Etiqueta: Violencia de xéneru

Xixón acueye esta fin de selmana’l Congresu sobre Prevención de la Violencia de Xéneru

El Gobiernu del Principáu entama’l primer Congresu de Prevención de la Violencia de Xéneru del Institutu Asturianu de la Muyer, que va cuntar cola presencia d’una docena d’espertes, referentes a nivel nacional, p’aldericar sobre les estratexes desenvueltes y estudiar futures acciones pa evitar esta lacra, sobre manera, ente la mocedá.

L’alcuentru va desenvolvese los díes 24 y 25, vienres y sábadu, nel Palaciu de Congreso Luis Adaro de Xixón y tien como principal oxetivu treslladar a la sociedá la importancia de la prevención d’esta violencia qu’afecta a neñes, adolescentes y muyeres de toles edaes. El problema va encetar dende una perspectiva estructural, qu’inclúi l’analís de los espacios de socialización y los programes coeducativos.

La directora xeneral d’Igualdá, Nuria Varela, y l’asesora de Coeducación de la Dirección Xeneral d’Igualdá, Marian Moreno, presentaron güei el congresu y animaron a participar a toles persones interesaes p’aldericar sobre les estratexes a desenvolver.

Ente les ponentes figuren la pedagoga Luz Martínez Ten, la profesora de Socioloxía de la Universidá de Xaén y esperta na prevención de la violencia de xéneru y coeducación Carmen Ruiz Repullo, la consultora de xéneru esperta en coeducación Laura Viñuela, l’activista feminista Amelia Tiganus, el catedráticu de Llingua Castellana y Lliteratura y espertu en Educación Miguel Ángel Arconada, la esperta en Xéneru y Polítiques de Igualdad Carmen Castro, la catedrática de Filosofía y doctora n’educación afectivu-sexual Chis Oliveira, la politóloga y esperta n’Igualdá Priscila Retamozo, la esperta en Polítiques de Igualdad Susana Ginesta, l’abogada y coordinadora del Centru de Crisis pa Víctimes d’Agresiones Sexuales, Victoria Carbajal, la psicóloga del centru de crisis, Victoria Eugenia Nieves y l’asesora de Coeducación d’Institutu Asturianu de la Muyer, Marian Moreno.

Amás, les xornaes van cuntar con dos actuaciones que contribúin a visibilizar el trabayu de muyeres artistes: les hermanes Ginesta, col so espectáculu Romanceru: les hermanes Escardasian. Desinfluencers chungaletis, y l’actuación musical d’Eva Texedor y Les pandereteres.

20/03/2023
El Centru de Crisis pa Víctimes d’Agresiones Sexuales del Gobiernu d’Asturies atiende a un 12,5% de persones más en 2022

El Centru de Crisis para Víctimes d’Agresiones Sexuales asistió dende la so apertura en payares de 2020 hasta’l pasáu 30 de setiembre a 425 muyeres, de les que 283 yeren víctimes de dalgún tipu de violencia (241 por violencia sexual y 42 fueron derivaes a otros recursos del Principáu) y 142 familiares o persones allegaes. Amás, en 2022 l’atención aumentó un 12,5% sobre l’exerciciu anterior.

Asina, nos dos primeros años del recursu abriéronse 241 espedientes a muyeres que cumplíen criterios d’intervención n’el mesmu centru de crisis: 182 mayores d’edá, con edaes entendíes ente los 18 y los 69 años (con una media de 35) y 52 menores (con una media de 15 años). D’elles, 152 muyeres y neñes, un 63%, sufrieren violencia sexual menos d’un añu antes d’allegar al equipamientu y otres 89, nun períodu anterior.

La directora xeneral d’Igualdá, Nuria Varela, y la coordinadora del centru, Victoria Carbajal, presentaron güei en rueda de prensa’l balance de los dos primeros años del centru, qu’emprestó serviciu a una media de 20 persones al mes.

Tocantes a la tipoloxía del delitu –conforme al Códigu Penal vixente a 30 de setiembre, antes de la entrada a valir de la Llei 10/2022, de 6 de setiembre, de Garantía Integral de la Llibertá Sexual- atendiéronse los siguientes:

– Agresión sexual: 142 casos (59%).

– Abusu sexual: 29 casos (12%).

– Abusu sexual na infancia: 54 casos (22%).

