Xixón al día

Etiqueta: sucesos

  • Denunciaos cinco mozos nel parque de Severo Ochoa por incumplir l’Estáu d’Alarma

    Denunciaos cinco mozos nel parque de Severo Ochoa por incumplir l’Estáu d’Alarma

    La Policía Local denunció a úlitma hora del miércoles a cinco mozos d’ente 22 y 27 años por armar xaréu nel parque de Severo Ochoa. Los fechos asocedieron a les 23:50 hores del martes. Los xóvenes alcontrábense dando voces y fadiando a los vecinos, quien sollertaron a la Policía Local. Cuando los axentes llegaron al llugar, una de les moces, menor d’edá, salió corriendo. Darréu foi alcontrada, informóse a los sos padres y avisóse a la Fiscalía de Menores. Los mozos que permanecíen nel parque fueron denunciaos por nun respetar l’Estáu d’Alarma y por consumir alcohol na vía pública. Unu d’ellos tamién foi denunciáu por falta de respetu a l’autoridá.

    Una hora depués, dos d’estos mozos atopábense otra vuelta n’actitú similar, polo que fueron denunciaos por desobediencia. Dos hores dempués fueron alcontraes otres trés de les cinco persones que taben nel parque, engarrándose na confluencia de les cais Balear y Severo Ochoa. Fueron sancionaes por causar desordes na vía pública. La Policía Local sancionó ayeri a un total de 20 persones. Dos d’elles por tomar el sol na sablera; trés por ser d’otru conceyu y tar en Xixón practicando ciclismu; dos por faer deporte fora de la franxa horaria y una más por baxar col perru a la sablera.

  • Tres deteníos por violencia de xéneru na fin de selmana

    Tres deteníos por violencia de xéneru na fin de selmana

    La Policía Local de Xixón detuvo a ocho persones mientres la fin de selmana, trés d’elles por un presuntu delitu de violencia de xéneru. A les 21.40 hores del vienres, una patrulla detuvo a A.V.P., de 51 años d’edá, como presuntu autor d’un delitu contra la seguridá vial al salise de la vía na cai 2 de Mayu y producir daños a otros vehículos. El deteníu casi cuadriplicaba la tasa d’alcohol.

    El sábadu, produciéronse dos detenciones, una por delitu contra la seguridá vial. Los axentes sorprendieron a les 12 hores en Tremañes a un individuu conduciendo ensin punto nel carné. Y más tarde, a les 19.00 hores na cai La Mancha, detúvose a J.A.B. de 43 años d’edá y vecín de Xixón, por un presuntu delitu de violencia doméstica, en causando mancadures a la so madre.

    A última hora yá del sábadu, sobro les 23.50 hores na avenida de la Costa con Alfonso I, el conductor d’un ciclomotor topetaba con una ambulancia en serviciu d’urxencia, ensin qu’en principiu se produxeren daños personales. El conductor del ciclomotor sicasí, facilitó los sos datos a l’ambulancia pero s’entainó a abandonar el llugar. Darréu, la Policía Local pudo comprobar que perdiera’l so saldu de puntos nel carné de conducir.

    Foi denunciáu por un presuntu delitu contra la seguridá vial. Ya de madrugada, sobro les 03.00 hores na cai Álvarez Garaya, detúvose a C.J.R.G., de 46 años, como presuntu autor d’un delitu de quebrantamiento d’una orde d’alloñamientu del so expareya. Efectivos de la Policía Local sorprendiéronlu n’actitú sospechosa a pocos metros de la casa d’ella. A les 13.00 hores na cai Severu Ochoa, detener a J.L.M. de 79 años d’edá, por un presuntu delitu de violencia de xéneru contra la so muyer. Y mientres la madrugada del llunes, a les 01.30 hores na cai Allegría, detúvose a otru individuu pol mesmu delitu.

    Amás d’estes intervenciones, les distintes patrulles de la Policía Local inspeccionaron 60 establecimientos d’hostelería, terraces y merenderos. Catorce d’ellos fueron denunciaos por distintos motivos, como sirvir consumiciones a veceros fora de la terraza, devasar l’espaciu establecíu pa la terraza o nun caltener la distancia mínima de seguridá ente les meses. Tamién se intervino en dellos establecimientos por tener más meses de les autorizaes. Amás, en dos locales sorprendióse al personal espachando bebíes nel so interior.

