Etiqueta: sostenibilidá

Xixón presenta en FITUR «Xixón Data Lab» una ferramienta pa conocer la ocupación en tiempu real
Conocer con detalle la ocupación hotelera de la ciudá, ver la evolución de reserves pa un momentu concretu, saber el preciu al que s’ufren los cuartos… Toos estos datos van afayase en Gijón Data Lab, una ferramienta creada por Xixón Turismu pal sector d’agospios turísticos de la ciudá. Esta ferramienta estadística, frutu de la colaboración del sector públicu y priváu, va valir p’ameyorar la competitividá de los agospios y la de la ciudá de Xixón.

La presentación de Gijón Data Lab fíxose güei nel marcu de FITUR y nel actu afayáronse la alcaldesa de la ciudá, Ana González, Berta Piñán, conseyera de Cultura, Política Llingüística y Turismu del Principáu d’Asturies, y el direutor de Xixón Turismu, Daniel Martínez Junquera.

La alcaldesa destacó que esta ferramienta sal de la estay pública cola colaboración necesaria del sector priváu, una collaboración imprescindible pa faer realidá esta ferramienta. Destacó y agradeció tamién el trabayu del equipu de Xixón Turismu.

Gijón Data Lab ye un espaciu pa que los agospios intercambien los sos datos y conocer asina la ocupación real. Gracies a esta ferramienta y l’analís de la información dada poles empreses, va prevese la ocupación futura. Un conocimientu de gran valir pa que los agospios puean tomar decisiones como asoleyar campañes de promoción.

En Gijón Data Lab los agospios van poder:
- Analizar el so rendimientu y comparalu con los sos cuatro competidores direutos, incluyendo:
o    Datos d’hotel vs competidores a pasáu (ADR, RevPar, ocupación).

o    Datos d’hotel vs competidores a futuru (Ocupación y evolución de les reserves).

o    Comparativa vs competidores, plaza y agospios de la mesma categoría.
- Monitorizar en tiempu real la ocupación y los precios medios de la plaza, tanto nel momentu actual como con un horizonte temporal de tres meses.
- Consultar los eventos de la ciudá y venceyalos a la evolución de les sos reserves y la so ocupación.
Pa la fase de desendolcu, Xixón Turismu cuntó cola colaboración de cinco hoteles de la ciudá. Agora, tolos agospios de la ciudá van poder xunise al proyeutu y beneficiase, de baldre, de la ferramienta.
20/01/2022
Xixón, premiáu en FITUR pol so llabor nel turismu accesible

La alcaldesa de Gijón/Xixón, Ana González, recibió esta tarde en FITUR un reconocimiento pol llabor realizáu nos años caberos nel desendolcu del turismu accesible. El presidente de Predif, Francisco Sardón, entregó el distintivu a la rexidora con motivu del 25 aniversariu de la so organización y agradeció-y tol trabayu na defensa del drechu al espardimientu de les persones con capacidá.

Nel actu tamién tuvieron Berta Piñán, conseyera de Cultura, Política Llingüística y Turismu del Principáu d’Asturias, y Daniel Martínez Junquera, direutor de Xixón Turismu.

“Éste es uno de los premios más importantes que ha recibido la ciudad de Gijón, porque no se puede decir que queremos una ciudad para las personas, una ciudad amigables y una ciudad para estar, y sin tener una ciudad al alcance de las personas”, reconoció l’alcaldesa.

Xixón Turismu lleva trabayando más de 20 años n’accesibilidad. En 2014 punxo en marcha’l Programa d’Accesibilidá Turística, que buscaba tener información actualizada sobro l’accesibilidá de los recursos y establecimientos turísticos de Xixón; afitar a Xixón como un destín turísticu accesible pa toles persones; y ufrir a los turistes con discapacidá y necesidaes especiales y a les empreses turístiques información detallada sobro’l gráu d’accesibilidá de los establecimientos turísticos de Xixón y ferramientes teunolóxiques que faciliten l’accesibilidá.

Tola información sobro’l programa, les empreses y la ufierta accesible de Xixón ta en: www.gijon.es/es/turismo/destino-accesible, www.gijonturismoprofesional.es y www.tur4all.com/destinations/gijon-xixon.