– Acoso sexual: 16 casos (7%).

Per otra parte, un 74% de les víctimes presentó denuncies poles agresiones sufiertes. Amás, un 63% de les muyeres qu’exercen el so derechu a l’acusación particular facer con abogaes y abogaos de los colexos profesionales del Principáu, colos que la Dirección Xeneral d’Igualdá robló un conveniu pa ufiertar esti serviciu gratuitu.

El centru empresta atención a toles muyeres que sufren xuna agresión sexual n’Asturies. D’esta miente, nos dos primeros años d’actividá, el 77% de les víctimes teníen la so residencia nel Principáu, ente que el 17% restante careció l’agresión mientres la so estancia na comunidá por vacaciones, visita, turismu o estudios. Coles mesmes, el 82% de les muyeres atendíes son españoles y el 18%, d’otres nacionalidaes.

Al respective de el agresores, el 90% son persones conocíes de les víctimes y un 80% son españoles. La media d’edá de los victimarios identificaos ye de 35 años.

L’equipamientu pioneru entró en funcionamientu en payares de 2020 coles mires d’ufiertar acompañamientu afechu a les demandes, necesidaes y tiempos de cada usuaria. D’esta miente, el centru cunta con un equipu de siete psicólogues y siete abogaes, amás de la coordinadora. Como novedá, el pasáu mes el centru incorporó un equipu esclusivu p’atender a les víctimes menores d’edá, formáu por una psicólogu y xuna abogada.

Nos dos años de funcionamientu del recursu, la Dirección Xeneral d’Igualdá impulsó alcuerdos y protocolos colos colexos de l’abogacía d’Uviéu y Xixón, los colexos de procuradoría, los cuerpos y fuerces de seguridá, los servicios sanitarios y los medios de comunicación, col fin d’emprestar una atención integral a les víctimes y ameyorar el tratamientu de les agresiones en prensa, radio y televisión.

El centru de crisis habilitó’l teléfonu 677 985 985, que ta disponible 24 hores, tolos díes del añu, pa l’atención a les víctimes, tanto por llamada como por mensaxes de testu y whatsapp.

09/11/2022
Yá valió d’una vida ensin protección

Ye ablucante como les polarizaciones polítiques tan llegando a les nueses cais y como se ta tornando nuna escalada de la violencia, sobre manera pa colectivos hestóricamente minorizaos. Asina, vemos como les agresiones a persones LGTBI tan creciendo nos últimos meses y les agresiones sexistes siguen el mesmu camín. Tenemos, por casu, l’agresión en La Pola Siero fai unes selmanes o l’agresión sexista na zona de copes de Xixón.

Per una parte, ye inadmisible que cuasi toles comunidaes autónomes d’Asturies tengan una llei LGTBI que defenda al colectivu y se-yos faiga reconocencia. Ensin esti documentu, les persones d’esti colectivu siéntense desprotexíes, aínda más si analizamos esa escalada de violencia escontra la xente LGTB nestos últimos meses. Por ello ye necesariu que’l gobiernu d’Asturies nun lu posponga más y arranque cola ellaboración d’esta llei que va ser un pasu más na reconocencia de los derechos de les persones LGTB d’Asturies. Porque sí, la campaña “Asturies arguyu de ti” ye bien bona, pero non suficiente.

Pela otra parte, tamién por esa polarización política de la que falábemos, les agresiones sexistes a muyeres n’Asturies va, a dulces, medrando. Los discursos d’odiu tan faciendo que se vaiga retrocediendo na lliberación de la muyer y qu’asocedan acciones como les que se cuntaron. La llei asturiana escontra la violencia de xéneru ye del añu 2011, polo que la reforma d’esta llei faise necesaria; les condiciones nesta xera nun son les mesmes que les qu’había nel momentu nel que se redactó.

Yá valió de que les persones de colectivos minorizaos ya oprimíos hestóricamente tengan que siguir viviendo ensin seguranza en plenu sieglu XXI. Ya valió d’una vida ensin protección.

17/12/2021
Cultura destaca’l llabor de nueve deportistes y entidaes na primer edición de los premios Xugamos pola igualdá. Non al machismu
La Conseyería de Cultura, Política Llingüística y Turismu, al traviés de la Dirección Xeneral de Deporte, entregó güei los premios Xugamos pola igualdá. Non al machismu, que na so primer edición distinguen a nueve muyeres y entidaes que lluchen cada día pa facer visible’l trabayu y dedicación de les deportistes asturianes. Los gallardones, dotaos con 30.000 euros, enmárquense ente les midíes del Pactu d’Estáu contra la Violencia de Xéneru.

