El secretariu xeneral y voceru de FORO Asturies na Xunta Xeneral, Adrián Pumares, preguntó güei na Comisión d’Educación a la Conseyera sobre “qué actuaciones ta llevando a cabu por que’l Ministeriu d’Educación y Formación Profesional reconoza la especialidá docente pal profesoráu d’asturianu”. Pumares amosóse partidariu de “dar a la llingua asturiana un estatus curricular meyor del que tien, lo mesmo que de dar estabilidá y sacar de la precariedá a 400 profesores de llingua asturiana que desenvuelven el so llabor na educación pública y concertada, y que viven una situación d’agraviu en relación con otres especialidaes”. Según el voceru forista, “si queremos acabar cola precariedá y la discriminación de casi 400 profesores d’asturianu ye imprescindible la reconocencia de la especialidá docente de Llingua asturiana”.
El diputáu de FORO Asturies, que reconoció énte la Conseyera que “anguaño hai un déficit de derechos per parte de los falantes d’asturianu que los partíos políticos tenemos la obligación d’arreglar”, quixo dexar claro que “nun compartimos les escuses daes pol Gobiernu d’España”. Asina, Pumares punxo de manifiestu que “por munches escuses que pongan, nun hai xustificación posible por que’l Ministeriu d’Educación nun faiga’l cambéu correspondiente nos reales decretos d’especialidaes de Primaria y Secundaria que dexe qu’aquelles Comunidaes Autónomes con llingua propia non oficial, pero con implantación curricular, puedan desenvolver la especialidá docente”.
Adrián Pumares, que recordó que “les enseñances d’asturianu tán presentes nel sistema educativu del Principáu d’Asturies con calter regláu dende l’añu 1984”, tamién censuró “la ‘engarradiella’ que tienen el PP y el PSOE en relación cola especialidá docente”, y recordó que “el Partíu Popular, que siempres lo defendió y llevó nel so programa electoral agora vota en contra”.
El secretariu xeneral de FORO Asturies remató la so intervención manifestando que “nestos últimos díes, una plataforma contraria a la oficialidá del asturianu dixo nueves barbaridaes sobre la llingua asturiana. Tenemos que dexar bien claro que nin esiste nin se ta creando nenguna casta llaboral privilexada; al contrariu, de lo que tamos falando ye de terminar cola precariedá de casi 400 docentes asturianos”.
