareo y de puertes abiertes, l’últimu entrenamientu de la selmana, nuna xornada ensin competición, cuidao que nesta penúltima jornado los roxiblancos tán empareyaos col Reus: «Nun se xuega’l partíu por cuenta de la espulsión del CF Reus de la competición d’alcuerdu al Resolvimientu del Xuez de Disciplina Social de LaLiga. Resultancia en función de la normativa reglamentaria aplicable».

  • Dani Martín, a la Selección Sub21

    Dani Martín, a la Selección Sub21

    Dani Martín ya piensa na Selección Sub21. Depués d’entrenase col Sporting esti xueves pela mañana na escuela de fútbol de Mareo, el porteru roxiblancu pasó pela sala de prensa onde aseguró asumir el retu «con muncha ilusión y bien contentu por haber entrada na convocatoria». El xixonés va tar mañana a la una de la tarde na Ciudá Deportiva de Las Rozas de la Real Federación Española de Fútbol, onde se va sumar al conxuntu nacional. Asume la competencia que se va atopar na portería y dirá «lluchar pol puestu». Ellí va coincidir nuevamente con Jorge Meré, «siempres un gran sofitu» para él, amás de ser «un bon amigu». El central del Colonia tuvo precisamente esta mañana de visita en Mareo.

    Preguntáu pol balance del añu, recordó qu’empezó la temporada con una «mancadura grave pa un porteru», como foi la quiebra d’un deu d’una mano. «Depués llegó la Copa, con partíos que me dieron muncho enfotu», y finalmente acabó xugando en LaLiga tres la mancadura de Diego Mariño. La temporada déxalu «contentu». En referencia a la próxima campaña, aseguró vela «inda alloñada» y espunxo que “toos precisamos xugar, pero ye depués l’entrenador el que decide”.

  • El Sporting más solidariu

    El Sporting más solidariu

    Los xugadores del Sporting amosaron esti martes el so llau más solidariu. Entregaron les botes pa la campaña que lleva a cabu Abdou, el mozu senegales llegáu a España en patera que vistió la camiseta del club hasta la categoría de División d’Honor. Amás de realizar un grau técnicu de fútbol, completó los estudios de Maxisteriu. P’ayudar a los mozos del so país d’orixe, lleva a cabu esta campaña, a la que sumóse decididamente’l Sporting de la mano de la so Fundación.

    Asina foi l’empiezu d’un entrenamientu que se desenvolvió n’una mañana soleyera. N’él participaron un importante númberu de xugadores del filial, dáu’l númberu d’ausencies de xugadores de la primer plantiya.

    Traver sometióse preventivamente a tratamientu y fisioterapia, por cuenta de problemes de aductores. Tamién por molesties y dolencies diverses, completaron l’entrenamientu nel ximnasiu Alex Alegría, Geraldes, Álvaro Jiménez, Hernán Santana y Djurdjevic. Aitor García y Dani Martín realizaron carrera continua col readaptador. Finalmente, prosiguen cola so recuperación Isma Cerro y Diego Mariño tres los sos respectivos pasos pol quirófanu.

    Mañana xueves, nuevamente entreamientu en Mareo a les 10.30 hores de puertes abiertes. Va ser la última sesión col equipu esta temporada de Dani Martín, que se va incorporar a la Selección Española Sub21. Tamién foi convocáu con Martinica Babin, magar nel so casu va sumase al términu de la temporada.

  • José Alberto llama a entrenase a siete xugadores del filial

    José Alberto llama a entrenase a siete xugadores del filial

    Geraldes recupérase del balonazu recibíu nel partíu del pasáu sábadu n’El Molinón, cuando precisó ser camudáu, anque l’oftalmólogu que lu atiende lu caltien en reposu y n’estáu de siguimientu. Sufrió una contusión ocular. El so diagnostico ye «hiphema post traumática nel güeyu derechu».

    El portugués encabeza’l parte médicu del día, nel qu’esplica qu’Álvaro Jiménez y Álex Alegría reciben tratamientu y sométense a fisioterapia, Aitor y Isma Cuetu emplegar col readaptador y Diego Mariño ta col fisioterapeuta.

    La mañana ta marcada pola agua, col orbayu como protagonista. José Alberto llamó a entrenase a un total de siete xugadores con ficha del filial: los porteros Christian Joel y Javi Benítez, y el xugadores de campo Carlos Corderu, Pedro Díaz, Jose Gragera, Pelayo Morilla y Pablo Fernández.

    L’equipu roxiblancu, qu’esta xornada nun tien partíu, al toca-y na mesma’l Reus, entrénase tola selmana a les 10.30 hores en Mareo, en sesiones de puertes abiertes.

    El Sporting tien la baxa federativa para la próxima jornda de Peybernes, tres la so espulsión el sábadu, ente que Dani Martín incorporaráse’l próximu vienres a la Selección Española sub21. Por precuru, por cuenta d’unes molesties musculares, el porteru completó l’entrenamientu esta mañana nel ximnasiu.

  • Dani Martín y Nacho Méndez, cola sorrisa del draft

    Dani Martín y Nacho Méndez, cola sorrisa del draft

    Dani Martín y Nacho Méndez empecipiaron l’entrenamientu del Sporting d’esta mañana con una sorrisa, en sabiéndose ente los meyores promeses del fútbol español. El porteru foi escoyíu meyor porteru sub21 pol Comité Técnicu del Fútbol Draft d’esta temporada, mientres que’l centrocampista integra’l segundu equipu, el denomináu de plata.

    Na votación formaron parte del Comité Técnicu, como espertos nel fútbol de cantera, Javier Lasagabaster (director xeneral Futbol Draft), Josá María Timón (coordinador gabinete RFEF), Francis Hernández (coordinador de Selecciones Nacionales RFEF), Jacinto Alonso pPresidente de la Federación Rioxana y miembru de la Xunta Directiva de la RFEF), Luis de la Fuente (seleccionador sub21), David Gordo (seleccionador sub17), Julen Guerrero (seleccionador sub16), Pedro López (Seleccionador femenín Sub 19), Jesús Barbadilla “Jesule” (AFE), Ángel Caballero (AEAF – Asociación Española Axentes Xugadores), Ricardo Resta (La Lliga), Vicente Miera (exseleccionador nacional absolutu), Nacho Silván, (espertu de fútbol cantero) y Ana Rossell (esperta en fútbol femenino).