Etiqueta: Foro Asturies

Carmen Moriyón va ser la candidata a l’alcaldía de Xixón de FORO Asturies

La Presidenta de FORO Asturies, Carmen Moriyón, dio güei un nuevu pasu al frente y anunció, primero na Comisión Directiva que celebró’l partíu, y dempués, na espicha
de Navidá colos afiliaos y al traviés de les sos redes sociales, que va ser la candidata de FORO Asturies a l’Alcaldía de Xixón nes próximes elecciones municipales, previstes
para’l 28 de mayu de 2023. Carmen Moriyón decidió faer públicu esti anunciu al traviés de la publicación d’un vídeu nel que tresllada que “doi’l pasu y preséntome como candidata de FORO Asturies a l’Alcaldía de Xixón dende’l convencimientu más fondu de que, si trabayamos duru, lo meyor para Xixón ta por llegar”. Asegura tamién tener “la mesma ilusión que’l primer día” pa volver ser l’Alcaldesa de Xixón, cargu qu’ocupó mientres dos mandatos ente 2011 y 2019, y confiesa que ser alcaldesa “ye’l máximu honor al que una xixonesa puede aspirar”.

Moriyón esplica nel so anunciu oficial que va ser la cabeza de llista de FORO Asturies a l’Alcaldía y que, al rematar el mandatu, y tornar al so llabor nel Hospital de Cabueñes, onde tien la so plaza como ciruxana, tuvo “arrodiada de profesionales que, nos tiempos más duros, fueron un exemplu de los meyores valores de la nuesa sociedá; pero tamién arrodiada del ciñu de bien de persones que, a confianza, día tres día, treslladáronme una ilusión y una esperanza: que Xixón volviera al camín qu’entamó con nós”. “Esa ilusión y esa esperanza son la razón pola que tomé la decisión de ser la candidata de FORO Asturies a l’Alcaldía de Xixón”, xustifica Carmen Moriyón, coles mires de “siguir faciendo de Xixón una ciudá abierta, curiosa, innovadora, que nun dexa a naide atrás mientres mira al futuru con ambición”. Carmen Moriyón asegura tamién que nesti camín qu’empecipia güei va tar acompañada d’un “gran equipu de trabayu, con esperiencia na xestión”.

16/12/2022
Pumares (FORO) esixe la reconocencia d’especialidá docente de llingua asturiana

El secretariu xeneral y voceru de FORO Asturies na Xunta Xeneral, Adrián Pumares, preguntó güei na Comisión d’Educación a la Conseyera sobre “qué actuaciones ta llevando a cabu por que’l Ministeriu d’Educación y Formación Profesional reconoza la especialidá docente pal profesoráu d’asturianu”. Pumares amosóse partidariu de “dar a la llingua asturiana un estatus curricular meyor del que tien, lo mesmo que de dar estabilidá y sacar de la precariedá a 400 profesores de llingua asturiana que desenvuelven el so llabor na educación pública y concertada, y que viven una situación d’agraviu en relación con otres especialidaes”. Según el voceru forista, “si queremos acabar cola precariedá y la discriminación de casi 400 profesores d’asturianu ye imprescindible la reconocencia de la especialidá docente de Llingua asturiana”.

El diputáu de FORO Asturies, que reconoció énte la Conseyera que “anguaño hai un déficit de derechos per parte de los falantes d’asturianu que los partíos políticos tenemos la obligación d’arreglar”, quixo dexar claro que “nun compartimos les escuses daes pol Gobiernu d’España”. Asina, Pumares punxo de manifiestu que “por munches escuses que pongan, nun hai xustificación posible por que’l Ministeriu d’Educación nun faiga’l cambéu correspondiente nos reales decretos d’especialidaes de Primaria y Secundaria que dexe qu’aquelles Comunidaes Autónomes con llingua propia non oficial, pero con implantación curricular, puedan desenvolver la especialidá docente”.
Adrián Pumares, que recordó que “les enseñances d’asturianu tán presentes nel sistema educativu del Principáu d’Asturies con calter regláu dende l’añu 1984”, tamién censuró “la ‘engarradiella’ que tienen el PP y el PSOE en relación cola especialidá docente”, y recordó que “el Partíu Popular, que siempres lo defendió y llevó nel so programa electoral agora vota en contra”.