Collaboración con Predif

Xixón Turismu realizó, tamién en 2014 y en collaboración con Predif, el primer diagnósticu d’accesibilidá d’establecimientos y servicios turísticos de Xixón. Esti diagnósticu repítese cadañu y concédese’l distintivu TUR4all a les empresas qu’amuesen un gráu d’accesibilidá aceptable. Ente les actividaes distinguíes atópense agospios, museos y recursos turísticos, restoranes, tresportes, Teatru Xovellanos, Oficina de Turismu, Playa de Poniente, Palaciu de Congresos.

Arriendes d’ello, en 2016 desendolcáronse 4 rutes d’interés turísticu accesibles y diseñóse un planu de turismu accesible pa informar sobro esos itinerarios peatonales accesibles. Un añu dempués, diseñáronse 4 esperiencies turístiques accesibles pa esfrutar en Xixón: Gijón sabe a mar; Gijón cultura y naturaleza; Gijón Rural; Gijón Urbano. Son propuestes de turismu accesible que promueven recursos adaptaos: agospios, restauración, paseos y rutes, museos, playa, actividaes d’espardimientu…

20/01/2022
El Principáu promueve un conveniu pa fomentar y garantizar el turismu accesible ya inclusivu n’Asturies

El Gobiernu d’Asturies y la Confederación de Persones con Discapacidá Física y Orgánica del Principáu (Cocemfe) roblaron güei un conveniu de collaboración col que se van crear cinco rutes d’accesu universal y que supon un pasu importante nel allugamientu del Principáu como destín turísticu accesible ya inclusivu.

En virtú del alcuerdu promovido pola Conseyería de Cultura, Política Llingüística y Turismu, al traviés de la Sociedá Pública de Xestión y Promoción Turística y Cultural, el Principáu va destinar 30.000 euros a la promoción del turismu inclusivu, una collaboración que naz coles mires de caltenese al llargu plazu.

El conveniu contempla’l desenvolvimientu, per parte del equipu técnicu de Cocemfe, de les cinco rutes d’accesu universal pol territoriu para consolidar Asturies como un destín turísticu accesible. La viceconseyera de Turismu, Graciela Blanco, adelantró nel actu de la firma qu’estes rutes, “una vegada auditadas y comprobaos los servicios y el grau d’accesibilidá”, van dar opciones para visitar Avilés, Xixón y Uviéu y dos enclaves de la zona rural.

Blanco señaló que, amás del sofitu económicu, el Principáu comprométese a crear una guía turística dixital qu’esplique y detalle los itinerarios y a incorporar la información a les canales del portal d’internet TurismoAsturias y a les redes sociales.

La viceconseyera enmarcó esta actuación na estratexa de Turismu del Principáu 2020-2030, que’l so oxetivu ye liderar el desenvolvimientu del turismu sostenible ya inclusivu na comunidá autónoma. Coles mesmes, manifestó que “la voluntá ye arreyar a les empreses por mediu d’una ufierta d’establecimientos turísticos accesibles y una formación específica de los profesionales nesti ámbitu que redunde nuna ventaya competitiva p’Asturies y el so texíu empresarial”.

L’alcuerdu de collaboración ente Turismu y Cocemfe tien como finalidá la promoción d’un turismu inclusivu que garantice la igualdá d’oportunidaes pa desenvolver esta actividá d’una manera segura, cómoda y autónoma, y procurar el máximu beneficiu pa los turistes con diversidá funcional

11/01/2022
La Universidá d’Uviéu ameyora les sos posiciones nel ranking de sostenibilidá

La Universidá d’Uviéu ameyora posiciones nel ranking mundial de sostenibilidá 2021 (GreenMetric World University Ranking) qu’ellabora cada añu la Universitas Indonesia (UI). La institución académica asturiana figura nel puestu 136 ente les universidaes más respetuoses col mediu ambiente y avanza nueve puestos con al respective de la clasificación de 2020.

El GreenMetric World University Ranking mide’l compromisu de les instituciones participantes nel desenvolvimientu d’universidaes respetuoses col mediu ambiente. Con esti propósitu, esta clasificación evalúa seis indicadores pa cada organismu: redolada ya infraestructura, enerxía y cambéu climáticu, borrafes, agua, tresporte y educación.

