Xixón al día

Etiqueta: Iniciativa pol Asturianu

  • Iniciativa pol Asturianu reclama a ITVASA l’usu del asturianu y de la toponimia oficial

    Iniciativa pol Asturianu reclama a ITVASA l’usu del asturianu y de la toponimia oficial

    Iniciativa pol Asturianu ta acabante presentar a la sociedá Inspección Técnica de Vehículos de Asturias S.A. (ITVASA) un escritu pa desixir la presencia de la llingua asturiana y del eonaviegu na cartelería y nes informaciones de les diferentes estaciones de la compañía que s’atopen repartíes per Asturies. Hai que recordar qu’ITVASA ye una sociedá que s’alcuentra participada de manera íntegra pol Gobiernu del Principáu d’Asturies.

    La organización tamién reclama l’usu de la toponimia oficial de los conceyos na cartelería asina como nel formulariu a la hora d’elexir estación pa pasar la revisión de los vehículos. Dientro de la propia web de la sociedá, incúmplese la toponimia oficial de Xixón y de Xarrio (nel conceyu de Cuaña).

    La propia Llei 1/1998, de 23 de marzu d’Usu y Promoción del Bable/Asturianu, establez nel so artículu 15, relativu a la toponimia, que “los topónimos de la Comunidá Autónoma del Principáu d’Asturies tendrán la denominación oficial na so forma tradicional. Cuando un topónimu tenga uso xeneralizáu na so forma tradicional y en castellán, la denominación podrá ser billingüe”.

    Iniciativa pol Asturianu considera que ye importante avanzar nel usu de la toponimia tradicional nuna sociedá cuya participación total ye del Gobiernu d’Asturies, asina como dir dando pasos pa que l’asturianu tea presente tamién nel espaciu web d’ITVASA asina como na cartelería.

  • Iniciativa pol Asturianu llamenta la falta de voluntá d’Educación pa recuperar el Plan Pilotu

    Iniciativa pol Asturianu llamenta la falta de voluntá d’Educación pa recuperar el Plan Pilotu

    La conseyera d’Educación, Lydia Espina, refugó’l xueves pasáu na comisión parlamentaria d’Educación de la Xunta Xeneral del Principáu d’Asturies la posibilidá de renovar la convocatoria del Plan Pilotu esperimental de Promoción del Usu del Asturianu puestu en marcha en seis centros pol Executivu autonómicu durante los cursos académicos 2017-2018 y 2018-2019. Iniciativa pol Asturianu llamenta esta falta de voluntá de los responsables de la Conseyería d’Educación por recuperar esti plan a costu cero pa la normalización y la presencia digna del idioma en diferentes escueles.

    La organización recuerda que la puesta en marcha d’esi Plan Pilotu nun requixo más recursos educativos y económicos pa la so realización. Dalcordies colos datos del Gobiernu del Principáu d’Asturies, el 83,6% de les families que participaron nel plan nel cursu 2017/2018 recomendaríen la participación nel programa. D’igual manera, un 41,59% de los estudiantes meyoraron los resultaos na asignatura cursada n’asturianu y el y un 42,57% caltuvo les calificaciones.

    Iniciativa pol Asturianu ñega que la falta d’oficialidá suponga un impedimentu pa la realización del Plan Pilotu y recuerda que nesi momentu’l Partíu Popular d’Asturies interpunxo una demanda que foi desestimada pola xusticia. Poro, la falta del reconocimientu d’oficialidá nun ye un argumentu válidu pa torgar la continuidá d’esta esperiencia educativa onde l’asturianu yera vehicular y de manera voluntaria.

    L’asociación insiste en que nun se puede esconder la poca ambición na política llingüística y educativa na ausencia del estatus d’oficialidá del asturianu y del eonaviegu.

  • Iniciativa pol Asturianu demanda la presencia del asturianu nos paneles nuevos d’El Molinón

    Iniciativa pol Asturianu demanda la presencia del asturianu nos paneles nuevos d’El Molinón

    Iniciativa pol Asturianu presentó una reclamación al Conceyu de Xixón pa que l’asturianu tea presente nes pantalles informatives instalaes recién nos aparcaderos del estadiu municipal El Molinón-Enrique Castro Quini. Los paneles electrónicos nuevos instaláronse hai delles selmanes y yá tan en funcionamientu.