El secretariu xeneral de FORO Asturies remató la so intervención manifestando que “nestos últimos díes, una plataforma contraria a la oficialidá del asturianu dixo nueves barbaridaes sobre la llingua asturiana. Tenemos que dexar bien claro que nin esiste nin se ta creando nenguna casta llaboral privilexada; al contrariu, de lo que tamos falando ye de terminar cola precariedá de casi 400 docentes asturianos”.

04/03/2022
Pumares (FORO) esixe a Berta Piñán que «execute d’una vez les obres del edificiu d’accesu a la Cueva de Tito Bustillo»

El secretariu xeneral y voceru de FORO Asturies na Xunta Xeneral, Adrián Pumares, esixó güei a la Conseyera de Cultura, Política Llingüística y Turismu na Comisión correspondiente que “dexe de tomar el pelo a los ribeseyanos”. Pumares, que criticó duramente’l retrasu del Gobiernu asturianu n’executar la partida presupuestaria pa la rehabilitación del edificiu d’accesu a la Cueva de Tito Bustillo, considera “un desastre” la xestión de la Conseyería nesti asuntu. “Ye dramática, nun hai por onde coyer”, dixo’l voceru.

“Póngase manes a la obra y dexe de dar bandazos: en nenguna materia, tampoco en política llingüística, el so llabor como Conseyera de Cultura ta al altor de lo que precisa’l Principáu d’Asturies”, refartó Pumares, quien reclamó a Berta Piñán que “cumpla colos plazos qu’usté mesma punxo sobre la mesa, y acometan cuanto antes les obres nel edificiu d’accesu de la Cueva de Tito Bustillo”. El dirixente de FORO Asturies llamentó que “tal paez qu’el nuesu patrimoniu cultural nun cunta nada pal Gobiernu del Principáu d’Asturies”, y emplazó a Berta Piñán a que “dexe de rise de los riosellanos y de tolos asturianos despreciando’l nuesu patrimoniu cultural, tamién les cueves de Tito Bustillo”.

El voceru forista recordó que “dende FORO Asturies llogramos que’l Gobiernu incluyera nos Presupuestos pa 2021 una partida de 110.000€ pa esta actuación. Pero ustedes, siendo fieles a los principios del PSOE de nun faer nada, pero aparentar enforma, nun executaron nin un céntimu d’esa partida y volvieron a dexar calcada nos Presupuestos d’esti añu 2022 que llograron aprobar. Mesmu importe: 110.000€”. El diputáu foi especialmente críticu con “les surrealistes esplicaciones daes nel so momentu pol Director Xeneral de Patrimoniu, quien afirmó que les obres nun se llevaron a cabu porque los daños yeren mayores que los primeramente previstos”. Según Pumares, “les escuses que dan pa nun realizar estes obres nel añu 2021 nun hai quien-y les crea: si l’actuación tien que ser más ambiciosa que lo primeramente previsto nun tien sentíu que presupuesten la mesma cantidá que l’añu pasáu dexaron ensin executar, 110.000€”.

17/02/2022
FORO, dispuestu a siguir cola reforma del estatutu

El Comité Executivu de FORO Asturies emitió güei la siguiente declaración, cola que da pie a siguir cola reforma del estatutu:

«Dende FORO Asturies analicemos técnicamente la propuesta de Podemos y, almitiendo que son meyores, paeznos que tien los requisitos mínimos p’vanzar na busca d’un alcuerdu.

En FORO Asturies tamos dispuestos a sentanos colos otros 3 partíos pa, anque paeza tarde, empecipiar la negociación.

Dende FORO Asturies caltenemos la importancia de les reformes que defendemos, tanto la fiscal como la reforma del Estatutu, y llamentamos la intransixencia d’IX y del PP nun momentu clave p’Asturies».

31/01/2022
SUATEA reclama que Foro nun anteponga intereses propios pa la reforma del estatutu

El Sindicatu Unitariu y Autónomu de Trabayadores de la Enseñanza d’Asturies reclama al partíu políticu Foro Asturies que nun anteponga intereses propios pa la reforma del estatutu que faiga oficial les llingües propies d’Asturies. Amás, critiquen tamién la so falta de talante negociador. La formación llanza el siguiente comunicáu col envís de facer reflexonar al partíu de centroderecha asturianu:

Ayeri pela tarde, el conceyu ente Foro, IU, Podemos Asturies y PSOE p’ apautar la reforma l’Estatutu autonomía asturianu acabó ensin consensu al calterner Foro la so exigencia de qu’esta reforma tien de llevar xuncida a ella una rebaxa fiscal.