Nel ranking conocíu agora, correspondiente al exerciciu de 2021, amontóse la presencia d’universidaes participantes. En concretu, fueron analizaes 956 universidaes de 80 países, 44 más que l’añu anterior. Coles mesmes, sumáronse al ranking cinco nuevos países: Ghana, Honduras, Hong Kong, Turkmenistán y Nixeria.

Sandra Velarde, Vicerrectora de Sostenibilidá, Movilidá y Mediu Ambiente, sorraya que rankings como’l GreenMetric World University ayuden a visibilizar los llogros y son amás un aliciente agregáu pa siguir ameyorando. La vicerrectora destaca que la Universidá d’Uviéu apaez perbién asitiada, entá ye más si se tien en cuenta que na última edición amontóse’l númberu de participantes y l’universidá asturiana siguió esguilando posiciones.

Ello ye que la Universidá d’Uviéu apaez perbién asitiada ente les universidaes españoles que participen nesti ranking. En concreto, la institución académica asturiana figura nel puestu octavu ente les casi trenta universidaes analizaes.

El top 10 de les universidaes españoles más sostenibles ta integráu por:

Universidá Complutense de Madrid.

Universitat Autónoma de Barcelona.

Universidá de Alcalá.

Universidá d’A Coruña.

Universidad Rey Juan Carlos I.

Universitat de Girona.

Universidad Miguel Hernández.

Universidá d’Uviéu.

Universidá Autónoma de Madrid.

Universitat Politécnica de Valencia.

Les universidaes europees apaecen muncho meyor asitiaes nesta clasificación que les d’otros continentes. Les diez instituciones que la liderar son, por esti orde, les siguientes:

Wageningen University & Research (Países Baxos).

Nottingham University (Reinu Uníu).

University of Groningen (Países Baxos).

Nottingham Ttrent University (Reinu Uníu).

Uuniversity of California, Davis (EEXX).

Umwelt-Campus Birkenfeld (Trier University of Applied Sciences) (Alemaña).

Lleiden University (Países Baxos).

University College Cork (Irlanda).

University of Connecticut (EEXX).

Universidade de Sao Paulo (Brasil).

03/01/2022
El Plan Forestal apuesta por un modelu qu’axunte la producción sostenible col desenvolvimientu económicu y medioambiental
El Plan Forestal del Principáu 2022-2036 apuesta por un modelu qu’harmonice la producción sostenible col desenvolvimientu económicu, humanu y medioambiental. El documentu alliniase colos oxetivos del Pactu Verde Européu y recueye midíes pa que los montes asturianos garren protagonismu como sumidorios de CO2 y elementos clave nel amenorgamientu de la buelga de carbonu.

El testu, que se presentó güei al Conseyu Forestal, va salir a información pública pa siguir col procedimientu preceptivu primero de la so aprobación definitiva.

Asturies ye una de les rexones europees más densamente forestada y con mayor diversidá medioambiental. Dos terceres partes de la superficie de la comunidá son forestales y d’elles pelo menos el 60 % ta forestao y el 40 % restante son pacionales o zones improductives. El Plan Forestal nuevu va impulsar la esplotación de la riqueza de los montes y la ordenación de los recursos pa favorecer nuevos aprovechamientos xeneradores de valor nel mediu rural.

La ordenación de los recursos establezse en función de cinco exes:
- El caltenimientu de la biodiversidá y los ecosistemes forestales.
- La llucha contra’l cambéu climáticu.
- L’apertura de la xestión de los montes a producciones económiques y sostenibles nueves.
- El fomentu de la cultura forestal y de la madera.
- La busca d’un modelu nuevu de gobernanza pa los montes asturianos que tenga en cuenta les sos particularidaes y s’adapten al sieglu XXI.
D’esta miente pretende xubise hasta 3 puntos el pesu del sector forestal nel Productu Interior Brutu (PIB) mientres los quince años próximos. Anguaño, les empreses d’esti ámbitu suponen el 5 % del PIB rexonal y una parte importante del empléu rural. Son, amás, una pilastra del desenvolvimientu económicu industrial del occidente asturianu.

Ente los retos recoyíos nel plan figura’l de favorecer que tolos procesos económicos afiten la so buelga de carbonu nos montes. Esto supón aprovechar el potencial de les mases arbórees nel nuevu sistema de compensaciones en base a l’absorción de CO2, de cuenta que nun va ser necesario mercar derechos fuera. Reducir la buelga de carbonu, cola neutralidá como meta, ye un claru oxetivu del Pactu Verde Européu. Los aprovechamientos nuevos de los montes basaos na economía circular van ser claves.