    La organización de reivindicación llingüística llamenta l’ausencia del asturianu nunos elementos nos que la presencia del idioma nun xeneraría costu adicional, sinón que los mensaxes podríen intercalase y apurrise de forma billingüe. Aprovechando l’usu de la electrónica na cartelería, sedría bien interesante la presencia del asturianu pola so visibilidá de les informaciones (díes, hores…).

    Amás, Iniciativa pol Asturianu reclama l’usu de la toponimia oficial nestes pantalles, onde namás ta presente’l topónimu ‘Gijón’. D’esta manera, el Conceyu de Xixón inora la toponimia oficial, que recueye dende setiembre de 2006 la forma tradicional ‘Xixón’.

  • Iniciativa pol Asturianu súmase a les reivindicaciones del 8 de marzu col concursu «Ensin muyeres nun hai idioma»

    Iniciativa pol Asturianu súmase a les reivindicaciones del 8 de marzu col concursu «Ensin muyeres nun hai idioma»

    Con motivu del 8 de marzu, Día Internacional de la Muyer nel que se reivindica’l papel que tien la muyer na sociedá, Iniciativa pol Asturianu presenta un concursu de creación lliteraria qu’invite a reflexionar sobre la importante figura de la muyer como pegoyu onde deprendimos la nuesa llingua materna, fixándonos especialmente nesi idioma nel que viven, sienten y nos críen les muyeres que nos arrodien.

    El concursu institúise con un total de 3 premios (primeru, segundu y terceru) dotaos con un llote de llibros n’asturianu. El testu tien que tar venceyáu a la muyer y tar en rellación cola so importancia pal caltenimiento de la llingua asturiana, dende cualesquier perspectiva, seya reivindicativa o d’apegu.

    Los trabayos han ser inéditos y orixinales, escritos en llingua asturiana o en gallego-asturianu, en prosa o versu y tienen que tener como máximu 280 caracteres y han d’enviase a info@iniciativapolasturianu.org en formatu PDF. La participación del concursu entama’l 8 de marzu a les 00:00 hores y fina’l 21 de marzu a les 12:00 hores. Les obres premiaies van dase a conocer el día 31 de marzu a les 12 hores, al traviés de la páxina web d’Iniciativa pol Asturianu (www.iniciativapolasturianu.org). El xuráu tará compuestu por diferentes personalidaes, asina como por dellos miembros d’Iniciativa pol Asturianu. La entrega de premios va facese’l nun día por determina nos espacios del Conseyu de la Mocedá de Xixón (Avenida de Manuel Llaneza, 68, baxo, Xixón 33208)

    Iniciativa pol Asturianu anima a la sociedá asturiana a participar nesti concursu como homenaxe a toles muyeres que nos arrodien y a les que gracies a elles deprendimos asturianu.

  • Educación va ampliar les hores de llingua asturiana tres reunise con Iniciativa pol Asturianu y l’ALLA

    Educación va ampliar les hores de llingua asturiana tres reunise con Iniciativa pol Asturianu y l’ALLA

    Educación va ampliar les hores de llingua asturiana nel bachilleratu tres caltener una xunta con Inaciu Galán y Xuan Pandiella, representantes d’Iniciativa pol asturianu y col presidente de l’Academia de la Llingua Asturiana, Xosé Antón González Riaño. La conseyera calificó de «positivu» el balance de dambos alcuentros, nos que «espliquemos los nuesos proyectos y tamién los marxes llegales nos que movemos”. Tamién recordó que nestos momentos tán faciéndose los currículos de toles etapes a la LOMLOE y qu’una de les premises que se tresmitió a los grupos de trabayu ye «tratar l’asturianu, la cultura, la llingua y la tradición de forma tresversal». La conseyera añedió que quier afondase nel acercamientu n’edaes tempranes a les llingües, y concretamente a la cultura asturiana», lo qu’implica’l refuerzu na etapa d’Infantil. Per otra parte, adelantró que se va amontar en Bachilleratu la carga horaria de l’asignatura d’asturianu, qu’anguaño ye d’una hora.

