Xixón al día

Etiqueta: Viesques

  • L’Ayuntamientu va reordenar l’ámbitu de l’avenida Mar Cantábricu pa facilitar la salida pa Ciares

    L’Ayuntamientu va reordenar l’ámbitu de l’avenida Mar Cantábricu pa facilitar la salida pa Ciares

    L’Ayuntamientu de Xixón va reordenar la circulación nel ámbitu de l’avenida Mar Cantábricu coles mires d’ameyorar la fluidez del tráficu na salida de Viesques escontra la carretera de Ciares (AS-377).

    Les actuaciones diseñaes, que fueron presentaes esta tarde pol conceyal de Mediu Ambiente y Movilidá, Aurelio Martín, nuna xunta caltenida cola Asociación de Vecinos de Viesques, afecten a la cai Gloria Fuertes y a l’avenida Mar Cantábricu.

    En concreto, la conceyalía de Movilidá preve, per un sitiu, habilitar el xiru a la izquierda en sentíu salida de la ciudá nel encruz de la cai Gloria Fuertes cola carretera de Ciares y, por otru, reordenar l’encruz de Mar Cantábricu con Gloria Fuertes, de manera que se dea prioridá nesta exa a la circulación por esta última cai.

    L’oxetivu d’esta actuación ye xenerar una entrada y salida directa del barriu de Viesques escontra la carretera de Ciares al traviés de la cai Gloria Fuertes, solliviando d’esta miente’l tráficu nel encruz de l’avenida Mar Cantábricu cola carretera de La Coría, y tamién na rotonda d’incorporación a la carretera de Ciares, conocida popularmente como rotonda de Rubiera.

    La reordenación contempla la realización tanto d’obra pública nes cruces de la carretera de Ciares con Gloria Fuertes, y d’esta con Mar Cantábricu, como cambeos na rede semafórica.

  • EMULSA entama un plan especial de llimpieza nos barrios

    EMULSA entama un plan especial de llimpieza nos barrios

    Emulsa quier poner Xixón más guapu. La empresa municipal va desenvolver esti añu un plan especial de de llimpieza de fondura en cais, places y parques. Les actuaciones van llegar a 49 zones de tolos distritos urbanos de la ciudá. Los trabayos entamaron yá esta selmana nel barriu d’El Llano. Una ventena d’operarios van trabayar de llunes a sábadu, per selmanes, en cada una de les distintes zones. Van emplegar una docena de máquines. Con elles repasaránse en fondura los llabores habituales de llimpieza de ceres, baldeos y llaváu de contenedores. Amás, llevarase a cabu la descartelización y desratización, siega, pintura de moblame, revisión de xuegos infantiles y esbroce.

    Les actuaciones van llegar a puntos de tolos barrios, incluyendo Cimavilla, L’Arena, Viesques, Centru, Laviada, Pumarín, El Polígono, Roces, Nuevo Roces, Contrueces, El Coto, La Camocha, El Lauredal, La Calzada, El Natahoyo, Moreda, Tremañes, Xove, Portuarios, Pescadores, Montiana y Somió. L’oxetivu principal del plan ye realizar una repasada en fondura a les necesidaes de llimpieza de los barrios que sirva como ferramienta pa consiguir el compromisu cívicu de los ciudadanos col medioambiente urbanu de Xixón. La empresa municipal quier que los vecinos s’impliquen col caltenimientu de les zones verdes, la medría del reciclaje y l’usu de los Puntos Llimpios.

  • Cortes de tráficu pol pasu de La Vuelta el sábadu per Xixón

    Cortes de tráficu pol pasu de La Vuelta el sábadu per Xixón

    La etapa de La Vuelta Ciclista a España escurre per Xixón entrando nel cascu urbanu alredor de les 15.45 hores del sábadu. La Policía Local va acutar la circulación nel percorríu previstu. El pelotón de la prueba va entrar pela carretera Vieya de Villaviciosa (AS 632) y, al altor del Merenderu de La Casina, va xirar a la izquierda para tomar la Cai Albert Einstein y siguir poles cais Poeta Ángel González, Anselmo Solar, Feijoó y Ramón
    y Cajal. Na rotonda de La Coría, va esviar escontra la carretera vieya de La Pola Siero tomando’l camín del Santuariu, el camín de los Caleros, la cai Antonio Machado, la plaza de les Brigaes Internacionales, la carretera Carbonera y va salir de la ciudá per Mareo. Al pasu de la bandera verde, el tráficu va ser abiertu de nuevu.

    L’estacionamientu va tar prohibíu, dende’l xueves hasta que remate’l tránsitu de la etapa pel cascu urbanu, nestes cais: Poeta Ángel González (ente San Avelino y Anselmo Solar), Feijoó (entre Anselmo Cortil y Usandizaga) y camín de los Caleros.

    Los conductores que quieran entrar o salir de les parroquies de Deva, Castiello, Santurio
    y de los barrios de Viesques, parte alta d’El Coto y la Tejerona, van tener que realizar
    pola ronda. Encamiéntase siguir siempres les indicaciones de los axentes, de los voluntarios de Protección Civil y de el collaboradores de la organización. La Policía Local estima la collaboración y pon a disposición de la ciudadanía los teléfonu 985 18 11 00 ó 092
    pa resolver cualquier dulda.

  • Bon tiempu hasta’l domingu

    Bon tiempu hasta’l domingu

    Selmana soleyera en Xixón. El bon tiempu va ser protagonista hasta’l domingu na ciudá. Les nubes de díes atrás dexen pasu a un miércoles nel que va llucir el sol tol día. Les temperatures perpasaron los 20 graos nos momentos centrales del día. La estación meteorolóxica asitiada nel campus de Viesques marcó 20,4 graos.

    La situación va mantenese nos díes vinientes. El xueves vamos siguir esfrutando del sol, con temperatures que podríen algamar los 23 graos. Les máximes van siguir xubiendo de cara al viernes y el sábadu cuando los termómetros podríen llegar a los 26 graos.

    El domingo espérense intervalos nublos, principalmente de nubes altes, aumentando a nublu o cubiertu na metá occidental pela tarde. Nun se descarten agües débiles na mariña occidental a la fin del día. Les temperatures baxarán y el vientu va soplar variable tendiendo a oeste y noroeste.