La reforma estatutaria emburriada poles otres trés fuercies polítiques, onde se quier afitar el derechu fundamental a emplegar les nuestres llingües autóctones cola declaración de la cooficialidá del asturianu y el gallego-asturianu ,quedó bloquiada al caltener Foro la so esixencia inamovible de que tien de recoyese, ente otres midíes fiscales l’esaniciu del impuestu socesiones.

Esta postura inmovilista de Foro rescampla la so falta de talante negociador, pues la otra parte yá cedió aceptando la propuesta de Foro d’una mayoría mui cualificada de 3/5 de la Xunta p’aprobar la posterior llei de desarrollu de la oficialidá o de normalización llingüística. Y ello magar qu’esa mayoría, según opinión de munchos xuristes, supón de fechu frenar o mermar enforma la capacidá y axilidá llexislativa de la Xunta. Pa SUATEA ,esa propuesta de Foro de 3/5 amuesa como ellos, d’aprobase la oficialidá, quieren siguir teniendo el control del so desarrollu o de frenalu lo más posible, de caltenese nel futuru próximu una representación de fuercies polítiques asemeyada a la d’anguaño.

La so postura, poro, nun ye sincera nin comprometida dafechu colos derechos llingüísticos de les y los asturianos. Paez más bien que quieren una oficialidá qu’asonsañe a la ineficaz Llei d’Usu, agora tamién defendida por PP y Ciudadanos como mal menor.

Foro emplega’l lema «Centrados en Asturias» p’amosar que ye un partíu del llamáu centru políticu y amás dándo-y un calter propiu d’asturianía. Sicasí, cola so forma d’actuar, ye dicir, colos fechos, nun demuestra congruencia con nenguna de les dos pretendíes etiquetes.

Nun demuestra asturianía, asturianidá nin muncho menos asturianismu. Asturies nun solo ye un país, un territoriu al que querer, Asturies ta integrada pola xente que s’asitia viviendo nesta tierra, y una parte d’eses persones lleva más de 40 años reclamando tener los mesmos derechos llingüísticos que les demás que conviven con elles. Ensin un compromisu firme cola oficialidá ello nun ye posible.

Tampoco ye un partíu de centru. Vienen priorizando per agora nes sos negociaciones, nidiamente, ensin ponese coloraos, los intereses monetarios d’una parte de los/les sos votantes (les/los más ricos) cuando anteponen l’esaniciu del impuestu socesiones al reconocimientu del derechu fundamental d’emplegar llibremente les nuestres llingües autóctones. Con ello lleven demostrando, va tiempu, que tán dispuestos a vender un derechu fundamental por un puñáu d’Euros.

Dende SUATEA esperamos que’l guión d’esti espagueti wester dea un valtu y Foro se dexe llevar pola dolce melodía d’Ennio Morricone, abandonaldo’l papel de villanos pa convertise nel mocín de la película defendiendo los intereses del Pueblu.

25/01/2022
La reforma del estatutu queda bloqueada énte les esixencies de FORO Asturies

Tres el conceyu d’esta mañana ente los principales partidos políticos que taben d’alcuerdu na reforma estatutaria, ye dicir, PSOE, IU, Podemos Asturies y FORO Asturies, la reforma del estatutu d’autonomía d’Asturies sigue bloqueada, principalmente poles esixencies de FORO.

En pallabres de Dolores Carcedo, vocera del PSOE «hai tres fuercies a favor de la oficialidá y de la reforma con 26 diputaos y otru partíu, que ye FORO, col oxetivu de baxar impuestos. Lo que FORO tresllado con esto ye’l no a la oficialidá».

Per otra parte, Rafael Palacios, voceru de Podemos Asturies declaró que nel conceyu «trés grupos políticos vinieron a falar d’oficialidá y otru vieno a falar d’impuestos y ye mui dificil alcontrar un puntu d’alcuerdu ya imposible poder avanzar cuando se fala de coses distintes. Tanto tiempu trabayando y planteando pa reconocer un derechu, alcontrámanos con un partíu políticu que’l so interés ye otru.» Sofía Castañón añedía «que’l momentu pa la oficialidá ye agora y que Adrián Pumares tovía puede recapacitar».