  • Un incendiu arrasa una casa en Llaviana

    Un incendiu arrasa una casa en Llaviana

    Un incendiu xamuscó na tarde del domingu una vivienda unifamiliar en La Pola Llaviana. El fueu afaró por completu l’inmueble y parte del teyáu tamién se derrumbó. La casa, que diba unos díes sufriera otra quema, taba deshabitada. El Centru de Coordinación d’Emerxencies del 112 Asturies recibió l’avisu a les 20.31 hores d’ayeri domingu. Na llamada señalaben que taba quemando una casa, unifamiliar, d’una planta. Taba saliendo fumu pol teyáu.

    La Sala 112 del SEPA movilizó una dotación de bomberos del parque de Samartín del Rei Aurelio y otra dende’l parque de Casu. Amás comunícase lo asocedío al xefe de zona centro que tamién se mueve al incidente. En llegando al llugar los bomberos de San Martín señalen qu’hai muncha carga térmica y van precisar muncha agua pa llevar quiciabes la estinción polo que s’activa dos efectivos del parque de La Morgal con una autobomba nodriza.

    A les 23.49 hores la quema dar por controláu y parte de la dotación retiren al parque de Samartín del Rei Aurelio onde nesi momentu atopábense bomberos del parque de Proaza que fueren movilizaos por si asocediera otra emerxencia. A les 03.02 hores retiren el restu d’efectivos n’esfreciendo y desescombrar la zona. Ta previstu qu’a lo llargo de la mañana alleguen de nuevu a revisar el llugar.

  • Rescatáu ilesu un home que quedó enriscáu nunos cantiles en Gozón

    Rescatáu ilesu un home que quedó enriscáu nunos cantiles en Gozón

    Efectivos de bomberos rescataron ilesu a un home que quedó enriscáu nunos cantiles na redolada de la Punta del Aguión, en Moniello, Gozón. Pa llevar a cabu’l rescate tuviéronse que realizar delles operaciones cola grúa del helicópteru na que s’esplegaron unos 30 metros de cable en caúna d’elles. Primeramente, hasta’l llugar onde s’atopaba l’afectáu, baxara, rapelando, pa’aseguralu, un bomberu. Al pie d’él llograron baxar unos metros hasta una zona onde pudo aportar el grupu de rescate col helicópteru.

    El Centru de Coordinación d’Emerxencies del 112 Asturies recibió l’avisu a les 09.23 hores. Na llamada señalábase qu’una persona quedara enriscada nunos cantiles cuanto taba buscando al so perru. Atopábase bien pero nun podía salir. Darráu movilizóse una dotación del parque de bomberos de Pravia qu’en llegando al llugar solicitó la intervención del helicópteru medicalizáu. Amás, como marca’l protocolu, comunicóse lo asocedíu a la Guardia Civil y a la Policía Local. Rematada la intervención dambos equipos tornaron a les sos bases.

  • Deteníu en Xove un mozu de 19 años por saltase’l confinamientu ocho veces

    Deteníu en Xove un mozu de 19 años por saltase’l confinamientu ocho veces

    Axentes de la Policía Local detuvieron ayeri nel Camín Vieyu d’El Musel a un mozu de 19 años que taba pasiando en sin causa xustificada. Los fechos tuvieron llugar a les 16.40 hores del miércoles en Xove. Una patrulla de Policía Local sosprendió a D.J.J. de paséu. En comprobando los sos antecedentes, constataron que yá fuera denunciáu con anterioridá por infringir l’estáu d’alarma hasta n’ocho ocasiones. Ente esta situación, los axentes detuviéronlu por un presuntu delitu de desobediencia grave.

    Per otra parte, mientres el día d’ayeri sancionóse a 48 persones, 35 homes y 9 muyeres, d’edaes entendíes, na so mayoría, ente los 51 y los 60 años. Coles mesmes controlóse a 337 vehículos, de los que 19 yeren autobuses y 5 taxis. Dientro de los llabores de control que la Policía Local sigui realizando nos establecimientos, sobremanera, supermercaos y farmacies, sancionóse y clausuró dos llavaderos de mascotes que taben funcionando.