    En materia de personal, encetó la creación de la especialidá docente d’asturianu. “Ye un tema que nos esmolez enforma porque afecta a les condiciones de más de 250 interinos ya interines, compañeros que nun pueden aportar a una oposición, nun pueden tener un puestu fixu nin pueden participar nel concursu de tresllaos. Pa nós ye importantes da-yos estabilidá, pero siempres topetamos cola negativa del ministeriu”, esplicó. Sicasí, tamién-yos adelantró qu’espera tener llueu una xunta cola ministra, Pilar Alegría, pa “poder concretar a nivel políticu por qué ye tan importante para nós que se reconoza la especialidá docente”.

    Al respective de les oposiciones, la conseyera indicó que se ta trabayando por que en el próximu procesu selectivu de Secundaria, les certificaciones de B2 y C1 d’asturianu puedan homologase como creitos de formación del profesoráu. Coles mesmes, tamién adelantró güei que se ta peracabando l’actualización de la toponimia del sistema de gestión Sauce, de la Conseyería d’Educación, y qu’espera que tea llistu pal próximu mes de setiembre.

  • Iniciativa pol Asturianu considera inalmisible que nun s’incluya l’asturianu nel currículo d’infantil

    Iniciativa pol Asturianu considera inalmisible que nun s’incluya l’asturianu nel currículo d’infantil

    Iniciativa pol Asturianu considera inalmisible la decisión anunciada esti martes pola conseyera d’Educación, Lydia Espina, de prescindir de la llingua asturiana nel currículu d’Educación Infantil. La organización recuerda qu’esti foi un compromisu del Gobiernu anterior y considera incomprensible que se dean pasos atrás na presencia del idioma nel sistema educativu. L’asociación ve mui grave qu’una decisión asina la tome un Gobiernu que se diz favoratible a la oficialidá del asturianu y el gallego-asturianu. «¿Cómo puede ser que se tean dando pasos atrás col asturianu? Paez que vamos quedar sin oficialidá y tamién ensin l’asignatura d’asturianu na etapa infantil».

    La organización recuerda qu’esta decisión contravién la Llei d’Usu, que nel so artículu 10 recueye que: «nel exerciciu de les sos competencies, el Principáu d’Asturies ha garantizar l’enseñu del bable/asturianu en tolos niveles y graos, respetando sicasí la voluntariedá del so aprendimientu. De cualesquier manera, el bable/asturianu ha ser enseñáu dientro del horariu escolar y va ser consideráu como materia integrante del currículu». D’igual manera, l’artículu 2 d’esta llei fai estensible esta protección al gallegu-asturianu «nes zones onde tien calter de modalidá llingüística propia». La presencia de dambes llingües nesta etapa educativa ye fundamental pa garantizar la tresmisión xeneracional, al tiempu que permite dar normalidá a l’asignatura.

    Nesti sentíu, Iniciativa pol Asturianu va solicitar un conceyu de manera urxente cola conseyera d’Educación pa tresmití-y la so esmolición por esta decisión que, de confirmase, va suponer un grave retrocesu na presencia del idioma nes escueles asturianes y un ataque más a los derechos de les persones que voluntariamente escueyen matricular a los sos fíos y fíes nes asignatures de Llingua Asturiana y Gallego-asturianu.

  • Iniciativa pol Asturianu pide a Izquierda Xunida un esfuerciu pa nun dexar pasar esta oportunidá hestórica pa la oficialidá

    Iniciativa pol Asturianu pide a Izquierda Xunida un esfuerciu pa nun dexar pasar esta oportunidá hestórica pa la oficialidá

    El presidente d’Iniciativa pol Asturianu, Iván Llera, y el vocal de rellaciones institucionales de la organización, Inaciu Galán, aconceyaron esti miércoles con representantes del grupu parllamentariu d’Izquierda Xunida. Dientro del alcuentru, los representantes de la organización de reivindicación llingüística treslladaron a la formación qu’han de ser conscientes de la oportunidá hestórica pa la oficialidá que tenemos ente les manes. Alcontrámonos con una mayoría aritmética pa sacar alantre la reforma estatutaria cola oficialidá y nun podemos desaprovechala, porque nun sabemos si volverá a repitise.