Hasta’l 31 de xineru, según los partidos políticos, tarán a la espera del cambéu de parecer pa poder siguir alantre cola reforma del estatutu d’autonomía qu’incluyá la oficialidá de les llingües propies d’Asturies.

24/01/2022
Pumares (FORO) reclama’l cese del conseyeru d’Industria

El secretariu xeneral y voceru de FORO Asturies na Xunta Xeneral, Adrián Pumares, axuntóse esta mañana col Comité d’Empresa de Alu Ibérica pa “reclamar la intervención de la Sociedá Estatal de Participaciones Industriales (SEPI) y evitar l’ERE de tola plantiya”. Pumares, amás, cargó con durez contra’l Conseyeru d’Industria, Enrique Fernández, al qu’acusó de “mentir y actuar como un simple delegáu del Gobiernu d’España en llugar de como un Conseyeru d’Asturies” y del qu’afirmó que “el Conseyeru d’Industria, Enrique Fernández, nun puede siguir nin un minutu más nel so puestu, porque a la so incapacidá pa resolver los graves problemes d’Asturies súmense los sepermanentes mentires en relación cola factoría de Alu Ibérica”.

El voceru de FORO Asturies, que confirmó que «naturalmente sumaremos al pidimientu de reprobación al Conseyeru d’Industria”, tamién pidió al Presidente del Principáu, Adrián Barbón, “qu’asuma la so responsabilidá nesti asuntu. Nun tenemos d’escaecer que Barbón se presentó a les elecciones vendiendo les sos bones relaciones col Gobiernu d’España, pero sicasí dende l’entamu de la llexislatura’l Principáu nun fai más que sumar desprecios per parte del executivu de Pedro Sánchez”. Asina, Pumares reclamó “el cese” del Conseyeru, manifestando que “el Presidente Barbón fixo casu a FORO Asturies treslladando parte de les competencies de la Conseyería d’Industria a la Conseyería de Ciencia; agora tóca-y escuchar el clamor que reclama’l cese inmediatu d’Enrique Fernández”.
Según el criteriu del dirixente forista, “la única solución ye la intervención de la SEPI”. Nesti sen, Pumares recordó que “yá’l pasáu mes d’abril, n’una xunta como la caltenida güei col Comité d’Empresa, esiximos la intervención inmediata de la SEPI, según la constitución d’una mesa nacional na que tuvieren representaos, amás de los trabayadores, el Ministeriu y los Gobiernos d’Asturies y de Galicia”. Pumares quixo tamién amosar la so esmolición pola posibilidá de que los nuevos socios industriales prescindan de el trabayadores, afirmando que “el fechu de que los nuevos socios esixan prescindir de la plantiya para mercar la factoría sería un nuevu escándalu que tenemos la obligación de frenar al traviés d’una intervención estatal que ta absolutamente motivada y xustificada”.

Finalmente, el diputáu de FORO Asturies afirmó que “por enforma que la Ministra Teresa Ribera pretenda negalo, rescampla que’l preciu de la enerxía foi’l principal motivu qu’anició esta situación, y a esto suman el fallíu estatutu de les electrointensivas y l’ausencia de proyectos alternativos a los zarros que se tán produciendo”. En resume, según Pumares, “la situación, consecuencia fundamentalmente de la tarifa eléctrica y de la falta de midíes per parte del Gobiernu d’España, solo esplícase énte la incapacidá del Gobiernu asturianu pa poner los problemes de la nuesa Comunidá Autónoma enriba de la mesa del Conseyu de Ministros”.

14/01/2022
Adrián Pumares (FORO) cree que Santander va siguir siendo l’aeropuertu d’Asturies

El secretariu xeneral y voceru de FORO Asturies na Xunta Xeneral, Adrián Pumares, valoró güei l’anunciu del Gobiernu asturianu de licitar un nuevu contratu de conectividá aérea, tres la decisión del Tribunal Alministrativu Central de Recursos Contractuales (TACRC) de dar la razón un recursu presentáu pola aerollínea Volotea y anular l’anterior. Según Pumares, “el Conseyeru Alejandro Calvo intenta despintar la so incompetencia vendiéndonos como una bona noticia la decisión del Tribunal Alministrativu Central de Recursos Contractuales (TACRC) que fuerza al Gobiernu a ellaborar un nuevu contratu de conectividad aérea, pero la realidá ye que l’Aeropuertu d’Asturies va siguir tando en Santander”.