  • Piesllen un chigre de La Calzada que taba abiertu con dos clientes dientro

    Piesllen un chigre de La Calzada que taba abiertu con dos clientes dientro

    Fin de selmana intensu pa la Policía Local. Los axentes del cuerpu pesllaron esti sábadu dos establecimientos qu’incumplieron les midíes impuestes pol decretu d’estáu d’alarma. Unu d’ellos ye un chigre de la cai María Zambrano onde había dos veceros nel interior a les 19:30 hores de la tarde. L’otru ye un llocutoriu de la cai Soria. Na so parte trasera taben realizándose trabayos de peluquería. En dambos casos, les persones que taben nos locales tamién fueron sancionaes.

    Nun foi la única intervención. A les 17:35 hores de la tarde, los axentes detuvieron a un home como presuntu autor d’un delitu de mancadures nel ámbitu familiar. Asocedió nuna casa del Camín de les Quintes. T.R., de 47 años y vecín de Xixón, allegó a la casa de la so expareya pa visitar a dos fíos que tienen en común, negándose a abandonala. Empezó entós a faltar, acosar ya inclusive emburriar a la so expareya, fechos qu’asoceden davezu. La patrulla detúvolu en llegando a la zona.

    Darréu, a les 23.50 hores, tamién foi deteníu un xixonés, nesti casu, por desobediencia grave. La Policía Local allegó a la so vivienda allugada na cai Acebal y Rato pa collaborar colos servicios médicos qu’atendíen a una muyer que s’atopaba nel interior inconsciente y tirada nel suelu debíu, posiblemente, al estáu de embriaguez. El deteníu, J.C.T.M. de 56 años d’edá, empezó a faltar pela ventana a los axentes y nun cesó a la llegada de los mesmos al pisu, momentu nel qu’empezó a proferir amenaces. Amás, negar a identificase mientres s’encaraba y desafiaba los policías.

    El sábadu fueron denunciaes 110 persones, 79 homes y 31 muyeres. La mayor parte de les persones teníen edaes entendíes ente los 21 y los 60 años.

  • Detenida por tar «tomando copes» en casa d’unos amigos

    Detenida por tar «tomando copes» en casa d’unos amigos

    La Policía Local de Xixón detuvo esti medianueche a Z.S.B.G., de 35 años, por un presuntu delitu de desobediencia. La muyer atopábase «tomando unes copes» en casa d’unos amigos, na cai Pérez de Ayala, porque se «aburría na so casa”. Dellos vecinos sollertaron a la Policía Local de magar les 00.05 hores debíu al eleváu volume de la música. Una vegada nel llugar de los fechos, los axentes comprobaron qu’ellí s’atopaben el morador de la vivienda y dos persones más, un home y una muyer, que fueron identificaos por incumplir l’estáu d’alarma.

    Al ser informaos de que diben ser sancionaos y teníen de volver a les sos cases, la muyer entrugó-yos qué fadríen si nun los obedecía. Una vegada nel rellanu de la escalera, sentóse nel suelu, motivu pol que foi detenida por desobediencia. El tercer home que s’atopaba na casa tamién foi denunciáu por incumplir el decretu d’alarma. En total, mientres el día d’ayeri, fueron sancionaes 103 persones, 79 homes y 24 muyeres. La mayor parte de les persones sancionaes d’edaes entendíes ente los 21 y los 50 años.

  • Deteníos dos menores por salir a la cai pa vender ḥaxís

    Deteníos dos menores por salir a la cai pa vender ḥaxís

    La Policía Local detuvo esti miércoles a dos mozos por vender drogues na cai. La primera d’estes intervenciones tuvo llugar de magar les 11:30 hores de la mañana. Una patrulla detuvo na cai Pablo Iglesias a un menor de 17 años como presuntu autor d’un delitu contra la salú pública. Foi un vecín quien sollertara de la esistencia de dos persones na cai ensin motivu aparente. Los axentes atoparon a unu de los menores tiráu nel suelu. Al cachealu, atoparon un cachu de supuestu ḥaxís, polo que foi deteníu.

    Dende la ventana, un vecín avisó de qu’otru varón, del que daba una descripción detallada, saliera corriendo en dirección a Ramón y Cajal. La persona fuxida foi alcontrada por otra patrulla na cai Alarcón. Ésti portaba un cachu d’ḥaxís que manifestaba acabar de mercar al menor deteníu polo que foi deteníu pola tenencia de sustanza estupefaciente na vía pública ya incumplir el decretu qu’establez l’estáu d’alarma.

