Aída Tarrío, Olaia Maneiro y Sabela Maneiro, del grupu Tanxugueiras, son dende esti sábadu Embaxadores de la Llingua Asturiana. Les componentes del grupu revelación de fusión de música tradicional foron nomaes pol usu del idioma nel cantar ‘Terra’ y por defender la oficialidá del idioma asturianu en delles intervenciones.

Iniciativa pol Asturianu acuta esta distinción honorífica d’Embaxador/a de la Llingua Asturiana pa les persones que, nun siendo asturianes o de territorios del dominiu asturllionés, tienen una trayectoria destacada como activistes en defensa de la llingua asturiana en distintos ámbitos y mui especialmente con iniciatives que permitan al asturianu facese presente n’ámbitos internacionales, ganar reconocencia y espacios de visibilidá.

Fixeron entrega del nomamientu en Mieres del Camín, enantes del so conciertu, Iván Llera, presidente d’Iniciativa pol Asturianu; Inaciu Galán, vocal de rellaciones institucionales ya internacionales d’Iniciativa pol Asturianu ya Víctor Suárez, cofundador de la organización.

Tanxugueiras forma dende esti momentu parte d’esta distinción xunto con otres persones como Eva Cameán, Matthew Stephen Stuckwisch y Juan Carlos García Hoyuelos.