El voceru de FORO Asturies esplicó que “el TARCR sí dexaba abiertu, xustificándolo, llicitaciones de campañes de promoción de dellos destinos arrexuntaes nun únicu llote. Sicasí, el nuevu contratu de conectividad aérea ellaboráu pol Gobiernu asturianu, que nin apriende de los erros nin ye capaz de resolver los problemes, ufierta destinos por separáu, polo que difícilmente se podrá cubrir el mapa anunciáu”. Por ello, Pumares considera que “na Conseyería de Mediu Rural y Cohesión Territorial anteponen la comodidá a solucionar los problemes d’Asturies”.

El dirixente forista, que recordó que “yá sollerté en diverses ocasiones na Xunta Xeneral de les graves faltes d’Asturies en materia de conectividad aérea, manifestó que “la conectividad del Aeropuertu d’Asturies solo puede dir a meyor, cuidao que anguaño nun cuntamos con nengún destín internacional, pero vamos siguir siendo la Comunidá Autónoma peor conectada de too el norte d’España”.

El diputáu remató reprochando al Gobiernu de Barbón “la tardanza n’encetar esti grave problema, utilizando como escusa la pandemia, y faelo amás a rebufo de les propuestes de FORO Asturies. Amás, Pumares llamentó que “el nuevu contratu supon retrasar l’entamu de les conexones aérees a payares d’anguaño 2022, lo qu’implica perder la temporada de branu, branu y seronda, y tar más de la metá de la llexislatura ensin vuelos internacionales, daqué que nun asocedió en nenguna Comunidá Autónoma vecina”.

12/01/2022
FORO Xixón refuga participar na xunta del paséu del Muru de San Llorienzo

El Grupu Municipal de FORO Asturies unvió güei a Alcaldía una misiva na que torna la invitación a participar nuna xunta sobro la configuración urbanística del paséu del Muru de San Llorienzo nel curtiu plazu.

Na carta, dirixida a l’Alcaldesa, Ana González, los conceyales foristas esponen que “la nuesa postura ye clara desque, a finales del branu pasáu, dexó de tener sentíu la decisión unillateral de caltener la eliminación del tráficu n’unu de los sentíos de circulación, so la sida d’ampliar los espacios piatonales; daqué que, amás, contravien la llegalidá vixente sobro la configuración urbanística, recoyida nel Plan Especial del Muriu de San Llorienzo”.

“L’actual situación de colapsu del tráficu nes víes circulatories alternatives al Muriu, según l’escasu usu que per parte de el peatones ta dándose al carril de circulación pintáu de colores y conocíu como ‘cascayu’, tien un únicu responsable, que nun ye otru que l’Equipu de Gobiernu. Por tanto, y tal qu’usté declaró en repitíes ocasiones, ye l’Equipu de Gobiernu l’únicu responsable de tomar les decisiones que reviertan la situación y solucionen los problemes qu’ustedes mesmos crearon”, prosigue la misiva.

“Dende FORO Asturies- recuerden- esiximos, ente otres coses, el restablecimientu del doble sentíu nel Muru de San Llorienzo porque entendemos que ye una imperiosa necesidá pa la ciudá. Por ello, creemos que nun ye necesaria nenguna xunta a efectos d’adoptar esa decisión, como tampoco hubo xunta dalguna p’adoptar la contraria, pa pintar el ‘cascayu’ o pa les actuaciones, llargamente refugaes, nes cais Ruiz Gómez y Caridá”.
“Por tollo, esperamos a conocer la decisión que tome l’Equipu de Gobiernu, pero nun vamos participar d’una xunta que, a la nuesa manera de ver, namá pretende difuminar la responsabilidá política de decisiones unillaterales qu’empioraron la situación de la ciudá, y que xeneraron xuna contestación social qu’esixe la rectificación inmediata”, conclúi la carta de los conceyales foristas.

14/12/2021