    Otru menor, nesti casu de 16 años, foi deteníu a primer hora de la tarde na cai Constantino. Axentes de la Policía Local sorprendiéronlu sobre les 16.10 hores vendiendo ḥaxís a otru mozu. Al deteníu, ocupáronse-y casi trescientos euros en billetes y dos cachos de supuestu ḥaxís, amás d’un teléfonu móvil. Ta siendo investigáu por un presuntu delitu contra la salú pública. El comprador foi denunciáu pola infracción derivada del estáu d’alarma.

    Nun foi la única intervención de la Policía Local nel xueves. A les 02.45 hores de la madrugada, una patrulla detuvo n’avenida de Portugal a una menor de 14 años y residente nel Hogar San José. La moza foi sorprendía per tercer vegada na mesma nueche incumpliendo la obligación de permanecer na casa. Yá fuera denunciada a les 22.00 hores y a les 01.50 hores, y llevada en dambes ocasiones al centru de residencia.

    A la mesma hora, les 02.45 hores, otra patrulla de Policía Local interceptó un vehículu circulando pola AS-II, nel que conducía una muyer ensin causa xustificativa pa faelo. El casu ye que yá nel día d’ayeri, fuera nuevamente denunciada por infracción al Real Decretu que regula l’estáu d’alarma. Esta madrugada, amás d’una nueva denuncia por esti motivu, impúnxose-y una denuncia alministrativa por conducir con drogues tóxiques nel organismu. Nel test de drogues dio positivu en cocaína. Amás portaba cierta cantidá d’estupefacientes, motivu pol que tamién foi denunciada.

    Amás d’estes incidencies de mayor trescendencia, la Policía Local interpunxo nel día d’ayeri un total de 62 denuncies por infringir la obligación de permanecer en casa.

  • Dos deteníos por tar de paséu per L’Algodonera

    Dos deteníos por tar de paséu per L’Algodonera

    Dalgunos ciudadanos siguen desafiando les restricciones a la circulación impuestos pol Decretu d’Alarma. Efectivos de la Policía Local detuvieron na tarde del lunes a dos vecinos de L’Algodonera. Los fechos tuvieron llugar de magar les 20 hores. L.G.P., de 61 años, y C.J.J., de 21, atopábense pasiando xuntos pela cai Los Andes supuestamente mientres buscaben cigarros en suelu pa poder fumar. Los axentes detuviéronlos por un presuntu delitu de desobediencia. Y ye que dambos fueren denunciaos en más ocasiones por incumplir les indicaciones del estáu d’alarma.

    El total de persones denunciaes nel llunes xubió a 41. D’ente toes elles destaca una señora de 52 años qu’a les 23.15 hores, foi sosprendida n’venida de la Costa, dafechu bébeda, faltando a trabayadores de la llimpieza, dempués de tirar una motocicleta que taba aparcada, a la qu’amás produció daños.

  • Un home deteníu por frayar una orde d’alloñamientu

    Un home deteníu por frayar una orde d’alloñamientu

    Saltóse la orde d’alloñamientu y cuando llegaron los axentes escondióse baxo una cama. La Policía Local detuvo na madrugada del llunes, alredor la 1:20 hores, a F.F.J. de 53 años d’edá. L’home, vecín de Xixón, foi treslladáu a dependencies policiales por romper una orde d’alloñamientu a valir decretada pol Xulgáu de Violencia sobro la Muyer. Los fechos asocedieron na cai Manuel Hevia Carriles. Un ciudadanu sollertó de que nel interior d’una casa taba produciéndose un fuerte discutiniu. Cuando los axentes llegaron a la puerta, escucharon les voces d’un home y una muyer, polo que decidieron picar. La víctima abrió la puerta alvirtiendo que taba sola y convidando a los axentes a comprobalo. El deteníu atopábase nel cuartu, so la cama.

    Per otru llau, a les 23:00 hores del llunes, una dotación de la Policía Local detuvo a un mozu que resultó tar reclamáu pol Xulgáu de Lo Penal nº 3 d’A Coruña. Trátase de R.J..Q.A. de 30 años d’edá. Atopábase nuna casa de la cai Consolación, onde presuntamente s’atopaben persones ayenes al vecinderu mercando droga. Una vegada nel llugar, los axentes identificaron a trés persones y denunciolos por incumplimientu del decretu d’estáu d’alarma. Nel aparador de la casa atopóse un bloque de supuestu ḥaxís de 9 cm de llongura por 6 cm d’anchu y 1,5 cm de grosez. Finalmente foi treslladáu a dependencies policiales pa la so puesta a disposición xudicial.