Tamién van siguir impulsándose les llinies d’ayudes pal plantíu y caltenimientu d’especies frondoses autóctones y coníferes. Nos postreros 15 años, les frondoses autóctones fueron les que más aumentaron la so estensión (20 %) y agora va incidise na recuperación, aprovechamientu y potenciación de la castañal y la carbayal, pero tamién na d’otres especies propies como l’abeduriu o la faya.

Tocantes a la planificación forestal, van caltenese les previsiones de superficies máximes del plan anterior, conforme a los resultaos de los inventarios nacionales. Tamién se van reforzar les actuaciones contra plagues y van dexase los cambeos d’especies nos ámbitos onde les enfermedaes nun dexen los anteriores cultivos o onde haya problemes d’adaptabilidá al mediu y al cambéu climáticu que supongan un amenorgamientu de les producciones.

En toos estos procesos va tener un papel importante la clarificación de la propiedá, que dexa orientar los usos del monte a la demanda de los habitantes de la zona y a les necesidaes actuales, cola mira d’evitar l’abandonu y optimizar recursos.

Les midíes y oxetivos del Plan Forestal nuevu son tresversales, polo que van incidir tamién na política preventiva de quemes forestales. Too ello va realizase al traviés de planes de xestión y prevención más dinámicos, que caltengan l’esfuerzu na prevención, sobre manera nes árees de mayor reincidencia, como la zona occidental.

Pa cumplir estos oxetivos prevése destinar 17 millones al añu de recursos propios a los montes asturianos.
23/12/2021
Cuatro proyectos rellacionaos con salú, enerxía y sostenibilidá ganen los premios Radar a la innovación entamadora
Cuatro propuestes vinculaes al área de la salú y la medicina personalizada, la xestión d’enerxía, la xeneración d’hidróxenu y la construcción sostenible resultaron ganadores de los premios Radar a la innovación entamadora. La Conseyería de Ciencia, Innovación y Universidá, al traviés del Centru Européu d’Empreses y Innovación del Principáu (CEEI) y del Institutu de Desenvolvimientu Económicu (Idepa), promueve estos gallardones, que recibieron 39 candidatures.

Estes distinciones, que reparten 80.000 euros, tienen como oxetivu reconocer les meyores iniciatives nes distintes fases de xeneración d’empreses nueves basaes na conocencia, nun apueste claru por reforzar la tresferencia de saberes.

Son trés les categoríes nes que s’estremen los premios:
- Premiu Radar spin-off: Empobináu a identificar tecnoloxíes resultantes de los proyectos d’investigación desenvueltos por grupos asturianos con potencial de constituyir la base de posibles empreses emerxentes (spin-off). Ente los diez proyectos que competíen polos 15.000 euros del premiu resultó gallardonáu:
- Ethicell, presentáu pola Fundación d’Investigación Oftalmolóxica, en collaboración col Centru Comunitariu de Texíos. L’ambición d’esta propuesta ye crear una empresa de referencia internacional centrada nel diagnósticu y tratamientu d’enfermedaes, capaz de desenvolver, fabricar y comercializar soluciones basaes en texíos humanos artificiales y ferramientes de medicina personalizada por aciu bioinxeniería especializada.
- Premiu Radar a la Meyor Empresa de Base Tecnolóxica: Dirixíu a sofitar los meyores proyectos de firmes de base tecnolóxica (EBT) con cuenta d’Asturies desenvuelva un texíu empresarial con mayor valor añedíu y empléu cualificáu. Los dos premios, dotaos con 25.000 euros caúnu, recayeron en dos empreses escoyíes ente 20 candidatures:
- H2Vector. Impulsa soluciones qu’optimicen la xestión eficiente de la enerxía proveniente de fontes anovables, coles mires de maximizar la sostenibilidá y aprovechamientu, apostando pol hidróxenu como vector enerxéticu en tola so cadena de valor: xeneración, almacenamientu y usu como combustible.
- Plexigrid. Incorpora soluciones empobinaes a operadores del sector eléctricu, pa que puean encarar la transición a un sistema enerxéticu sostenible. Los sos productos y plataformes dexen ameyorar el control y la planificación de redes de baxa tensión, xenerando ximielgos dixitales pa optimizar les decisiones en tiempu real.
- Premiu Radar Innovación Abierta: Sofita los meyores proyectos d’innovación abierta que firmes de base tecnolóxica (EBTs) realicen en collaboración con entidaes tractores y que dexen la validación y escaláu de les sos tecnoloxíes, mesmo que l’apertura de mercaos nuevos. N’analizando les 9 candidatures presentaes, otorgóse’l premiu, dotáu con 15.000 euros, a:
- Sunthalpy. La empresa, en collaboración con Alibérico, desenvolvió y patentó un sistema de fabricación industrial enerxéticamente sostenible. Cola ambición de convertir Asturies en focu de productos verdes vinculaos a la descarbonización d’edificios, esta collaboración empresarial va dexar llograr un mayor impactu nel mercáu.
El CEEI sofitó dende’l 2000 la puesta en marcha de 1.753 empreses altamente innovadores. Nos años últimos caltuvo un ritmu sosteníu anual de puesta en marcha de 15 firmes base tecnolóxica, hasta completar una comunidá dinámica de más de 200 compañíes.
17/12/2021
Xixón Turismu premia la sostenibilidá