    Anque podemos comprender qu’IX nun tea cómoda teniendo de participar de la toma de decisiones polítiques alloñaes de los sos principios ideolóxicos, pidímos-yos un esfuerciu de xenerosidá y nun dexar pasar esta oportunidá hestórica. La sociedá asturiana nun diba entendelo.  

    IX siempres amosó capacidá de negociar y llegar a alcuerdos nel pasáu, como cuando’l so antecesor políticu aceptó la monarquía pa consiguir una constitución democráctica y más recién, cola so entrada nel Gobiernu d’España, a pesar de les diferencies col partíu mayoritariu, buscando con pragmatismu avances nos sos principios programáticos. Pidimos agora lo mesmo, aplicar esa mesma voluntá d’alcuerdu pa consiguir la oficialidá, un puntu qu’Izquierda Xunida tien ente les sos reivindicaciones hestóriques, y qu’Iniciativa pol Asturianu agradez que llevara siempres por bandera. 

    Les condiciones de la negociación nun son les idónees, pues ta falándose de coses que queden fuera del marcu del Estatutu, pero esta ye la realidá cola que tenemos que trabayar. Ye’l momentu del alcuentru, el diálogu y el pactu, ya Izquierda Xunida nun pue quedar fuera d’él.

    Va una selmana reclamábemos xenerosidá a Foro y güei facemos esti llamáu a Izquierda Xunida pa llograr un alcuerdu sobre la oficialidá. Sabemos que ye un alderique complicáu y nel que toles fuercies tienen que poner del so llau. Esto inclúi tamién a la FSA, el partíu que tien la mayoría parllamentaria, al que-y pidimos un mayor esfuerciu pa xenerar consensu y liderar la reforma estatutaria. El Gobiernu y el presidente Barbón tienen que ser clave en llograr esi alcuerdu de cuatro partíos y 27 diputaos pa cumplir col mandatu constitucional qu’establez la oficialidá pa les llingües propies nel so artículu 3.2. Los demás partíos tán faciendo esfuercios y renunciando a parte de les sos reivindicaciones, y la FSA ha tar al altor tamién y buscar toles víes posibles, incluyendo la posibilidá d’un alcuerdu asimétricu pa la fiscalidá y l’Estatutu.

     

  • “El Congresu de los Diputaos sofitó’l puntu de la PNL que pidía la oficialidá de la llingua asturiana” conviértese na meyor noticia pal asturianu en 2021

    “El Congresu de los Diputaos sofitó’l puntu de la PNL que pidía la oficialidá de la llingua asturiana” conviértese na meyor noticia pal asturianu en 2021

    Iniciativa pol Asturianu fixo públicu’l resultáu de la votación popular pa buscar la meyor noticia pal asturianu en 2021. Esta ye la octava edición que s’entama esti procesu pa elixir la meyor noticia del añu mediante una consulta popular y que nesta ocasión siguió medrando en participación.

    D’esta manera, los y les internautes escoyeron la noticia de que “El Congresu de los
    Diputaos sofitó’l puntu de la PNL que pidía la oficialidá de la llingua asturiana”. Con una diferencia mui curtia, quedó posicionada, en segundu llugar, la noticia del “Ésitu de la manifestación pola oficialidá n’Uviéu” y en tercer llugar, los y les votantes elixeron la noticia de “Pumares dio’l sí a la reforma y a la oficialidá con condiciones”. La torna de la Biblia al asturianu y el manifiestu universitariu internacional pola oficialidá d’Iniciativa pol Asturianu fueron tamién de les noticies con más sofitos, colcuartu y quintu puestu respeutivamente.
    La organización quixo destacar que l’añu 2021 foi ún de los años que más noticies positives tuvo pal asturianu tando presentes 39 noticies posibles nel formulariu de votación. “Tamos nun momentu de bones noticies pal idioma y creemos qu’hai aprovechar esta circunstancia y dar nesti 2022 la meyor noticia posible pal idioma que ye la oficialidá” reclamóse dende Iniciativa pol Asturianu.

