Xixón al día

Etiqueta: Nuevo Roces

  • Sal a llicitación el proyectu del consultoriu periféricu de Nuevo Roces

    Sal a llicitación el proyectu del consultoriu periféricu de Nuevo Roces

    La Conseyería de Salú sacó a llicitación la redacción del proyectu del consultoriu periféricu de Nuevo Roces. La información espublizóse güei nel Perfil del Contratante de la web del Gobiernu asturianu. Les empreses disponen de 20 díes naturales para presentar les ufiertes. N’axudicándose’l concursu, la compañía escoyida va tener un plazu de trés meses pa la redacción del proyectu básicu y d’execución, l’estudiu de seguridá y salú, la dirección facultativa y la coordinación de la seguridá y salú de les obres.

    La inversión prevista pa esti concursu algama los 119.790 euros, de los que 65.884,50 destínense a la redacción del proyectu. La construcción del nuevu consultoriu, financiáu pola Unión Europea al traviés del Fondu Européu de Desenvolvimientu Rexonal (Feder), va facilitar l’asistencia sanitaria nunes condiciones de mayor confort y accesibilidá pa los profesionales y usuarios. Anguaño, los residentes d’esti barriu xixonés son atendíos nel centru de salú de Contrueces.

  • EMULSA entama un plan especial de llimpieza nos barrios

    EMULSA entama un plan especial de llimpieza nos barrios

    Emulsa quier poner Xixón más guapu. La empresa municipal va desenvolver esti añu un plan especial de de llimpieza de fondura en cais, places y parques. Les actuaciones van llegar a 49 zones de tolos distritos urbanos de la ciudá. Los trabayos entamaron yá esta selmana nel barriu d’El Llano. Una ventena d’operarios van trabayar de llunes a sábadu, per selmanes, en cada una de les distintes zones. Van emplegar una docena de máquines. Con elles repasaránse en fondura los llabores habituales de llimpieza de ceres, baldeos y llaváu de contenedores. Amás, llevarase a cabu la descartelización y desratización, siega, pintura de moblame, revisión de xuegos infantiles y esbroce.

    Les actuaciones van llegar a puntos de tolos barrios, incluyendo Cimavilla, L’Arena, Viesques, Centru, Laviada, Pumarín, El Polígono, Roces, Nuevo Roces, Contrueces, El Coto, La Camocha, El Lauredal, La Calzada, El Natahoyo, Moreda, Tremañes, Xove, Portuarios, Pescadores, Montiana y Somió. L’oxetivu principal del plan ye realizar una repasada en fondura a les necesidaes de llimpieza de los barrios que sirva como ferramienta pa consiguir el compromisu cívicu de los ciudadanos col medioambiente urbanu de Xixón. La empresa municipal quier que los vecinos s’impliquen col caltenimientu de les zones verdes, la medría del reciclaje y l’usu de los Puntos Llimpios.

  • Les obres de la pasarela de Nuevo Roces entamen el llunes

    Les obres de la pasarela de Nuevo Roces entamen el llunes

    Los trabayos pa instalar la pasarela de Nuevo Roces van empezar el llunes. La obra, axudicada a la empresa Media Madera, cuenta con un presupuestu d’execución de 540.000 euros y un plazu d’execución de cuatro meses. La pasarela tien 290 metros de llargor y un anchor útil de 2’4 metros. Va conectar el conocíu como camín de Arbesú, nel llau norte de l’autovía A-8, cola sienda qu’escurre al norte del barriu.

    Les secciones o módulos que vuelen sobre l’autovía tienen un mayor llargor, sofitándose sobre un pilar central allugáu na mediana de l’A-8. L’allugamientu, afitáu polos puntos de conexón, implicó la necesidá de solicitar l’autorización de la Demarcación de Carreteres del Estáu, amás del cambéu del allugamientu del panel informativu de l’autovía. La pasarela, concebida para usu piatonal y cicloturista, ta construyida con madera de pinu montés y va sofitase en pilastres de formigón

  • Alimerka inaugura’l so supermercáu de Nuevo Roces

    Alimerka inaugura’l so supermercáu de Nuevo Roces

    Los vecinos de Nuevo Roces tan de norabona. Alimerka inauguró esti xueves un nuevu supermercáu, el primeru del barriu. Esta nueva tienda, qu’ocupa casi 5.000 metros cuadraos, cuenta con 90 places d’aparcamientu y supon la creación de 42 puestos de trabayu. Con esta apertura, Alimerka espera ameyorar los servicios de la zona, una y bones los vecinos víense obligaos a movese en coche para poder realizar les sos compres.

    Cola apertura d’esta tienda Alimerka estrena’l serviciu Click & Collect. Productos esfrecíos, conxelaos y secos que los veceros van poder recoyer nunes novedoses taquilles con sistema de conxelación y refrigeración. Con esta innovadora infraestructura, la compañía va poder garantizar la frescura de tolos productos adquiríos, una y bones la cadena de fríu siempres ta caltenida. Los veceros van poder usar esti serviciu de forma totalmente gratuita, y recoyer les sos compres nun máximu de cuatro hores dende la realización de los sos pidíos online. Con esti nuevu serviciu, que nel futuru podría estendese a otros establecimientos, la compañía sigue trabayando nel so tresformamientu dixital, que se suma a la recién apaición de la so nueva app.