El Conseyu Asesor de Deportes del Principáu foi l’órganu encargáu d’escoyer les 20 candidatures finalistes, ente les que la Comisión de Muyer, Deporte y Actividá Física escoyó les 9 ganadores. En xunto, reciben les reconocencies 3 clubes deportivos, 5 deportistes y una federación. La llista de premios ye esta:
- Premiu Deporte Base: Club Deportivo Fodeba.
- Premiu Difusión: Club Oviedo Atletismo.
- Premiu Conciliación: Federación de Baloncesto del Principado.
- Premiu Estratexa pola Igualdá: Oviedo Moderno C.F.
- Premiu Trayectoria, categoría deportista: Sara Álvarez Ordoñez.
- Premiu Trayectoria, categoría deportista: Carmen López García.
- Premiu Trayectoria, categoría deportista: Bárbara Camblor García.
- Premiu Trayectoria, categoría entrenadora: Beatriz Álvarez Valderrama.
- Premiu Trayectoria, categoría árbitra: Paula Acebal González.
La conseyera de Cultura, Política Llingüística y Turismu, Berta Piñán, y la directora xeneral de Deporte, Beatriz Álvarez Mesa, participaron esta tarde nel actu d’entrega d’estes distinciones, celebráu en Llaboral Ciudá de la Cultura.

La convocatoria d’estos gallardones busca reconocer trayectories, proyectos, programes y iniciatives que contribuyen a la crecedera del deporte de base de neñes, adolescentes y xóvenes, reduciendo l’abandonu de la práctica deportiva temprana. Tamién se distingue a persones y instituciones que fomenten la conciliación familiar y educativa, de la que se fomenta la visibilidá de trayectories amestaes al mundu deportivu en cualquier de les sos manifestaciones.

Mientres la entrega de los premios la Dirección Xeneral de Deporte presentó la nueva iniciativa Muévite pola igualdá, una serie de documentos audiovisuales que recueyen entevistes a muyeres vinculaes al mundu deportivu asturianu. Esta acción tamién s’incluye nel Pactu d’Estáu contra la Violencia de Xéneru.

Pa divulgar estos vídeos, nel 2022 ta prevista la creación d’un circuitu pelos centros educativos de distintos conceyos. Asina mesmo, van divulgase al traviés de la páxina web de la Dirección Xeneral de Deporte y en redes sociales.
16/12/2021
El Gobiernu d’Asturies va poner en marcha’l próximu añu un serviciu integral pa muyeres víctimes d’esplotación sexual

L’executivu autonómicu ya dio los primeros pasos nesta dirección el pasáu mes de xunu, cuando punxo en marchar el modelu d’acreditación de víctima de trata con fines d’esplotación sexual o en constestu de prostitución con grave vulnerabilidá, col propósitu de facilitar a estes muyeres l’accesu al IMV.

Nesta ocasión, el Principáu va dedicar el Día Internacional de la Eliminación de la Violencia escontra les Muyeres a la llucha contra la prostitución, la pornografía y la trata. «Reivindicamos un 25-N abolicionista porque nun nos vamos cansar de dicir que les muyeren nin se merquen, nin se venden, nin s’alquilen», esplicó Varela. «Nesti país cómprense muyeres tolos díes, sicasí, tenemos mui pocos datos fiables sobre la esplotación sexual», añedió.

Los datos más fiables sobre trata y prostitución n’Asturies que proporcionen les entidaes especializaes que trabayen con muyeres, como Apramp, la Fundación Amaranta y Médicos del Mundo, que l’añu pasáu atendieron a 1.082 víctimas. Según l’INE, el negociu de la prostitución n’España supón el 0,35% del PIB, lo que representa una cifra cercana a los 4.100 millones. En cuanto a la pornografía, les tecnoloxíes de la información facilitaron la estensión del so consumu a la población adolescente, qu’accede a estos conteníos per primer vez a los 12 años y cuasi 7 de cada 10 de manera frecuente, según l’informe (Des)información sexual: pornografía y adolescencia, de la organización Save the Children.

19/11/2021