Esti foi un añu perespecial pa Dixebra al festexar 35 años ininterrumpíos de rock n’asturianu y publicar el so décimoséptimu álbum, el llibru-CD Ente la niebla. Pa despidir 2022 la banda anuncia tres novedaes: la una esposición en Xixón que percuerre la so trayectoria; la cellebración d’un conciertu na sala Acapulco de Xixón pal 30 d’avientu; y la reedición d’Ente la niebla, trabayu que s’escosó’l pasáu mes de xunetu y del qu’a partir de la selmana que vien va haber unidaes disponibles nes tiendes.
Miguel Barrero, Director de la Fundación Municipal d’Educación y Cultura; Antón García, Director de Política Llingüística, y Xune Elipe inauguraron en rueda de prensa la esposición que conmemora’l XXXV Aniversariu de Dixebra. La Sala 3 del Centru de Cultura Antiguu Institutu de Xixón va acoyer del 14 d’avientu al 9 de xineru esta esposición na que se muestren seis paneles temáticos: Contestu, Zona Conflictiva, Internacionalismu, Rock n’Ast, Reivindicación Llingüística y Lliteratura; nellos trátase de cómo yera la situación qu’arrodiaba a aquellos mozos qu’echaron a andar el grupu en 1987 y cuála foi la so historia. Pente los materiales puede vese una esbilla de semeyes coles distintes formaciones y de los momentos más importantes de la so trayectoria, asina como carteles y distintos oxetos rellacionaos cola banda. Tamién delles curiosidaes y otros elementos que ye la primer vez que s’exhiben (portaes inédites, diseños descartaos, etc.). La esposición cuenta con una parte audiovisual na que se proyecta permanentemente un vídeu con dellos conciertos históricos de varies époques grabaos en distintos llugares y festivales.
Otra manera, el programa de mano que complementa esta muestra ta plantegáu como una pieza de coleccionista, trátase d’un cartafueyu de dieciséis páxines con abondantes elementos gráficos y testos, ente otros, del escritor y biógrafu de la banda Francisco Álvarez y del so cantante y fundador Xune Elipe.
Amás de la esposición, la banda decana del rock astur va tocar el vienres 30 d’avientu a les 21h na sala Acapulco de Xixón nun conciertu que presenten asina: «Como ye vezu en Dixebra dende hai bien de tiempu, vamos acabar l’añu con un conciertu especial. Facémoslu nestes feches, ente otres coses, pa que toes eses lleendes urbanes que vuelven al país estos díes puedan aconceyar con nós y recargar piles d’asturianidá coles que regresar al ‘exiliu’. Pero tamién por volver a alcontranos cola xente que resistis equí y que queráis despidir l’añu en comuña».
Per último, la segunda edición del llibru-CD Ente la niebla va a tar disponible en musicasturiana.com y en tiendes físiques a partir del llunes que vien. Ye la obra más ambiciosa y personal de Dixebra, un trabayu conceptual alredor de la historia, la llucha y la significación del movimientu obreru y les clases populares asturianes. Nel llibru collaboren periodistes, escritores, profesores, historiadores, ilustradores, dibuxantes… que, coles sos creaciones, reflexonen sobre’l pasáu, el presente y el futuru de la clas obrera asturiana. Nel terrén musical, el discu ta formáu por venti cantares nos que déxense sentir composiciones d’aire distintu ente sí: rock, reggae, ska, folk, funk, metal… nuna bayura de soníos que sigue la filosofía musical dixebriega.
