Xixón al día

Etiqueta: La Camocha

  • EMULSA entama un plan especial de llimpieza nos barrios

    EMULSA entama un plan especial de llimpieza nos barrios

    Emulsa quier poner Xixón más guapu. La empresa municipal va desenvolver esti añu un plan especial de de llimpieza de fondura en cais, places y parques. Les actuaciones van llegar a 49 zones de tolos distritos urbanos de la ciudá. Los trabayos entamaron yá esta selmana nel barriu d’El Llano. Una ventena d’operarios van trabayar de llunes a sábadu, per selmanes, en cada una de les distintes zones. Van emplegar una docena de máquines. Con elles repasaránse en fondura los llabores habituales de llimpieza de ceres, baldeos y llaváu de contenedores. Amás, llevarase a cabu la descartelización y desratización, siega, pintura de moblame, revisión de xuegos infantiles y esbroce.

    Les actuaciones van llegar a puntos de tolos barrios, incluyendo Cimavilla, L’Arena, Viesques, Centru, Laviada, Pumarín, El Polígono, Roces, Nuevo Roces, Contrueces, El Coto, La Camocha, El Lauredal, La Calzada, El Natahoyo, Moreda, Tremañes, Xove, Portuarios, Pescadores, Montiana y Somió. L’oxetivu principal del plan ye realizar una repasada en fondura a les necesidaes de llimpieza de los barrios que sirva como ferramienta pa consiguir el compromisu cívicu de los ciudadanos col medioambiente urbanu de Xixón. La empresa municipal quier que los vecinos s’impliquen col caltenimientu de les zones verdes, la medría del reciclaje y l’usu de los Puntos Llimpios.

  • Entamen les obres de rehabilitación de los patios de La Camocha

    Entamen les obres de rehabilitación de los patios de La Camocha

    El Conceyu de Xixón empecipia’l llunes les obres de rehabilitación de los patios de La Camocha, na mazana allugada ente les cais Camineru, Picadores, Barreristas y Carboneres. Asina lo señalaron esta mañana mientres la so visita al pobláu’l conceyal d’Obres Públiques, Olmo Ron, el director xeneral d’Obres Públiques, Pedro Guerrero, y el presidente de l’asociación vecinal, Herminio Torre.

    El conceyal manifestó’l so prestu porque esta obra, “históricamente” demandada polos vecinos del barriu, ye una de les primeres actuaciones que s’acometeríen nesti entamu de mandatu. Trátase de la primer fase d’un proyectu p’ameyorar los patios de les viviendes allugaes na zona d’actuación.

    L’actuación contempla 29 places d’estacionamientu, una d’elles pa persones de movilidá amenorgada. N’este mesmu patiu incluyiráse un itinerariu piatonal accesible cola construcción d’una cera de dos metros. En vinientes actuaciones reformaránse’l restu de los patios. Nellos van creáse a zones d’estancia, esaniciando les supresiones esistentes, tanto nes ceres perimetrales como la conexón ente los distintos patios.

    Pa la consecución d’esta conexón va xenerase una plataforma única pa usu esclusivu piatonal, na cual van asitiase distintos pavimentos, según una rampla d’accesu, cola que consiguir un itinerariu accesible ente tolos patios. Tamién va haber espacios de zones verdes, col plantíu d’arboláu y l’allugamientu de moblame urbanu.

  • Paralizáu’l desagospiu de Mari en La Camocha

    Paralizáu’l desagospiu de Mari en La Camocha

    Maria del Carmen quédase en La Camocha. Polo menos de momentu. Un centenar de persones torgó esta mañana el desagospiu d’una vecina del barriu de 72 años . La comisión xudicial encargada d’executar la decisión de l’alministración concursal de la extinta Mina La Camocha nun pudo allegase hasta la vivienda asitiada nel patiu Comporteros, xunto a la cai M Maquinistes. Esti desagospiu ye’l primeru de los 37 que tan previstos nel barriu.