Xixón Turismu premia de nueves a profesionales y empreses que trabayen pola sostenibilidá. Güei, Daniel Martínez Junquera, direutor de Xixón Turismu, entregó, acompangáu del decanu de la Facultá de Comerciu, Turismu y Ciencies Sociales Xovellanos, Levi Pérez Carcedo, el VII Premiu Xixón Turismu al Meyor Trabayu Fin de Máster sobro Sostenibilidá Turística a María de Paz Orviz pol so trabayu “Análisis de los destinos turísticos sostenibles y su comunicación comercial”. El premiu ta dotáu con 300€ y certificáu acreditativu.

El trabayu gallardonáu define los trazos de los destinos turísticos sostenibles y los elementos necesarios p’afitar un modelu turísticu sostenible. Arriendes d’ello, analiza y compara Xixón, Londres y Estocolmo no que cinca a la forma forma de comunicar y espardir el so apueste pola sostenibilidá, aportando delles meyores pa Xixón.

Tamién se fizo entrega de un certificado acreditativo a su tutora, Primitiva Pascual Fernández, profesora de la Universidá d’Uviéu y coordinadora del Máster Universitario en Dirección y Planificación del Turismo.

Certificaciones Biosphere Sustainable Lifestyle

Nel actu, tamién s’entregaron les certificaciones Biosphere Sustainable Lifestyle a les empreses y entidaes que puen amosar tolos sos esfuercios venceyaos cola consecución de los Oxetivos de Desarrollu Sostenible de Naciones Xuníes y les sos 169 metes.

Les empreses y servicios de Xixón puen acceder a la certificación Biosphere Sustainable Lifestyle de magar el mes d’abril y, nos primeros meses, algamaron la certificación estes empreses:

El Parador de Gijón Molino Viejo: trabaya activamente na realización de actuaciones col envís d’amenorgar la so buelga ambiental y aumentar la so contribución a los Oxetivos de Desarrollu Sostenible n’estayes como’l cambéu climático, la proteición de la biodiversidá o’l meyor aprovechamientu y control de los residuos. Tien una política de Responsabilidá Social Corporativa y ta adheríu al Pactu Mundial de les Naciones Xuníes al traviés de la Red de Paradores.

El Hotel San Miguel: trabaya baxo la filosofía de ser un “hotel responsable”, involucrando a los veceros y veceres nel cuidáu del entornu. Destaca’l so compromisu social, al traviés de la collaboración activa cola ONG “Asturies por África”, el so compromisu col reciclaxe y reutilización de residuos y el puxu por una movilidá más sostenible.

El Mercado Artesano y Ecológico: ye una iniciativa pionera n’España. La so filosofía, alliniada dafechu col cumplimientu de los Oxetivos de Desarrollu Sostenible, básase en fomentar y sofitar l’artesanía tradicional asturiana y los productos de proximidá. Arriendes d’ello, destaca por participar en proyeutos solidarios y por averar a la ciudadanía y turistes a la cultura y realidá asturiana d’una forma participativa y didáutica.

22/10/2021