El comité nacional del concursu internacional d’arquitectura y urbanismu Europan escoyó l’estuariu del ríu Nalón como unu de los ocho allugamientos de la so decimoséptima edición. L’oxetivu d’esti certame, nel que participen equipos de mozos arquitectos de toa Europa, ye ufiertar respuestes sostenibles a los retos económicos, sociales y ambientales a los que s’enfrenten les ciudaes europees.
El Principáu torna a esti concursu, nel que yá participó n’anteriores ocasiones, con un allugamientu singular. L’estuariu del Nalón, que cunta con un altu valor ambiental, paisaxísticu y cultural, encara agora los desafíos de la diversificación económica y la creación d’empléu alternativu al pie de les tradicionales actividaes portuaria y pesquera. La participación d’Asturies nel certame va convertir la zona nuna redolada d’innovación sobre’l que profesionales de l’arquitectura menores de 40 años van poder aplicar el so talentu y creatividá pa diseñar distintos espacios. El so trabayu va poder venceyase a actividaes como la pesca deportiva, la náutica recreativa o’l turismu ornitolóxicu y pesqueru, aprovechando les oportunidaes qu’ufierta la economía azul y atendiendo a la prestación de servicios ambientales y a la prevención de los riesgos acomuñaos al cambéu climáticu.
En concretu, los grupos de mozos arquitectos van trabayar na rexeneración y rehabilitación de dos espacios singulares: los puertos de San Esteban, en Muros de Nalón, y L’Arena, en Sotu’l Barcu. El puertu de San Esteban constitúi una infraestructura singular venceyada a la esplotación carbonífera y tien gran valor patrimonial. Pela so parte, el de L’Arena ye un bon exemplu de la tradición pesquera asturiana combinada col saléu recreativu. Dambos allúguense nuna zona de gran valor ambiental y paisaxísticu.
La Conseyería de Mediu Rural y Cohesión Territorial presentó al concursu esta candidatura, que s’enmarca ente les acciones empobinaes a impulsar l’Axenda Urbano y Rural d’Asturies (AURA), al considerar que l’estuariu del Nalón ufierta la oportunidá de realizar una actuación tresversal, na que van tener cabida materies nes que yá trabayen les direcciones xenerales de Pesca Marítima, Infraestructures Viarias y Portuaries, Mediu Natural y Planificación Rural, y Ordenación del Territoriu y Urbanismu.
La propuesta afaise perfectamente a los requisitos de la convocatoria, qu’apuesten pola rexeneración de redolaes vives con valores naturales y ambientales. La desaguada del Nalón forma parte de los espacios llibres de la área funcional metropolitana y les actuaciones qu’ellí se lleven a cabu van tener un efectu positivu pa tola contorna.
Amás del Principáu, a nivel nacional tamién van participar na decimoséptima edición de Europan los conceyos de Madrid y Barcelona, l’Institutu Catalán del Suelu y los gobiernos autonómicos de les Isles Baleares, la Comunidad Valenciana, el País Vascu y Cantabria.
El concursu va llanzar a nivel européu’l próximu 23 de marzu, el plazu p’apurrir les propuestes va rematar el 30 de xunetu y los equipos premiaos van anunciase’l 4 d’avientu.