    N’otros años foron elexíes l’usu del asturianu per parte del presidente Barbón, la conferencia del rector García Granda na Universidá d’Uviéu, la declaración de la oficialidá nel conceyu de Bimenes o la inclusión per primer vegada una partida pa l’Academia de la Llingua Asturiana nos Presupuestos Xenerales del Estáu. Iniciativa pol Asturianu agradez la colaboración y participación a toles persones que participaron na escoyeta.

  • Iniciativa pol Asturianu abre la votación popular pa escoyer la ‘Meyor noticia pal asturianu en 2021

    Iniciativa pol Asturianu abre la votación popular pa escoyer la ‘Meyor noticia pal asturianu en 2021

    Iván Llera, presidente d’Iniciativa pol Asturianu, entamó güei la campaña ‘Meyor noticia pal asturianu en 2021’ cola que la organización pretende escoyer, pente medies d’una votación popular n’internet, la meyor noticia pal idioma nel pasáu añu 2021.Llera co mentó que “faciendo un repás a les bones noticies pal idioma nel añu 2021, dímonos cuenta de que l’añu pasáu foi ún de los que más noticies positives tuvo pal asturianu, lo cual tamién ye una bona anuncia”.
    El presidente d’Iniciativa pol Asturianu señaló que “con esta campaña pretendemos facer llegar a los asturianos y a les asturianes delles bones noticies pal nuesu idioma. Queremos que la sociedá seya partícipe tamién d’estes bones noticies pa la llingua asturiana”. Iván Llera terminó diciendo que “los y les participantes pueden escoyer ente un total de 15
    bones noticies pal asturianu de diferente tipu d’un total de 39. La votación entama esti llunes 3 de xineru y va acabar el vienres 14 d’esti mes. Amás, los y les participantes van participar nun sortéu de llibros n’asturianu”. Puedes participar calcando equí.

  • Iniciativa pol asturianu reclama a la FSA-PSOE qu’apruebe na Xunta de Portavoces la propuesta p’habilitar xineru pa la oficialidá nel parllamentu asturianu

    Iniciativa pol asturianu reclama a la FSA-PSOE qu’apruebe na Xunta de Portavoces la propuesta p’habilitar xineru pa la oficialidá nel parllamentu asturianu

    Iniciativa pol Asturianu reclama a la FSA-PSOE qu’apruebe na Xunta de Portavoces de mañana na Xunta Xeneral la propuesta p’habilitar xineru nel parllamentu asturianu. Tal como reclamó la organización la selmana pasada facer hábil esti mes na Xunta Xeneral ye la manera de facer posible daveres la reforma estatutaria y la oficialidá.

    “Iniciamos l’añu col compromisu de Barbón d’entamar en 2021 el procesu pa oficializar l’idioma y tamos a 28 d’avientu y tovía nun se sabe nada. Tamos a tres díes de terminar l’añu y nun sabemos nada d’esi compromisu qu’Adrián Barbón adquirió col presidente de l’Academia de la Llingua Asturiana nun conceyu a entamos de xineru de 2021” apuntaron dende la organización.

    Iniciativa pol Asturianu reclamó valentía política y altor de mires a la FSA-PSOE. “Barbón, el Gobiernu d’Asturies y la FSA-PSOE tienen una oportunidá d’oru pa demostrar el so compromisu cola llingua asturiana, cola llibertá y col so propiu programa electoral. Nun podemos siguir dexando pasar el tiempu nin dar vueltes”.

    “Ye un momentu clave pa la oficialidá y apostamos pola apertura del mes de xineru na Xunta Xeneral pa trabayar na reforma estatutaria. Ye’l momentu de dar la cara. A esta decisión d’habilitar xineru tendría que sumase un mayor esfuerciu nel lideralgu nel presidente nesti procesu sentando a los partíos a falar na búsqueda de consensos” rematóse dende la organización.