Los díes 17 y 18 de payares van ser una fecha importante na conocencia y espardimientu del asturianu y va selo dende Varsovia. La capital polaca acueye mientres dos díes el V Congresu Redefinindo as marxes dende unha Península Pluricultural: “Variación lingüística e ideoloxía”, onde una de les ponencies destaca el tratamientu periodísticu que la prensa asturiana dio al intentu de reforma estatutaria que diba recoyer la oficialidá del asturianu y l’eonaviegu.
Claudia Elena Menéndez, doctora y profesora na Universidá d’Uviéu, ya Inaciu Galán, doctor y miembru de númberu de l’Academia de la Llingua Asturiana, son los autores d’esta investigación que percuerre hasta 91 páxines de los diarios asturianos ente’l 1 d’ochobre y el 31 d’avientu de 2021 a la gueta de los discursos contrarios a la oficialidá de la llingua asturiana. Fueron 72 los conteníos atopaos neses páxines, con una estadística ablucante: del total, 50 testos publicaos diben escontra la oficialidá.
Ente los artículos analizaos, atópase un argumentariu característicu, más o menos desarrolláu, de la ideoloxía del españolismu llingüísticu, usando’l glotónimu bable, un tratamientu de llingua estinguida o l’usu d’un llinguaxe bélicu, ente otros, como la supuesta imposición “d’una llingua inventada”, asina como la negación de la entidá propia del asturianu como un sistema llingüísticu independiente, complexu y completu como vía pa xustificar la so oposición a la oficialidá y normalización.
L’estudiu de la investigadora y el investigador conclúi que los testos estudiaos faense ecu de la ideoloxía del españolismu llingüísticu al traviés de toa una riestra de tópicos y falacies bien detectables y coinciden en presentar la llingua asturiana como una “llingua inútil”, que supón gastos económicos y que nun merez la pena protexer y promocionar. Amás, destaquen qu’El Comercio toma partíu por una postura concreta al dar voz d’una manera tan descompensada a les opiniones contraries al asturianu, frente a les opiniones favorables, con una sobrerrepresentación de les voces detractores, yá que ye conocío polos autores que munchos testos unviaos nesos díes a favor del asturianu nun tuvieron espaciu.
La ponencia pue vese güei ente les 9:30 y les 11:30 hores nesti enllaz: https://uw-edu-pl.zoom.us/j/
